ନୂଆଦିଲ୍ଲୀ: ସାଧାରଣ ନିର୍ବାଚନ ପୂର୍ବରୁ ବିଜେପି ନିଜର ପ୍ରସ୍ତୁତି ଚୂଡ଼ାନ୍ତ କରିବା ଆରମ୍ଭ କରିଛି । ଲୋକସଭା ନିର୍ବାଚନକୁ ଦୃଷ୍ଟିରେ ରଖି ଦଳ ଶନିବାର ଅନେକ ଗୁରୁତ୍ୱପୂର୍ଣ୍ଣ ନିଯୁକ୍ତି ଦେଇଛି । ୨୩ଟି ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳ ପାଇଁ ନିର୍ବାଚନ ପ୍ରଭାରୀ ନିଯୁକ୍ତ ହୋଇଛନ୍ତି ।
ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀ ମୋଦିଙ୍କ ୩୦ଟି ସଭା
ସାଧାରଣ ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସାରାଦେଶରେ ପାଖାପାଖି ୩୦ଟି ସଭା କରିବେ । ଦେଶର ପ୍ରତ୍ୟେକ ରାଜ୍ୟରେ ଅତିକମରେ ଗୋଟିଏ ଲେଖାଏଁ ରାଲି କରିବାକୁ ଦଳ ଯୋଜନା କରିଛି । ବିହାର ଓ ଉତ୍ତରପ୍ରଦେଶ ଭଳି ରାଜ୍ୟରେ ଅଧିକ ରାଲି ହେବ । ଫେବ୍ରୁଆରି ୪ ତାରିଖରେ ବିହାରର ବେତିଆରେ ଏକ ରାଲି ଅନୁଷ୍ଠିତ ହେବାକୁ ଯାଉଛି, ଯେଉଁଥିରେ ନୀତୀଶ କୁମାର ମଧ୍ୟ ସାମିଲ ହୋଇପାରନ୍ତି । ନିକଟରେ ବିଜେପି ଏହାର ଥିମ୍ ସଙ୍ଗ ମଧ୍ୟ ଲଞ୍ଚ କରିଛି । ଫେବ୍ରୁଆରି ୧୫ରେ ୟୁଏଇରେ ହେବାକୁ ଥିବା ମନ୍ଦିରର ଉଦ୍ଘାଟନକୁ ଦେଶବ୍ୟାପୀ ପାଳନ କରିବାକୁ ଦଳ ଯୋଜନା କରୁଛି । ଏହାକୁ ନିଜେ ପିଏମ ମୋଦି ଉଦ୍ଘାଟନ କରିବେ । ଏହାବ୍ୟତୀତ ଆଗାମୀ କିଛିଦିନ ମଧ୍ୟରେ ଏନଡିଏର ସମ୍ପ୍ରସାରଣ ପାଇଁ ଦଳ ନୂଆ ସହଯୋଗୀ ଯୋଡିବାକୁ ଚେଷ୍ଟା କରିପାରେ ।
ମିଶନ ୪୦୦, କିନ୍ତୁ ସର୍ତ୍ତ ଲାଗୁ
ଗତ କିଛିଦିନ ହେବ ବିଜେପିର ମିଶନ ୪୦୦କୁ ନେଇ ଚର୍ଚ୍ଚା ଜୋର ଧରିଛି । କିନ୍ତୁ ବିଜେପି ଏଭଳି କୌଣସି ସ୍ଲୋଗାନକୁ ଖଣ୍ଡନ କରିଛି । ବାସ୍ତବରେ ଦକ୍ଷିଣରେ ପ୍ରତିବନ୍ଧକ ଥିବାରୁ ନିଜେ ୪୦୦ ଆସନ ଅତିକ୍ରମ କରିବା ପ୍ରାୟ ଅସମ୍ଭବ ବୋଲି ବିଜେପି ବିଶ୍ୱାସ କରୁଛି । କିନ୍ତୁ ଯଦି ଏନଡିଏ ସହଯୋଗୀ ଦଳମାନଙ୍କ ସହ ମିଶି ୪୦୦ ଅତିକ୍ରମ କରେ ତେବେ ଏହା ମଧ୍ୟ ଏକ ବଡ଼ ସଫଳତା ହେବ ବୋଲି ଦଳ ବିଶ୍ୱାସ କରୁଛି । ଏହି ପ୍ରୟାସରେ ବିଜେପି ଉତ୍ତର ଭାରତରେ ୨୦୧୯ର ପ୍ରଦର୍ଶନର ପୁନରାବୃତ୍ତି କରିବା ପାଇଁ ଦକ୍ଷିଣରେ ଟିଡିପି, ଜେଡିଏସ୍ ଏବଂ ଏଆଇଏଡିଏମକେ ଭଳି ଦଳ ସହିତ ଚୁକ୍ତି କରି ସେହି ସଂଖ୍ୟାକୁ ଛୁଇଁବାକୁ ଚେଷ୍ଟା କରିବ ।