୧୬ ଜଣିଆ କମିଟିରେ ପ୍ରିୟଙ୍କା, ଥରୁର ଓ ରମେଶଙ୍କୁ ସାମିଲ କରାଯାଇଛି
ନୂଆଦିଲ୍ଲୀ: ୨୦୨୪ ଲୋକସଭା ନିର୍ବାଚନ ପାଇଁ କଂଗ୍ରେସ ଏକ ଇସ୍ତାହାର କମିଟି ଗଠନ କରିଛି । ପୂର୍ବତନ କେନ୍ଦ୍ରମନ୍ତ୍ରୀ ତଥା ଦଳର ବରିଷ୍ଠ ନେତା ପି ଚିଦାମ୍ବରମଙ୍କୁ ଏହାର ଅଧ୍ୟକ୍ଷ କରାଯାଇଛି । ଛତିଶଗଡ଼ର ପୂର୍ବତନ ଉପମୁଖ୍ୟମନ୍ତ୍ରୀ ଟିଏସ୍ ସିଂହଦେଓ ଏହି କମିଟିର ଆବାହକ ରହିବେ ।
ଏହି ୧୬ ଜଣିଆ କମିଟିରେ ପ୍ରିୟଙ୍କା ଗାନ୍ଧୀ ଭଦ୍ରା, କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା, ଜୟରାମ ରମେଶ ଏବଂ ଶଶି ଥରୁରଙ୍କୁ ମଧ୍ୟ ସାମିଲ କରାଯାଇଛି । ସେପଟେ କଂଗ୍ରେସ ଏକ ସଂକଳ୍ପ ପାରିତ କରିଛି । ଏହା ଅନୁଯାୟୀ ମୋଦି ସରକାରଙ୍କ କଥା ଓ କାର୍ଯ୍ୟ ମଧ୍ୟରେ ପାର୍ଥକ୍ୟ କୁହାଯିବ ।
ଇସ୍ତାହାର କମିଟିରେ ପୂର୍ବତନ କେନ୍ଦ୍ରମନ୍ତ୍ରୀ ଆନନ୍ଦ ଶର୍ମା, ମଣିପୁରର ପୂର୍ବତନ ଉପମୁଖ୍ୟମନ୍ତ୍ରୀ ଗାଇଖାଙ୍ଗମ, ଲୋକସଭାରେ ଦଳର ଉପନେତା ଗୌରବ ଗୋଗୋଇ, ଅଲ୍ ଇଣ୍ଡିଆ ପ୍ରଫେସନାଲ କଂଗ୍ରେସ ମୁଖ୍ୟ ପ୍ରବୀଣ ଚକ୍ରବର୍ତ୍ତୀ, ଇମ୍ରାନ୍ ପ୍ରତାପଗଡ଼ୀ, କେ ରାଜୁ, ଓଁକାର ସିଂହ ମାର୍କମ୍, ରଞ୍ଜିତ ରଞ୍ଜନ, ଜିଗ୍ନେଶ ମେୱାନୀ ଏବଂ ଗୁରୁଦୀପ ସାପ୍ପାଲ ରହିଛନ୍ତି ।
୨୦୨୪ ସାଧାରଣ ନିର୍ବାଚନ ଉପରେ ଦଳର ନଜର
ମଧ୍ୟପ୍ରଦେଶ, ଛତିଶଗଡ଼ ଓ ରାଜସ୍ଥାନରେ ପରାଜୟ ପରେ କଂଗ୍ରେସ ୨୦୨୪ ଲୋକସଭା ନିର୍ବାଚନ ପାଇଁ ପ୍ରସ୍ତୁତ ହେବାରେ ଆଗୁଆ ରହିଛି । ଡିସେମ୍ବର ୨୧ ତାରିଖ ଗୁରୁବାର ଦିନ ଦଳ କଂଗ୍ରେସ କାର୍ଯ୍ୟକାରିଣୀ କମିଟି (ସିଡବ୍ଲ୍ୟୁସି)ର ଏକ ବୈଠକ ଡାକିଥିଲା, ଯେଉଁଥିରେ ଲୋକସଭା ନିର୍ବାଚନ ପାଇଁ ରଣନୀତି ଉପରେ ଆଲୋଚନା ହୋଇଥିଲା । ଏହାର ଗୋଟିଏ ଦିନ ପରେ ଡିସେମ୍ବର ୨୨ତାରିଖରେ କଂଗ୍ରେସ ଇସ୍ତାହାର କମିଟି ଗଠନ ନେଇ ଘୋଷଣା କରିଥିଲା ।
ମୋଦିଙ୍କ ଚ୍ୟାଲେଞ୍ଜର ମୁକାବିଲା କିପରି କରିବେ, ପ୍ରସ୍ତୁତ ହେଲା ରଣନୀତି
ସିଡବ୍ଲ୍ୟୁସି ବୈଠକରେ ଏକ ସଂକଳ୍ପ ପାରିତ ହୋଇଛି । ଦଳ ମୋଦି ସରକାରଙ୍କ ଦୁର୍ବଳତାକୁ ପଦାରେ ପକାଇବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦାବି ଏବଂ ବାସ୍ତବତା ମଧ୍ୟରେ ବହୁତ ପାର୍ଥକ୍ୟ ରହିଛି ।
ସାମାଜିକ ଧ୍ରୁବୀକରଣ ବ୍ୟାପକ ହୋଇଛି ଏବଂ ଏହାକୁ ନିର୍ବାଚନ ଜିତିବା ପାଇଁ ବ୍ୟବହାର କରାଯାଉଛି । ଗଣତନ୍ତ୍ର ଭୁଶୁଡ଼ି ପଡ଼ିଛି ବୋଲି ମଧ୍ୟ ସଂକଳ୍ପରେ କୁହାଯାଇଛି । ଗଣତନ୍ତ୍ର ନିଜେ ଆକ୍ରମଣର ଶିକାର ହୋଇଛି ଏବଂ ସମ୍ବିଧାନ ଅନୁଯାୟୀ ନାଗରିକମାନେ ସେମାନଙ୍କର ସ୍ୱାଧୀନତାରୁ ବଞ୍ଚିତ ହୋଇଛନ୍ତି। ଏସବୁ ପ୍ରସଙ୍ଗରେ ଆଲୋଚନା ହେବା ଦରକାର ।