- ଡିସେମ୍ବରରେ ବିଜେପି ସାଂସଦଙ୍କ ମୂଲ୍ୟାୟନ
- ଏଥର ଆବଶ୍ୟକତା ଅନୁଯାୟୀ ପ୍ରାର୍ଥୀ ଚୟନ
ନୂଆଦିଲ୍ଲୀ : ଆସନ୍ତା ଲୋକସଭା ନିର୍ବାଚନ ପାଇଁ ବିଜେପି ନିଜର ସମ୍ଭାବ୍ୟ ପ୍ରାର୍ଥୀ ଚୟନ ପ୍ରକ୍ରିୟା ଆରମ୍ଭ କରିଛି । ଜାତିଗତ ଜନଗଣନା ଓ ଗୋଷ୍ଠୀ ସଂରକ୍ଷଣ ଦାବି ମଧ୍ୟରେ ରାଜନୈତିକ ସମୀକରଣ ନୂଆ ମୋଡ଼ ନେଉଥିବାରୁ ଏଥର ପ୍ରତ୍ୟେକ ରାଜ୍ୟର ଭିନ୍ନ ଭିନ୍ନ ରାଜନୈତିକ ଆବଶ୍ୟକତା ଅନୁଯାୟୀ ପ୍ରାର୍ଥୀ ଚୟନ କରାଯିବ।
ଏଥର ମଧ୍ୟ ଦଳ ବିଜୟର ଅଧିକ ସମ୍ଭାବନା ଥିବା ‘ଏ ବର୍ଗ’ର ଆସନରେ ପ୍ରାର୍ଥୀ ପରିବର୍ତ୍ତନ କରିବାର ସମ୍ଭାବନା ରହିଛି । ମିଳିଥିବା ସୂଚନା ଅନୁଯାୟୀ, ଲୋକସଭା ନିର୍ବାଚନ ପାଇଁ ସମ୍ଭାବ୍ୟ ପ୍ରାର୍ଥୀଙ୍କ ତାଲିକା ପ୍ରସ୍ତୁତ କରିବା ପାଇଁ ବିଜେପି ତିନିଜଣିଆ କମିଟି ଗଠନ କରିଛି ।
ଏହି କମିଟି ବୟସ, ବିଜୟ ସମ୍ଭାବନା, ପ୍ରାର୍ଥୀଙ୍କ ଜାତି, ଲୋକସଭା ନିର୍ବାଚନମଣ୍ଡଳୀର ବିକାଶ, ଆସନ ସମସ୍ୟା ଏବଂ ପ୍ରମୁଖ ବିରୋଧୀ ଦଳର ସମ୍ଭାବ୍ୟ ପ୍ରାର୍ଥୀଙ୍କ ପ୍ରୋଫାଇଲ୍ ପ୍ରସ୍ତୁତ କରୁଛି ।
ସାଧାରଣ ନିର୍ବାଚନ ଘୋଷଣା ପୂର୍ବରୁ ପ୍ରାର୍ଥୀ ତାଲିକା ସ୍ଥିର ହୋଇପାରେ
ଦଳର ଜଣେ ବରିଷ୍ଠ ସଦସ୍ୟ କହିଛନ୍ତି ଯେ ଯେପରି ୫ଟି ରାଜ୍ୟରେ ନିର୍ବାଚନ ଘୋଷଣା ପୂର୍ବରୁ କିଛି ଆସନ ପାଇଁ ପ୍ରାର୍ଥୀଙ୍କ ନାମ ଚୂଡ଼ାନ୍ତ ହୋଇଥିଲା, ସେହିଭଳି ଲୋକସଭା ନିର୍ବାଚନ ଘୋଷଣା ହେବା ପୂର୍ବରୁ କିଛି ଆସନ ପାଇଁ ପ୍ରାର୍ଥୀ ଚୟନ କରାଯାଇ ଘୋଷଣା କରାଯାଇପାରିବ ।
ଗତ ଲୋକସଭା ନିର୍ବାଚନ ତୁଳନାରେ ବିଜେପି ଅଧିକ ଆସନ ଜିତିବା ପାଇଁ ସମ୍ଭାବ୍ୟ ପ୍ରାର୍ଥୀଙ୍କ ବ୍ୟତୀତ ଲୋକସଭା ଆସନର ସ୍କ୍ରିନିଂ ଜରୁରୀ ଥିବାରୁ ଦଳ ପକ୍ଷରୁ ଏହି କାର୍ଯ୍ୟ ଆରମ୍ଭ ହୋଇଛି ।
ଯେଉଁଠି ଜାତି ସଂଖ୍ୟା ଅଧିକ, ସେଠାରେ ସେହି ଜାତିର ପ୍ରାର୍ଥୀ
ଦଳର ଜଣେ ବରିଷ୍ଠ ନେତା କହିଛନ୍ତି ଯେ ବିହାର ଓ ଉତ୍ତରପ୍ରଦେଶରେ ଜାତିଗତ ଜନଗଣନା ଦାବି ଯୋଗୁଁ ଆଗାମୀ ଦିନରେ ଆସନଗୁଡ଼ିକର ଜାତିଗତ ସମୀକରଣ ପ୍ରଭାବିତ ହୋଇପାରେ । ଯଦି ଓବିସି ଅଧ୍ୟୁଷିତ ଆସନରେ ଅନ୍ୟଜାତିର ବର୍ତ୍ତମାନ ସାଂସଦ ଅଛନ୍ତି ତେବେ ଆଗାମୀ ଲୋକସଭା ନିର୍ବାଚନରେ ତାଙ୍କ ଆସନ ପରିବର୍ତ୍ତନ ହୋଇପାରେ ।
ଡିସେମ୍ବର ଦ୍ୱିତୀୟ ସପ୍ତାହରୁ ମୂଲ୍ୟାୟନ ଓ ସମୀକ୍ଷା
ରାଜ୍ୟ ଦାୟିତ୍ୱରେ ଥିବା ସାଧାରଣ ସମ୍ପାଦକ, ରାଜ୍ୟର ସାଂଗଠନିକ ସାଧାରଣ ସମ୍ପାଦକ ଓ ମୁଖ୍ୟମନ୍ତ୍ରୀଙ୍କ ମତାମତକୁ ଆଧାର କରି ବିଜେପି ଆସନଗୁଡ଼ିକର ମୂଲ୍ୟାୟନ କରୁଛି । ଡିସେମ୍ବର ଦ୍ୱିତୀୟ ସପ୍ତାହରୁ ବର୍ତ୍ତମାନର ସାଂସଦମାନେ କରିଥିବା ଉନ୍ନୟନମୂଳକ କାର୍ଯ୍ୟର ସମୀକ୍ଷା କାର୍ଯ୍ୟ ଆରମ୍ଭ କରିବାକୁ ଯୋଜନା ରହିଛି । ପ୍ରାର୍ଥୀ ଚୟନ ପ୍ରକ୍ରିୟାରେ ବିଜେପିର ସହଯୋଗୀ ଦଳର ସମ୍ଭାବ୍ୟ ପ୍ରାର୍ଥୀଙ୍କୁ ମଧ୍ୟ ବିଚାରକୁ ନିଆଯିବ ।