ନୂଆଦିଲ୍ଲୀ: ଉତ୍ତର ଭାରତରେ ଅତୁଳନୀୟ ଅଗ୍ରଣୀ ହାସଲ କରିବା ପରେ ବିଜେପି ଦକ୍ଷିଣ ଭାରତରେ ମଧ୍ୟ ବିରୋଧୀ ଇଣ୍ଡି ମେଣ୍ଟକୁ ପରାସ୍ତ କରିବା ପାଇଁ ରଣନୀତି ପ୍ରସ୍ତୁତ କରିବା ଆରମ୍ଭ କରିଛି । ଶୁକ୍ରବାର ଓ ଶନିବାର ଦେଶର ବିଭିନ୍ନ ସ୍ଥାନରୁ ଆସିଥିବା ଦଳୀୟ କର୍ମକର୍ତ୍ତାମାନଙ୍କ ସହ ହୋଇଥିବା ବୈଠକରେ ଦକ୍ଷିଣ ଭାରତରେ ବିଜେପି ସମ୍ମୁଖୀନ ହେଉଥିବା ଚ୍ୟାଲେଞ୍ଜ ଏବଂ ଏହାର ମୁକାବିଲା ପାଇଁ ରଣନୀତି ଉପରେ ବିସ୍ତୃତ ଆଲୋଚନା ହୋଇଥିଲା ।
ତେଲେଙ୍ଗାନା, ଆନ୍ଧ୍ରପ୍ରଦେଶ, କର୍ଣ୍ଣାଟକ ଓ କେରଳରେ ବିଜେପି ଦୁର୍ବଳ ଦେଖାଯାଉଥିଲେ ମଧ୍ୟ ବିଜେପି ନେତୃତ୍ୱାଧୀନ ଏନଡିଏ ଏହି ୪ଟି ରାଜ୍ୟରେ ଉଭୟ ୨୦୧୪ ଓ ୨୦୧୯ରେ ୟୁପିଏକୁ ପଛରେ ପକାଇଦେଇଥିଲା । ଏହି ରାଜ୍ୟଗୁଡ଼ିକରେ ସମୁଦାୟ ୧୨୯ଟି ଲୋକସଭା ଆସନ ରହିଛି ।
କର୍ଣ୍ଣାଟକରେ ବିଜେପି ଓ କଂଗ୍ରେସର ସ୍ଥିତି କ’ଣ ?
କର୍ଣ୍ଣାଟକରେ ବିଧାନସଭା ନିର୍ବାଚନ ଜିତିବା ପରେ କଂଗ୍ରେସ ଏବଂ ବିରୋଧୀ ଇଣ୍ଡି ମେଣ୍ଟ ଏହାକୁ ବିଜେପି ମୁକ୍ତ କହିବାକୁ ଚେଷ୍ଟା କରୁଛନ୍ତି, କିନ୍ତୁ ବାସ୍ତବତା ହେଉଛି ବିଜେପି ଏଠାରେ କଂଗ୍ରେସଠାରୁ ବହୁତ ଆଗରେ ରହିଛି ଏବଂ ୨୦୧୪ରେ ୪୩.୭ ପ୍ରତିଶତ ଭୋଟ ସହ ୧୭ଟି ଏବଂ ୨୦୧୯ରେ ୨୫ଟି ଆସନରେ ୫୧.୭ ପ୍ରତିଶତ ଭୋଟ ପାଇ ବିଜୟୀ ହୋଇଥିଲା । ଏହି ଦୁଇଟି ଲୋକସଭା ନିର୍ବାଚନରେ କଂଗ୍ରେସ ଯଥାକ୍ରମେ ୪୧.୨ ପ୍ରତିଶତ ଭୋଟ ସହ ୯ଟି ଆସନ ଏବଂ ୩୨.୧ ପ୍ରତିଶତ ଭୋଟ ସହ ଗୋଟିଏ ଆସନ ପାଇଥିଲା ।
