ନୂଆଦିଲ୍ଲୀ: ଦିଲ୍ଲୀରେ ବିଜେପିର ଦୁଇଦିନିଆ ବୈଠକ ଶନିବାର ସନ୍ଧ୍ୟାରେ ଶେଷ ହୋଇଛି । ଲୋକସଭା ନିର୍ବାଚନ ପାଇଁ ପ୍ରସ୍ତୁତି ଚଳାଇଥିବା ବିଜେପି କ୍ଷମତାର ହ୍ୟାଟ୍ରିକ୍ କରିବା ପାଇଁ ରଣନୀତି ପ୍ରସ୍ତୁତ କରିବା ଆରମ୍ଭ କରିଛି ।
ଏହି ଦୁଇଦିନିଆ ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସଂଗଠନର ଶୀର୍ଷ ନେତାମାନଙ୍କୁ ଦଳର ଭୋଟ୍ ପ୍ରତିଶତ ୧୦ ପ୍ରତିଶତ ବୃଦ୍ଧି ଦିଗରେ କାର୍ଯ୍ୟ କରିବାକୁ କହିଛନ୍ତି। ଗତ ଲୋକସଭା ନିର୍ବାଚନରେ ବିଜେପିକୁ ୩୭ ପ୍ରତିଶତ ଭୋଟ ସହ ୩୦୩ ଟି ଆସନ ମିଳିଥିଲା ।
ଅପରପକ୍ଷରେ ବିରୋଧୀ ମେଣ୍ଟ ‘ଇଣ୍ଡିଆ’ର ଜଣେ ପ୍ରାର୍ଥୀଙ୍କ ଫର୍ମୁଲାକୁ ମୁକାବିଲା କରିବା ପାଇଁ ଦଳ ଯେଉଁ ସବୁ ରାଜ୍ୟରେ ଦୁର୍ବଳ ସ୍ଥିତିରେ ରହିଛି ସେଠାରେ ଦୃଢ଼ ଓ ପ୍ରତ୍ୟକ୍ଷଭାବେ ଲଢ଼ିବାକୁ ନିଷ୍ପତ୍ତି ନେଇଛି । ଏଥିରେ ବିଶେଷ କରି ଦକ୍ଷିଣ ଭାରତୀୟ ରାଜ୍ୟ ସାମିଲ ଅଛନ୍ତି ।
ମିଶନ ୨୦୨୪: ଆଞ୍ଚଳିକ ଦଳମାନଙ୍କ ସହ କୌଣସି ବୁଝାମଣା ନାହିଁ
ରାଜ୍ୟରେ ସ୍ଥାନୀୟ କ୍ଷୁଦ୍ର ଦଳମାନଙ୍କ ସହ ମେଣ୍ଟର ପରିସର ଖୋଜିବା ପାଇଁ ଦଳ ଦଳୀୟ ପ୍ରଭାରୀମାନଙ୍କୁ ଅଧିକାର ଦେଇଛି । ତେବେ ଲୋକସଭାରେ ଆସନ ଦୃଷ୍ଟିରୁ ବରିଷ୍ଠ ସହଯୋଗୀଭାବେ ବିଜେପି ନିଜ ଭୂମିକାରେ ଆପୋଷ ବୁଝାମଣା କରିବ ନାହିଁ ବୋଲି ସର୍ତ୍ତ କରାଯାଇଛି ।
ମିଳିଥିବା ସୂଚନା ଅନୁଯାୟୀ, ୨୦୧୪ରୁ ଆଜି ପର୍ଯ୍ୟନ୍ତ ବିଜେପି ସବୁ ଚ୍ୟାଲେଞ୍ଜର ଦୃଢ଼ ମୁକାବିଲା କରିଛି ଏବଂ ବିଜେପି ଦେଶବ୍ୟାପୀ ଦଳ ନୁହେଁ ବୋଲି ମିଥ୍ୟାକୁ ଭାଙ୍ଗିଦେଇଛି ବୋଲି ଦଳର ବରିଷ୍ଠ ନେତାମାନେ କହିଛନ୍ତି ।
