ନୂଆଦିଲ୍ଲୀ: ଅର୍ଥମନ୍ତ୍ରୀ ନିର୍ମଳା ସୀତାରମଣ ସଂସଦରେ ଅନ୍ତରୀଣ ବଜେଟ ଉପସ୍ଥାପନ କରିଛନ୍ତି । ଯୁବବର୍ଗ, କୃଷକ, ମହିଳା ଓ ଗରିବଙ୍କ ଉପରେ ସରକାରଙ୍କ ଫୋକସ ରହିଛି । ଏହି ଚାରିବର୍ଗର ଲୋକମାନେ ପ୍ରାଥମିକତାର ଶୀର୍ଷରେ ଅଛନ୍ତି । ଲୋକସଭା ନିର୍ବାଚନ ପୂର୍ବରୁ ଏହା ଏକ ଅନ୍ତରୀଣ ବଜେଟ ଥିଲା । ପରମ୍ପରାକୁ ଦର୍ଶାଇ ଅର୍ଥମନ୍ତ୍ରୀ ଟିକସ ସମ୍ବନ୍ଧୀୟ କୌଣସି ଘୋଷଣା କରିବାରୁ ଦୂରେଇ ରହିଥିଲେ । କୌଣସି ପ୍ରକାର ପ୍ରତ୍ୟକ୍ଷ ଓ ପରୋକ୍ଷ ଟିକସ ଏବଂ ଆୟକର ସମେତ ଏହାର ସ୍ଲାବରେ କୌଣସି ପରିବର୍ତ୍ତନ ହୋଇନାହିଁ ।
ଅର୍ଥମନ୍ତ୍ରୀ ନିର୍ମଳା ସୀତାରମଣ ଗୁରୁବାର କହିଛନ୍ତି ଯେ ଯୋଗ୍ୟ ମଧ୍ୟବିତ୍ତଙ୍କୁ ନିଜସ୍ୱ ଘର କିଣିବା କିମ୍ବା ନିର୍ମାଣ କରିବା ପାଇଁ ସରକାର ଏକ ଆବାସ ଯୋଜନା ଆରମ୍ଭ କରିବେ । ନିର୍ବାଚନ ପୂର୍ବରୁ ଅନ୍ତରୀଣ ବଜେଟ ଉପସ୍ଥାପନ କରି ସୀତାରମଣ କହିଛନ୍ତି ଯେ ସରକାର ଏକ ଅର୍ଥନୈତିକ ଆଭିମୁଖ୍ୟ ମଧ୍ୟ ଗ୍ରହଣ କରିବେ ଯାହା ସ୍ଥାୟୀ ଅଭିବୃଦ୍ଧି ଏବଂ ଉତ୍ପାଦକତାରେ ଉନ୍ନତି ଆଣିବ । ବଜେଟ ଉପସ୍ଥାପନ କରି ସେ ଏକ କୋଟି ଘରେ ମାସକୁ ୩୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଜୁଳି ସୁନିଶ୍ଚିତ କରିବା ପାଇଁ ‘ରୁଫ୍ ଟପ୍ ସୋଲାରାଇଜେସନ’ ବିଷୟରେ ମଧ୍ୟ ଉଲ୍ଲେଖ କରିଥିଲେ, ଯାହାଦ୍ୱାରା ବାର୍ଷିକ ୧୫,୦୦୦-୧୮,୦୦୦ ଟଙ୍କାର ଘରୋଇ ସଞ୍ଚୟ ହୋଇପାରିବ । ଅର୍ଥମନ୍ତ୍ରୀ କହିଛନ୍ତି ଯେ ବର୍ତ୍ତମାନର ଡାକ୍ତରଖାନା ଭିତ୍ତିଭୂମିକୁ ବ୍ୟବହାର କରି ସରକାର ଅଧିକ ମେଡିକାଲ କଲେଜ ପ୍ରତିଷ୍ଠା କରିବେ । ପୂର୍ବାଞ୍ଚଳ ଓ ଜନସାଧାରଣଙ୍କ ବିକାଶ ଉପରେ ସର୍ବାଧିକ ଗୁରୁତ୍ୱ ଦିଆଯିବ ବୋଲି ସେ କହିଛନ୍ତି ।