ଯଦିଓ ବିଜେପିର ଲିଙ୍ଗାୟତ ଭୋଟ ବିଛିନ୍ନ ହେବା ଏବଂ ମୁସଲମାନ ଭୋଟ କଂଗ୍ରେସ ପ୍ରତି ଏକଜୁଟ ହେବା କାରଣରୁ ବିଧାନସଭା ଫଳାଫଳ କଂଗ୍ରେସ ସପକ୍ଷରେ ଯାଇଛି, କିନ୍ତୁ ବିଜେପି କଂଗ୍ରେସର ଅଗ୍ରଣୀକୁ ରୋକିବା ପାଇଁ ଜେଡିଏସ ସହ ହାତ ମିଳାଇଛି ।
ଭୋକାଲିଙ୍ଗାଙ୍କର କୋର ଭୋଟ୍ ବ୍ୟାଙ୍କ ସହାୟତାରେ ଜେଡିଏସ ୨୦୧୪ ଓ ୨୦୧୯ରେ ପ୍ରାୟ ୧୦ ପ୍ରତିଶତ ଭୋଟ ପାଇବାରେ ସକ୍ଷମ ହୋଇଥିଲା, ଯଦିଓ ଏହା ମାତ୍ର ଗୋଟିଏ କିମ୍ବା ଦୁଇଟି ଆସନରେ ବିଜୟୀ ହୋଇଥିଲା । ଯଦି ଭୋକାଲିଙ୍ଗା ଓ ଲିଙ୍ଗାୟତ ବିଜେପି-ଜେଡିଏସ ମେଣ୍ଟ ସହ ମିଶିଯାଆନ୍ତି, ତେବେ ଜାତିଭିତ୍ତିକ ଗଣନା ରିପୋର୍ଟକୁ ନେଇ କଂଗ୍ରେସର ଯୋଜନା ଧୂଳିସାତ ହୋଇପାରେ ।
ତେଲେଙ୍ଗାନାରେ ମୁଖ୍ୟ ମୁକାବିଲା ହୋଇପାରେ ବିଜେପି-କଂଗ୍ରେସ
ସେହିଭଳି ତେଲେଙ୍ଗାନାରେ କଂଗ୍ରେସର ବିଜୟ ଉତ୍ତର ଓ ଦକ୍ଷିଣ ଭାରତ ମଧ୍ୟରେ ପାର୍ଥକ୍ୟ ବୋଲି ଆକଳନ କରାଯାଉଛି, କିନ୍ତୁ ବାସ୍ତବତା ହେଉଛି ଯେ ଗତ ୧୦ ବର୍ଷ ମଧ୍ୟରେ ବିଆରଏସ (ପୂର୍ବରୁ ଟିଆରଏସ) ତେଲେଙ୍ଗାନା ରାଜନୀତିର କେନ୍ଦ୍ରବିନ୍ଦୁରେ ରହିଛି, ଯାହା ୟୁପିଏ କିମ୍ବା ଏନଡିଏର ଅଂଶ ନୁହେଁ । ବିଧାନସଭା ନିର୍ବାଚନରେ ବିଆରଏସର ପରାଜୟ ପରେ ଲୋକସଭାରେ ମୁଖ୍ୟ ମୁକାବିଲା ବିଜେପି ଓ କଂଗ୍ରେସ ମଧ୍ୟରେ ହେବ ବୋଲି ଆଶା କରାଯାଉଛି ।
ଏହା ସତ ଯେ ଅଖଣ୍ଡ ଆନ୍ଧ୍ରପ୍ରଦେଶରେ ଟିଡିପି ସହିତ ବିଜେପିର ସାଂଗଠନିକ ଢାଞ୍ଚା ଅତ୍ୟନ୍ତ ଦୁର୍ବଳ ଥିଲା ଏବଂ ତେଲେଙ୍ଗାନାରେ ବିଜେପି ସମାନ ସ୍ଥିତିରେ ଥିଲା । ଏହି କାରଣରୁ ୨୦୧୮ରେ ପ୍ରଥମ ଥର ଏକାକୀ ନିର୍ବାଚନ ଲଢ଼ିଥିବା ବିଜେପି ମାତ୍ର ୭ ପ୍ରତିଶତ ଭୋଟ ଓ ଗୋଟିଏ ଆସନ ଜିତିପାରିଥିଲା, କିନ୍ତୁ ୪ ମାସ ପରେ ହୋଇଥିବା ଲୋକସଭା ନିର୍ବାଚନରେ ବିଜେପି ୧୯.