ନୂଆଦିଲ୍ଲୀ : ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ଟିଏମସି ସୁପ୍ରିମୋ ମମତା ବାନାର୍ଜୀ ୨୦୨୪ ଲୋକସଭା ନିର୍ବାଚନରେ ବିଜୟ ପାଇଁ ତାଙ୍କ ଦଳର ସାଂସଦ ମହୁଆ ମୋଇତ୍ରାଙ୍କ ‘ଥିଓରି’କୁ ବିଜେପି ସାଂସଦ ନିଶିକାନ୍ତ ଦୁବେ ଖଣ୍ଡନ କରିଛନ୍ତି । ବିଜେପି ସାଂସଦ କହିଛନ୍ତି ଯେ ଭାରତ ସରକାରଙ୍କ ଦ୍ୱାରା ୱାଣ୍ଟେଡ୍ ଆତଙ୍କବାଦୀ ଘୋଷିତ ଆତଙ୍କବାଦୀ ଦାଉଦ ଇବ୍ରାହିମ ଯଦି ଉତ୍ତରପ୍ରଦେଶର ଆଜମଗଡ଼ ଆସନରୁ ନିର୍ବାଚନ ଲଢ଼ିବେ ତେବେ ସେ ବିଜୟୀ ହେବାର ୯୯% ସମ୍ଭାବନା ରହିଛି ।
ଟଙ୍କା ଓ ଉପହାର ବଦଳରେ ବ୍ୟବସାୟୀ ଦର୍ଶନ ହିରାନନ୍ଦାନୀଙ୍କ ସହ ମୋଇତ୍ରା ତାଙ୍କ ଲୋକସଭା ଲଗଇନ୍ ଆଇଡି ସେୟାର କରିଥିବା ଅଭିଯୋଗକୁ ନେଇ ଉଭୟ ବିଜେପି ଓ ଟିଏମସି ମୁହାଁମୁହିଁ ହୋଇଛନ୍ତି । ଏହି ମାମଲାର ତଦନ୍ତ ପରେ ଲୋକସଭା ନୈତିକତା କମିଟି ତାଙ୍କୁ ନିମ୍ନ ସଦନରୁ ବହିଷ୍କାର କରିବାକୁ ସୁପାରିସ କରିବା ପରେ କୃଷ୍ଣନଗର ସାଂସଦ ବିବାଦର ସମ୍ମୁଖୀନ ହୋଇଛନ୍ତି । ଦୁବେ ଦାବି କରିଛନ୍ତି ଯେ ମୋଇତ୍ରା କେବଳ ତାଙ୍କ ସରକାରୀ ଲଗଇନ୍ ଆଇଡି ବ୍ୟବସାୟୀଙ୍କ ସହ ସେୟାର କରିନାହାଁନ୍ତି, ବରଂ ଏହା (ଲୋକସଭା ସାଇଟ) ଏକାଧିକ ସ୍ଥାନ- ଦିଲ୍ଲୀ, ବେଙ୍ଗାଲୁରୁ, ସାନଫ୍ରାନ୍ସିସ୍କୋରୁ ଲଗଇନ୍ କରାଯାଇଥିଲା ।
ବିବାଦ ଉପୁଜିବାର କିଛିମାସ ପରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତାଙ୍କର ପ୍ରଥମ ସାର୍ବଜନୀନ ବୟାନ ଦେଇଛନ୍ତି । ସେ ଦାବି କରିଛନ୍ତି ଯେ ମୋଇତ୍ରାଙ୍କୁ ବହିଷ୍କାର କରିବା କେବଳ ସାଧାରଣ ନିର୍ବାଚନ ପୂର୍ବରୁ ତାଙ୍କୁ ଲୋକପ୍ରିୟ କରିବ ।
ସେମାନେ (ବିଜେପି) ମହୁଆଙ୍କୁ ବହିଷ୍କାର କରିବାକୁ ଯୋଜନା କରୁଛନ୍ତି । ଏହା ତାଙ୍କୁ ତିନିମାସ ପାଇଁ ଲୋକପ୍ରିୟ କରାଇବ। ସଂସଦ ଭିତରେ ସେ ଯାହା କହୁଥିଲେ, ବାହାରେ କହିବେ । ସେ ପ୍ରତିଦିନ ସାମ୍ବାଦିକ ସମ୍ମିଳନୀ କରି ବାହାରେ ଭାଷଣ ଦେବେ । ଏଥିରେ କ’ଣ ଫରକ ପଡ଼ିବ ବୋଲି ସେ ପ୍ରଶ୍ନ କରିଛନ୍ତି । ଏହା ପୂର୍ବରୁ ମମତା ବାନାର୍ଜୀ ତୃଣମୂଳ ସାଂସଦଙ୍କୁ କୃଷ୍ଣନଗର (ନଦିଆ ଉତ୍ତର)ର ଜିଲ୍ଲା ସଭାପତିଭାବେ ନିଯୁକ୍ତ କରିଥିଲେ ।
ନୈତିକତା କମିଟିର ରିପୋର୍ଟ ଏବେ ବାଚସ୍ପତି ଓମ୍ ବିର୍ଲାଙ୍କ ପାଖରେ ଅଛି ଯିଏ ଟିଏମସି ସାଂସଦଙ୍କ ଭାଗ୍ୟ ଉପରେ ଚୂଡ଼ାନ୍ତ ନିଷ୍ପତ୍ତି ନେବେ ।