- ଉଡାନ ଯୋଜନାରେ ୫୧୭ଟି ନୂଆ ରୁଟ୍ ଯୋଡ଼ାଯିବ ।
- ଟିକସ ରିଟର୍ଣ୍ଣ ପ୍ରକ୍ରିୟା ପାଇଁ ଲାଗୁଥିବା ସମୟ ୨୦୧୪ରେ ୯୩ ଦିନ ଥିବାବେଳେ ଏବେ ୧୦ ଦିନକୁ ହ୍ରାସ, ରିଫଣ୍ଡ ଦ୍ରୁତ ।
- ୨୦୧୪ ପୂର୍ବର ଅର୍ଥନୈତିକ ଅବ୍ୟବସ୍ଥା ନେଇ ଶ୍ୱେତପତ୍ର ଆଣିବେ ସରକାର ।
- କୋଇଲା ଗ୍ୟାସିଫିକେସନ୍ ମାଧ୍ୟମରେ ପ୍ରାକୃତିକ ଗ୍ୟାସ୍ ହ୍ରାସ କରିବାକୁ ସରକାର ଲକ୍ଷ୍ୟ ରଖିଛନ୍ତି ।
- ଲାକ୍ଷାଦ୍ୱୀପ ସମେତ ସମଗ୍ର ଦେଶରେ ପର୍ଯ୍ୟଟନକୁ ପ୍ରୋତ୍ସାହିତ କରିବା ପାଇଁ ଭିତ୍ତିଭୂମି ବିକାଶ ଉପରେ ସରକାର ବିଶେଷ ଧ୍ୟାନ ଦେଉଛନ୍ତି ।
- ଭିତ୍ତିଭୂମି ଖର୍ଚ୍ଚ ୧୧% ବୃଦ୍ଧି ପାଇ ୧୧.୧୧ ଲକ୍ଷ କୋଟି ଟଙ୍କା ହେବ, ଯାହା ଜିଡିପିର ୩.୪ ପ୍ରତିଶତ ।
- ରାଜ୍ୟଗୁଡ଼ିକର ବିକାଶ ପାଇଁ ୭୫ ହଜାର କୋଟି ଟଙ୍କାର ସୁଧମୁକ୍ତ ଋଣ ବ୍ୟବସ୍ଥା ।
- ଚଳିତ ଆର୍ଥିକ ବର୍ଷରେ ବିତ୍ତୀୟ ନିଅଣ୍ଟ ୫.୮ ପ୍ରତିଶତ ରହିବ ବୋଲି ଆକଳନ କରାଯାଇଥିବାବେଳେ ଆସନ୍ତା ଆର୍ଥିକ ବର୍ଷରେ ଏହାକୁ ୫.୧ ପ୍ରତିଶତକୁ ହ୍ରାସ କରିବାକୁ ଲକ୍ଷ୍ୟ ରଖାଯାଇଛି ।
- ୨୦୨୩-୨୪ ପାଇଁ ଋଣକୁ ବାଦ୍ ଦେଲେ ସମୁଦାୟ ଆୟ ୨୭.୫୬ ଲକ୍ଷ କୋଟି ଟଙ୍କାର ସଂଶୋଧିତ ଆକଳନ ।
- ନିଟ୍ ଶୂନ୍ୟ କାର୍ବନ ନିର୍ଗମନ ପାଇଁ ୧ ଗିଗାୱାଟ୍ ଉପକୂଳ ପବନ ଶକ୍ତି କ୍ଷମତା ପାଇଁ ପ୍ରକଳ୍ପର ଫଳପ୍ରଦତା ପାଇଁ ଅର୍ଥ ପ୍ରଦାନ କରାଯିବ ।
ଆୟୁଷ୍ମାନ ଭାରତ ଅଧୀନରେ ଅନ୍ତର୍ଭୁକ୍ତ ସମସ୍ତ ଆଶା ଓ ଅଙ୍ଗନୱାଡ଼ି କର୍ମୀ