୭ ପ୍ରତିଶତ ଭୋଟ ସହ ୪ଟି ଆସନ ଜିତିବାରେ ସଫଳ ହୋଇଥିବାବେଳେ କଂଗ୍ରେସ ୨୯.୮ ପ୍ରତିଶତ ଭୋଟ ସତ୍ତ୍ୱେ ମାତ୍ର ୩ଟି ଆସନରେ ବିଜୟୀ ହୋଇଥିଲା
ଏଥର କଂଗ୍ରେସ ସହ ମୁହାଁମୁହିଁ ଲଢ଼େଇରେ ଦଳ ଅଧାରୁ ଅଧିକ ଆସନରେ ବିଜୟୀ ହେବାକୁ ଯାଉଛି । ଏହି ପ୍ରସ୍ତୁତି ସହ ଜଡ଼ିତ ଜଣେ ବରିଷ୍ଠ ନେତା କହିଛନ୍ତି ଯେ ଗତଥର ବିଜେପି ଦୁଇଟି ଆସନରେ ବହୁତ କମ୍ ବ୍ୟବଧାନରେ ପରାସ୍ତ ହୋଇଥିଲା । ଏଥର ବିଧାନସଭା ନିର୍ବାଚନରେ ୧୪ ପ୍ରତିଶତ ଓ ୮ଟି ଆସନ ପରେ ବିଜେପି ଲୋକସଭାରେ ୨୫ ପ୍ରତିଶତରୁ ଅଧିକ ଭୋଟ ପାଇ ୧୦ଟି ଆସନ ଜିତିବା ପାଇଁ ରଣନୀତି ପ୍ରସ୍ତୁତ କରୁଛି ।
ତାମିଲନାଡୁରେ ବିଜେପି ବହୁତ ଦୁର୍ବଳ
ତାମିଲନାଡୁରେ ବିଜେପି ବହୁତ ଦୁର୍ବଳ ହୋଇପାରେ, କିନ୍ତୁ ଏନଡିଏ ବିଷୟରେ ଏହା କୁହାଯାଇପାରିବ ନାହିଁ । ୨୦୧୪ରେ ଏଆଇଏଡିଏମକେ ସହ ଏନଡିଏ ମେଣ୍ଟ ରାଜ୍ୟରେ ସମସ୍ତ ୩୯ଟି ଆସନ ଜିତିବାରେ ସଫଳ ହୋଇଥିଲେ ମଧ୍ୟ ୨୦୧୯ରେ ଏହା ମାତ୍ର ଗୋଟିଏ ଆସନରେ ସୀମିତ ରହିଥିଲା । ଅର୍ଥାତ୍ ତାମିଲନାଡୁରେ ଡିଏମକେ ଓ କଂଗ୍ରେସର ୟୁପିଏକୁ ଟକ୍କର ଦେବା ସ୍ଥିତିରେ ରହିବ ବିଜେପି ।
ବିଜେପିର ଆକ୍ରମଣାତ୍ମକ ରାଜନୀତି ଏଆଇଏଡିଏମକେ ସହ ସମ୍ପର୍କକୁ ଖରାପ କରିଛି, କିନ୍ତୁ ଜୟଲଳିତାଙ୍କ ଚେହେରାର ଅଭାବ ଏବଂ ଆଭ୍ୟନ୍ତରୀଣ କଳହ ଯୋଗୁଁ ଏଆଇଏଡିଏମକେ ପାଖରେ ବିଜେପି ସହ ମେଣ୍ଟ କରିବା ବ୍ୟତୀତ ଅନ୍ୟ କୌଣସି ବିକଳ୍ପ ନାହିଁ । ଜାନୁଆରୀ ଶେଷ ସୁଦ୍ଧା ପିଏମକେ ଭଳି ଛୋଟ ଦଳକୁ ନେଇ ଦୁଇଦଳ ମଧ୍ୟରେ ଆସନ ବୁଝାମଣା ଏବଂ ମେଣ୍ଟ ଚୁକ୍ତି ଚୂଡ଼ାନ୍ତ ହେବ ବୋଲି ଆଶା କରାଯାଉଛି ।