ଉତ୍ତରାଖଣ୍ଡ, ହରିୟାଣା ଓ ୟୁପିରେ ସରକାର ଗଠନ, ତ୍ରିପୁରାରୁ ବାମପନ୍ଥୀଙ୍କୁ ହଟାଇବା ଏବଂ ପଶ୍ଚିମବଙ୍ଗରେ ୧୮ଟି ଲୋକସଭା ଆସନ ଜିତିବା ଭଳି ଉଦାହରଣ ଦେଇ ଦଳ କହିଛି ଯେ ଏବେ ତାମିଲନାଡୁ, କେରଳ, ଆନ୍ଧ୍ରପ୍ରଦେଶ ଭଳି ରାଜ୍ୟର ସ୍ଥାନୀୟ ଦଳମାନଙ୍କ ସହ ସିଧାସଳଖ ନିର୍ବାଚନ ଲଢ଼ିବାର ରଣନୀତି ପ୍ରସ୍ତୁତ ହେବା ଦରକାର ।
ଦଳ ଏହି କାମ ଆରମ୍ଭ କରିଛି ଏବଂ ଦୁଇମାସ ମଧ୍ୟରେ ପ୍ରଥମ ପର୍ଯ୍ୟାୟ କାମ ଶେଷ ହେବ ବୋଲି ଦଳର ଜଣେ ବରିଷ୍ଠ ନେତା କହିଛନ୍ତି । ଫେବ୍ରୁଆରି ଶେଷ ସୁଦ୍ଧା ଦଳ ମୋଦିଙ୍କ ଗ୍ୟାରେଣ୍ଟି ସ୍ଲୋଗାନ ମାଧ୍ୟମରେ ସିଧାସଳଖ ପ୍ରତିଦ୍ୱନ୍ଦ୍ୱିତା କରିବା ସ୍ଥିତିରେ ରହିବ ।
ଏଥିପାଇଁ ବିଜେପିର ବିକାଶ ଭାରତ ସଂକଳ୍ପ ଯାତ୍ରା ସହ ଲୋକଙ୍କୁ ଯୋଡ଼ିବା ସହ କେନ୍ଦ୍ରର ସମସ୍ତ ଯୋଜନା ସମ୍ପର୍କରେ ସଚେତନ କରିବାକୁ ବିଜେପି ପକ୍ଷରୁ ସମସ୍ତ ରାଜ୍ୟ ସଭାପତି ଓ ପ୍ରଭାରୀମାନଙ୍କୁ ନିର୍ଦ୍ଦେଶ ଦିଆଯାଇଛି ।
ଏହା ହେବ ଦକ୍ଷିଣରେ ବିଜେପିର ରୋଡମ୍ୟାପ୍
ଆନ୍ଧ୍ରପ୍ରଦେଶ: ଲୋକସଭା ନିର୍ବାଚନ ସହ ଏକାସାଙ୍ଗରେ ହେବ ବିଧାନସଭା ନିର୍ବାଚନ। ଟିଡିପି ଏବଂ ପୱନ କଲ୍ୟାଣଙ୍କ ଦଳ ଜନସେନା ସହ ଦଳ ଏଠାରେ ମେଣ୍ଟ କରିପାରେ । ତେବେ ଏହି ମେଣ୍ଟ ସର୍ତ୍ତରେ ରହିବ ଯେ ଲୋକସଭାରେ ବିଜେପି ବରିଷ୍ଠ ଦଳ ରହିବ ।
ତାମିଲନାଡୁ: ଏମକେଏମ, ପିଟି ପାର୍ଟି ଏବଂ ସ୍ୱାଧୀନ ଦଳ ୧-୨ ଲକ୍ଷ ଭୋଟ୍ ପାଇଥିବା ନେତାଙ୍କ ସହ ମିଶି ନିର୍ବାଚନ ଲଢ଼ିବ । ବିଜେପି କନ୍ୟାକୁମାରୀ, ତେନକାସୀ, ମଦୁରାଇ, ଚେନ୍ନାଇ ଦକ୍ଷିଣ, ରାମନାଥପୁରମ୍, ଥୁଥୁକୁଡି ସମେତ ୧୯ଟି ଆସନରେ ଲଢ଼ିବ ।
କେରଳ: ଏଠାରେ ବାମପନ୍ଥୀ ଓ କଂଗ୍ରେସରେ ଟିକେଟରୁ ବଞ୍ଚିତ ନେତାଙ୍କୁ ଟାର୍ଗେଟ କରିବାକୁ ପ୍ରୟାସ କରାଯିବ । ମୋଦିଙ୍କ ନାମରେ ଚର୍ଚ୍ଚରୁ ସମର୍ଥନ ହାସଲ କରିବା ପାଇଁ ଦଳ ରଣନୀତି ମଧ୍ୟ ଗ୍ରହଣ କରିବ ।