ଆୟୁଷ୍ମାନ ଭାରତ ଅଧୀନରେ ସମସ୍ତ ଆଶା ଓ ଅଙ୍ଗନୱାଡି କର୍ମୀଙ୍କୁ ସ୍ୱାସ୍ଥ୍ୟ ସେବା ପରିସରଭୁକ୍ତ କରିବାକୁ ଅର୍ଥମନ୍ତ୍ରୀ ଘୋଷଣା କରିଛନ୍ତି । ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା (ଏବି-ପିଏମଜେଏୱାଇ) ହେଉଛି ବିଶ୍ୱର ସର୍ବବୃହତ ସରକାରୀ ଅନୁଦାନପ୍ରାପ୍ତ ସ୍ୱାସ୍ଥ୍ୟ ବୀମା ଯୋଜନା ଯାହା ଦ୍ୱିତୀୟ ଏବଂ ତୃତୀୟ ସ୍ତରୀୟ ଚିକିତ୍ସା ଡାକ୍ତରଖାନାରେ ଭର୍ତ୍ତି ହେବା ପାଇଁ ପ୍ରତି ପରିବାର ପିଛା ବାର୍ଷିକ ୫ ଲକ୍ଷ ଟଙ୍କାର ବୀମା ପ୍ରଦାନ କରେ । ଗତବର୍ଷ ଡିସେମ୍ବର ୨୭ ସୁଦ୍ଧା ଏହି ଯୋଜନାରେ ୧୨ କୋଟି ପରିବାର ଓ ପ୍ରାୟ ୫୫ କୋଟି ଲୋକ ସାମିଲ ହୋଇଥିଲେ । ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ (ଏମଏସଏମଇ)କୁ ପର୍ଯ୍ୟାପ୍ତ ଏବଂ ଠିକ୍ ସମୟରେ ଆର୍ଥିକ ସହାୟତା ପ୍ରଦାନ କରିବା ସରକାରଙ୍କ ପ୍ରାଥମିକତା ।
ପିଏମ୍ କିଷାନ ସମ୍ମାନ ନିଧି ଅଧୀନରେ ୧୧.୮ କୋଟି କୃଷକ ଉପକୃତ
ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ ପିଏମ କିଷାନ ଯୋଜନାରେ ୧୧.୮ କୋଟି କୃଷକଙ୍କୁ ଆର୍ଥିକ ସହାୟତା ପ୍ରଦାନ କରାଯାଇଛି । ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି (ପିଏମ-କିଷାନ) ବିଶ୍ୱର ସର୍ବବୃହତ ପ୍ରତ୍ୟକ୍ଷ ଲାଭ ହସ୍ତାନ୍ତର (ଡିବିଟି) ଯୋଜନା ମଧ୍ୟରୁ ଅନ୍ୟତମ । ପିଏମ୍ କିଷାନ ଯୋଜନାରେ ସରକାର ତିନିଟି ସମାନ ମାସିକ କିସ୍ତିରେ ବାର୍ଷିକ ୬,୦୦୦ ଟଙ୍କାର ଆର୍ଥିକ ଲାଭ ପ୍ରଦାନ କରନ୍ତି । ଏହି ଟଙ୍କା ‘ଡିବିଟି’ ଜରିଆରେ ସାରାଦେଶର କୃଷକ ପରିବାରର ବ୍ୟାଙ୍କ ଆକାଉଣ୍ଟରେ ଜମା କରାଯାଇଥାଏ । ଫେବୃଆରୀ ୨୦୧୯ରେ ଅନ୍ତରୀଣ ବଜେଟରେ ଏହା ଘୋଷଣା କରାଯାଇଥିଲା ।