ଏନଡିଏରେ ସାମିଲ ହେବାକୁ ଚେଷ୍ଟା କରୁଛି ଟିଡିପି
ଏହା ସତ ଯେ ଉଭୟ କେରଳ ଓ ଆନ୍ଧ୍ରପ୍ରଦେଶରେ ବିଜେପି କିମ୍ବା ଏନଡିଏ ଦୃଢ଼ ସ୍ଥିତିରେ ନାହାନ୍ତି, କିନ୍ତୁ ଆନ୍ଧ୍ରପ୍ରଦେଶରେ ଇଣ୍ଡି ମେଣ୍ଟ ପାଇଁ ମଧ୍ୟ ସମାନ ସ୍ଥିତି ରହିଛି । ଉଭୟ ୱାଇଏସଆର କଂଗ୍ରେସ ଏବଂ ଡିଟିପି ଇଣ୍ଡି ମେଣ୍ଟ ଏବଂ ଏନଡିଏରୁ ବାହାରେ ଅଛନ୍ତି । ଏନଡିଏରୁ ଅଲଗା ହେବା ସତ୍ତ୍ୱେ ଉଭୟ ସ୍ଥାନୀୟ ଦଳ ନିଜକୁ ବିଜେପିର ନିକଟତର ମନେ କରୁଛନ୍ତି ଏବଂ ଗତ ପାଞ୍ଚବର୍ଷ ମଧ୍ୟରେ ବିଭିନ୍ନ ସମୟରେ ସଂସଦରେ ଏହା ପ୍ରମାଣିତ ହୋଇଛି । ଯଦିଓ ଟିଡିପି ଲଗାତାର ଏନଡିଏରେ ସାମିଲ ହେବାକୁ ଚେଷ୍ଟା କରୁଛି, ତଥାପି ୱାଇଏସଆର କଂଗ୍ରେସର ଅସନ୍ତୋଷ ଭୟରେ ବିଜେପି ଏ ନେଇ କୌଣସି ନିଷ୍ପତ୍ତି ନେବାକୁ ପଛଘୁଞ୍ଚା ଦେଉଛି ।
କେରଳରେ ବିଜେପିର ସ୍ଥିତି କ’ଣ ?
କେରଳରେ ଇଣ୍ଡି ମେଣ୍ଟର ସହଯୋଗୀ କଂଗ୍ରେସ ଓ ସିପିଏମ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେଉଛି । ଯଦିଓ ବିଜେପି କେରଳରେ କୌଣସି ଆସନ ଜିତି ନାହିଁ, ତଥାପି ୨୦୧୯ରେ ୧୩ ପ୍ରତିଶତ ଭୋଟ ପାଇ ନିଜର ଉପସ୍ଥିତି ଜାହିର କରିଛି । ବିଜେପି ଖ୍ରୀଷ୍ଟିଆନ ଭୋଟରଙ୍କୁ ଆକୃଷ୍ଟ କରିବାକୁ ଚେଷ୍ଟା କରୁଛି ଏବଂ ବରିଷ୍ଠ କଂଗ୍ରେସ ନେତା ଏକେ ଆଣ୍ଟୋନିଙ୍କ ପୁଅ ଅନିଲ ଆଣ୍ଟୋନିଙ୍କୁ ମଧ୍ୟ ଦଳର ରାଷ୍ଟ୍ରୀୟ ସମ୍ପାଦକଭାବେ ନିଯୁକ୍ତ କରିଛି । ଏଥିରେ ବିଜେପିକୁ ସାମାନ୍ୟ ସଫଳତା ମିଳିଲେ ଖାତା ଖୋଲିବା ଅସମ୍ଭବ ହେବ ନାହିଁ ।