ରୁଫ୍ ଟପ୍ ସୋଲାର ପ୍ରୋଜେକ୍ଟରେ ୧ କୋଟି ପରିବାରକୁ ମାସକୁ ୩୦୦ ୟୁନିଟ୍ ବିଜୁଳି ଯୋଗାଇ ଦିଆଯିବ: ସୀତାରମଣ
ଅର୍ଥମନ୍ତ୍ରୀ ନିର୍ମଳା ସୀତାରମଣ ଗୁରୁବାର କହିଛନ୍ତି ଯେ ଦେଶରେ ୮୦ କୋଟି ଲୋକଙ୍କୁ ମାଗଣା ରାସନ ମିଳିବା ପରେ ସେମାନଙ୍କଖାଦ୍ୟ କୁ ନେଇ ଚିନ୍ତା ଦୂର ହୋଇଛି। ଲୋକସଭାରେ ଅନ୍ତରୀଣ ବଜେଟ୍ ଉପସ୍ଥାପନ କରି ସେ କହିଛନ୍ତି ଯେ ୨୦୧୪ରେ ମୋଦି ସରକାର କ୍ଷମତାକୁ ଆସିବା ପରେ ଭାରତ ବଡ଼ ଚ୍ୟାଲେଞ୍ଜର ସମ୍ମୁଖୀନ ହେଉଥିଲା ଏବଂ ଆହ୍ୱାନକୁ ସଠିକ ଭାବେ ଅତିକ୍ରମ କରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗତ ବର୍ଷ ନଭେମ୍ବରରେ ଘୋଷଣା କରିଥିଲେ ଯେ ତାଙ୍କ ସରକାର ଗରିବ ଲୋକଙ୍କ ପାଇଁ ମାଗଣା ରାସନ ଯୋଜନାକୁ ଆଉ ୫ ବର୍ଷ ପାଇଁ ବୃଦ୍ଧି କରିବେ।
- କୃଷି ଜଳବାୟୁ ଅଞ୍ଚଳରେ ବିଭିନ୍ନ ଫସଲରେ ନାନୋ ୟୁରିଆ ବ୍ୟବହାର କରାଯିବ ।
- ଭଡ଼ା ଘର, ବସ୍ତି ଓ ଚାଳରେ ରହୁଥିବା ମଧ୍ୟବିତ୍ତଙ୍କ ପାଇଁ ସରକାର ସ୍ୱତନ୍ତ୍ର ଆବାସ ଯୋଜନା ଆଣିବେ ।
- ଜିଲ୍ଲାରେ ଡାକ୍ତରଖାନାଗୁଡ଼ିକୁ ମେଡ଼ିକାଲ କଲେଜରେ ପରିଣତ କରିବା ପାଇଁ କମିଟି ଗଠନ କରାଯିବ ।
- ଗ୍ରାମୀଣ ଆବାସ ଯୋଜନା ଅଧୀନରେ ଆମେ ୩ କୋଟି ଲକ୍ଷ୍ୟ ହାସଲ କରିବାର ନିକଟତର ହୋଇଛୁ; ଆସନ୍ତା ୫ ବର୍ଷରେ ୨ କୋଟିରୁ ଅଧିକ ଘର ନିର୍ମାଣ ହେବ ।
- କୋଭିଡ୍-୧୯ ମହାମାରୀର ଆହ୍ୱାନକୁ ଅତିକ୍ରମ କରି ଆତ୍ମନିର୍ଭର ଭାରତ ପାଇଁ ଭିତ୍ତିପ୍ରସ୍ତର ସ୍ଥାପନ କଲା ଦେଶ ।
- ୨୦୪୭ ସୁଦ୍ଧା ବିକଶିତ ଭାରତ ପାଇଁ କାମ କରୁଥିବା ‘ଅମୃତକାଳ’ର ମଜଭୁତ ଭିତ୍ତିପ୍ରସ୍ତର ସ୍ଥାପନ କରିଛନ୍ତି ପଞ୍ଚ ପ୍ରାଣ ।
- ପିଏମ-ସ୍ୱନିଧି, ପିଏମ ବିଶ୍ୱକର୍ମା ଯୋଜନାରେ ୭୮ ଲକ୍ଷ ଷ୍ଟ୍ରିଟ୍ ଭେଣ୍ଡର ଉପକୃତ ହୋଇଛନ୍ତି ।
- ମାଗଣା ରାସନ ୮୦ କୋଟି ଲୋକଙ୍କ ଖାଦ୍ୟ ଚିନ୍ତା ଦୂର କରିଛି: ସୀତାରମଣ
- ସ୍କିଲ୍ ଇଣ୍ଡିଆ ମିଶନରେ ଦେଶର ୧.୪ କୋଟି ଯୁବକ ଉପକୃତ ହୋଇଛନ୍ତି: ସୀତାରମଣ
- ଜନଧନ ଆକାଉଣ୍ଟ ଜରିଆରେ ସିଧାସଳଖ ଲାଭ ହସ୍ତାନ୍ତର ୩୪ ଲକ୍ଷ କୋଟି ଟଙ୍କା ଟ୍ରାନ୍ସଫର, ୨.୭ ଲକ୍ଷ କୋଟି ଟଙ୍କା ସଞ୍ଚୟ: ସୀତାରମଣ
- ଆଗାମୀ ୫ ବର୍ଷ ଦେଶ ପାଇଁ ଅଭୂତପୂର୍ବ ବିକାଶର ସମୟ ହେବ ଏବଂ ଏକ ବିକଶିତ ଭାରତର ମାର୍ଗ ପ୍ରଶସ୍ତ ହେବ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ।
- ନିଆଯାଇଥିବା ସଂସ୍କାର ଆଗାମୀ ୫ ବର୍ଷରେ ଅଭୂତପୂର୍ବ ଅଭିବୃଦ୍ଧି ଆଣିବ ।
- କୋଭିଡ଼ ମହାମାରୀ ସତ୍ତ୍ୱେ ପ୍ରଧାନମନ୍ତ୍ରୀ ଆବାସ ଯୋଜନା (ଗ୍ରାମୀଣ) ଅଧୀନରେ ୩ କୋଟି ଘର, ପରିବାରକୁ ୨ କୋଟି ନୂଆ ଘର ଦିଆଯିବ ।
- ୧୦ ବର୍ଷରେ ୨୫୦ ନିୟୁତ ଲୋକ ବହୁମୁଖୀ ଦାରିଦ୍ର୍ୟରୁ ମୁକ୍ତି ପାଇଛନ୍ତି ।
- ଦେଶରେ ୧୦ ବର୍ଷରେ ୨୫ କୋଟି ଲୋକଙ୍କୁ ଦାରିଦ୍ର୍ୟମୁକ୍ତ କରାଯାଇଛି, ସରକାର ଗରିବଙ୍କୁ ସଶକ୍ତ କରୁଛନ୍ତି ।
- ୨୦୧୪ରେ ମୋଦି ସରକାର କ୍ଷମତାକୁ ଆସିବା ପରେ ଭାରତ ବଡ଼ ଚ୍ୟାଲେଞ୍ଜର ସମ୍ମୁଖୀନ ହେଉଥିଲା । ସରକାର ପ୍ରକୃତରେ ସେମାନଙ୍କୁ ଦୂର କରିଛନ୍ତି ।
ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ ଗତ ୧୦ ବର୍ଷ ମଧ୍ୟରେ ୨୫ କୋଟି ଲୋକଙ୍କୁ ବହୁମୁଖୀ ଦାରିଦ୍ର୍ୟରୁ ମୁକ୍ତ କରାଯାଇଛି । ଲୋକସଭାରେ ଅନ୍ତରୀଣ ବଜେଟ ଉପସ୍ଥାପନ କରି ସେ କହିଛନ୍ତି ଯେ ଦାରିଦ୍ର୍ୟ ମୁକାବିଲା ଦିଗରେ ପୂର୍ବ ସରକାରମାନଙ୍କର ଆଭିମୁଖ୍ୟ ଖୁବ୍ କମ୍ ଫଳପ୍ରଦ ହୋଇଛି । ସୀତାରମଣ କହିଛନ୍ତି ଯେ ବର୍ତ୍ତମାନ ସ୍ୱଚ୍ଛତା ଆଧାରରେ ସମସ୍ତ ଯୋଗ୍ୟ ନାଗରିକଙ୍କୁ ଲାଭ ହସ୍ତାନ୍ତର କରାଯାଉଛି । ସେ କହିଥିଲେ ଯେ ଜାତୀୟ ଶିକ୍ଷା ନୀତି ମାଧ୍ୟମରେ ପରିବର୍ତନମୂଳକ ସଂସ୍କାର ଅଣାଯାଉଛି ।
ପ୍ରଧାନମନ୍ତ୍ରୀ ମୁଦ୍ରା ଯୋଜନାରେ ୨୨.୫ ଲକ୍ଷ କୋଟି ଟଙ୍କାର ଋଣ ଦିଆଯାଇଛି
ଅନ୍ତରୀଣ ବଜେଟ ଉପସ୍ଥାପନ କରି ଅର୍ଥମନ୍ତ୍ରୀ କହିଛନ୍ତି ଯେ ପ୍ରଧାନମନ୍ତ୍ରୀ ମୁଦ୍ରା ଯୋଜନାରେ ସରକାର ମୋଟ ୨୨.୫ ଲକ୍ଷ କୋଟି ଟଙ୍କାର ୪୩ କୋଟି ଋଣ ଦେଇଛନ୍ତି । ସୀତାରମଣ ତାଙ୍କ ନିର୍ବାଚନ ପୂର୍ବ ବଜେଟରେ କହିଥିଲେ ଯେ ଜନଧନ ଆକାଉଣ୍ଟ ମାଧ୍ୟମରେ ୩୪ ଲକ୍ଷ କୋଟି ଟଙ୍କାର ସିଧାସଳଖ ଲାଭ ହସ୍ତାନ୍ତର ୨.୭ ଲକ୍ଷ କୋଟି ଟଙ୍କା ସଞ୍ଚୟ କରିଛି । ଅର୍ଥମନ୍ତ୍ରୀ କହିଛନ୍ତି ଯେ ଗତ ୧୦ ବର୍ଷ ମଧ୍ୟରେ ମହିଳାମାନଙ୍କୁ ୩୦ କୋଟି ମୁଦ୍ରା ଯୋଜନା ଋଣ ଦିଆଯାଇଛି । ସେ କହିଥିଲେ ଯେ ସମସ୍ତ ଯୋଗ୍ୟ ଲୋକଙ୍କୁ ଦଳରେ ଆଣିବା ଲକ୍ଷ୍ୟ ସାମାଜିକ ନ୍ୟାୟର ଏକ ପ୍ରକୃତ ଏବଂ ବ୍ୟାପକ ଉପଲବ୍ଧି ଏବଂ ଏହା ହେଉଛି ସକ୍ରିୟ ଧର୍ମନିରପେକ୍ଷତା । ଅର୍ଥମନ୍ତ୍ରୀ କହିଛନ୍ତି ଯେ ୨୦୧୦ରେ ୨୦ ଜଣ ଚେସ୍ ଗ୍ରାଣ୍ଡମାଷ୍ଟର ଥିବାବେଳେ ଆଜି ଭାରତରେ ୮୦ ଜଣ ଚେସ୍ ଗ୍ରାଣ୍ଡମାଷ୍ଟର ଅଛନ୍ତି ।
ଅର୍ଥନୀତିରେ ସକାରାତ୍ମକ ପରିବର୍ତ୍ତନ
ଅର୍ଥମନ୍ତ୍ରୀ ନିର୍ମଳା ସୀତାରମଣ ଅନ୍ତରୀଣ ବଜେଟ ଉପସ୍ଥାପନ କରି କହିଛନ୍ତି ଯେ ଗତ ୧୦ ବର୍ଷ ମଧ୍ୟରେ ଭାରତୀୟ ଅର୍ଥନୀତିରେ ଗଭୀର ସକାରାତ୍ମକ ପରିବର୍ତ୍ତନ ଦେଖିବାକୁ ମିଳିଛି । ନିର୍ବାଚନ ପୂର୍ବ ବଜେଟରେ ସେ କହିଛନ୍ତି ଯେ ଭାରତବାସୀ ଆଶା ଓ ବିକଳ୍ପ ସହିତ ଭବିଷ୍ୟତକୁ ଚାହୁଁଛନ୍ତି । ସେ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସରକାର ଅନ୍ତର୍ଭୁକ୍ତୀକରଣର ସମସ୍ତ ଦିଗ ପ୍ରତି ଧ୍ୟାନ ଦେଇଛନ୍ତି । ଅର୍ଥମନ୍ତ୍ରୀ କହିଛନ୍ତି ଯେ ଢାଞ୍ଚାଗତ ସଂସ୍କାର, ଲୋକାଭିମୁଖୀ କାର୍ଯ୍ୟକ୍ରମ ଏବଂ ନିଯୁକ୍ତି ସୁଯୋଗ ଅର୍ଥନୀତିକୁ ନୂତନ ଶକ୍ତି ପ୍ରଦାନ କରିବାରେ ସହାୟକ ହୋଇଛି । ୨୦୨୦-୨୧ ଆର୍ଥିକ ବର୍ଷରେ ଅର୍ଥନୀତି ୫.୮ ପ୍ରତିଶତ ହ୍ରାସ ପାଇବା ପରେ ୨୦୨୧-୨୨ରେ ଆମେ ୯.୧ ପ୍ରତିଶତ ଅଭିବୃଦ୍ଧି ହାସଲ କରିଥିଲୁ। ଅର୍ଥ ମନ୍ତ୍ରାଳୟ ଏହାର ସଦ୍ୟତମ ମାସିକ ଅର୍ଥନୈତିକ ସମୀକ୍ଷାରେ କହିଛି ଯେ ଭାରତୀୟ ଅର୍ଥନୀତି ବର୍ତ୍ତମାନର ୩.୭ ଟ୍ରିଲିୟନ ଡଲାରରୁ ୫ ଟ୍ରିଲିୟନ ଡଲାର ଜିଡିପି ସହିତ ଆଗାମୀ ତିନି ବର୍ଷ ମଧ୍ୟରେ ବିଶ୍ୱର ତୃତୀୟ ବୃହତ୍ତମ ଅର୍ଥନୀତିରେ ପରିଣତ ହେବାର ସମ୍ଭାବନା ରହିଛି । ଆଗାମୀ ୬ରୁ ୭ ବର୍ଷ ମଧ୍ୟରେ (୨୦୩୦ ସୁଦ୍ଧା) ଭାରତ ୭ ଟ୍ରିଲିୟନ ଡଲାର ଅର୍ଥନୀତିରେ ପରିଣତ ହେବବୋଲି ଏଥିରେ କୁହାଯାଇଛି ।
ଜିଡିପିର ନୂଆ ଅର୍ଥ
ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ ସରକାର ଜିଡିପିକୁ ‘ଗଭର୍ଣ୍ଣାନ୍ସ, ଡେଭଲପମେଣ୍ଟ ଏବଂ ପରଫରମାନ୍ସ’ର ଅର୍ଥ ଦେଇଛନ୍ତି । ସାମଗ୍ରିକ ଅଭିବୃଦ୍ଧି ଉପରେ ବିଶେଷ ଧ୍ୟାନ ଦିଆଯାଇଛି ।
ଚାରିଟି ‘ଜାତି’ ଉପରେ ଧ୍ୟାନ
ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ ଆମକୁ ଗରିବ, ମହିଳା, ଯୁବକ ଏବଂ କୃଷକ ଅର୍ଥାତ ଅନ୍ନଦାତା ଉପରେ ଧ୍ୟାନ ଦେବାକୁ ପଡ଼ିବ । ସେମାନଙ୍କ ଆକାଂକ୍ଷା ଓ କଲ୍ୟାଣ ଆମର ସବୁଠାରୁ ବଡ଼ ପ୍ରାଥମିକତା । ଏହି ୪ ଜାତିଙ୍କୁ ମିଳିବ ସରକାରଙ୍କ ସମର୍ଥନ, ଦେଶ ସେମାନଙ୍କ ସଶକ୍ତୀକରଣ ସହ ଆଗକୁ ବଢ଼ିବ । ପ୍ରଧାନମନ୍ତ୍ରୀ ମୋଦୀ ସେମାନଙ୍କୁ ୪ଟି ଜାତି ବୋଲି ବର୍ଣ୍ଣନା କରିଛନ୍ତି ଯାହା ଉପରେ ସରକାର ଧ୍ୟାନ ଦେଉଛନ୍ତି ।
୧୦ ବର୍ଷରେ ଭାରତୀୟ ଅର୍ଥନୀତିରେ ଅଭୂତପୂର୍ବ ପରିବର୍ତ୍ତନ
ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି, ଗତ ୧୦ ବର୍ଷ ମଧ୍ୟରେ ଭାରତୀୟ ଅର୍ଥନୀତିରେ ଅଭୂତପୂର୍ବ ପରିବର୍ତ୍ତନ ଆସିଛି । ୨୦୧୪ରେ ଦେଶ ବିପୁଳ ଆହ୍ୱାନର ସମ୍ମୁଖୀନ ହେଉଥିଲା, ସରକାର ସେହି ଆହ୍ୱାନକୁ ଅତିକ୍ରମ କରି ଢାଞ୍ଚାଗତ ସଂସ୍କାର ଆଣିଥିଲେ, ଲୋକାଭିମୁଖୀ ସଂସ୍କାର କରାଯାଇଥିଲା ।
ଦହି ଚିନି ପରମ୍ପରା
ଧାରଣତଃ କୌଣସି ଶୁଭ କାମ କରିବାକୁ ଯିବା ବେଳେ ଘରର ମୁରବୀ ମହିଳା ତାଙ୍କୁ ଦହି ଚିନି ଖାଇବାକୁ ଦିଅନ୍ତି। ବିଶ୍ବାସ ରହିଛି ଦହିଚିନି ଖାଇବାକୁ ଦେଲେ ସମସ୍ତ କାର୍ଯ୍ୟ ସଫଳ ବା ଶୁଭ ହୋଇଥାଏ। ଦହି ସ୍ବଚ୍ଛତା ଏବଂ ଚିନି ମଧୁରତାର ପ୍ରତୀକ ଭାବେ ବିବେଚନା କରାଯାଏ। ପିଲାମାନେ ପରୀକ୍ଷା ଦେବାକୁ ଯିବା ବେଳେ ଘରର ବୟସ୍କ ମହିଳା ଏହିପରି ଦହିଚିନି ଖାଇବାକୁ ଦେଇ ଆର୍ଶିବାଦ କରିଥାନ୍ତି।
ଠିକ ସେହିପରି ନିର୍ମଳା ସୀତାରମଣ ସଂସଦରେ ବଜେଟ ଉପସ୍ଥାପନ କରିବା ପୂର୍ବରୁ ରାଷ୍ଟ୍ରପତି ତାଙ୍କୁ ଦହି ଚିନି ଖାଇବାକୁ ଦେଇ ଶୁଭେଚ୍ଛା ଜଣାଇଥିଲେ। ସୀତାରମଣଙ୍କୁ ଦହି ଖୁଆଥିବା ଫଟୋ ରାଷ୍ଟ୍ରପତି ତାଙ୍କ ସାମାଜିକ ଗଣମାଧ୍ୟମରେ ଦେବା ପରେ ତାହା ବେଶ୍ ଭାଇରାଲ ହେବାରେ ଲାଗିଛି। ଏପରିକି ଏହି ଫଟୋକୁ ବହୁଳ ଭାବେ ସେୟାର ମଧ୍ୟ କରାଯାଉଥିବାର ଦେଖିବାକୁ ମିଳିଛି ।