Home Blog Page 59

рм░рм╛рм╣рнБрм▓ рмЧрм╛рмирнНрмзрм┐ рмЖрморнЗрмерм┐рм░рнБ рм▓рнЛрмХрм╕рмнрм╛ рмирм┐рм░рнНрммрм╛рмЪрми рм▓рмврм╝рм┐рммрнЗ: рнЯрнБрмкрм┐ рмХрмВрмЧрнНрм░рнЗрм╕ рморнБрмЦрнНрнЯ рмЕрмЬрнЯ рм░рм╛рнЯ

рмирнВрмЖрмжрм┐рм▓рнНрм▓рнА: рмХрмВрмЧрнНрм░рнЗрм╕рм░ рммрм░рм┐рм╖рнНрма рмирнЗрмдрм╛ рм░рм╛рм╣рнБрм▓ рмЧрм╛рмирнНрмзрм┐ рнирнжрнирнк рм▓рнЛрмХрм╕рмнрм╛ рмирм┐рм░рнНрммрм╛рмЪрмирм░рнЗ рмЖрморнЗрмерм┐рм░рнБ рмирм┐рм░рнНрммрм╛рмЪрми рм▓рмврм╝рм┐рммрнЗ ред рмЙрмдрнНрмдрм░рмкрнНрм░рмжрнЗрм╢ рмХрмВрмЧрнНрм░рнЗрм╕ рм╕рмнрм╛рмкрмдрм┐ рмЕрмЬрнЯ рм░рм╛рнЯ рмХрм╣рм┐рмЫрмирнНрмдрм┐ рмпрнЗ рмЧрм╛рмирнНрмзрнА рмкрм░рм┐рммрм╛рм░ рмЖрморнЗрмарм┐рммрм╛рм╕рнАрмЩрнНрмХ рмкрм╛рмЗрмБ рмирм┐рм░рмирнНрмдрм░ рмХрмарм┐рми рмкрм░рм┐рм╢рнНрм░рмо рмХрм░рнБрмЫрмирнНрмдрм┐ ред рм░рм╛рм╣рнБрм▓ рмЧрм╛рмирнНрмзрм┐ рмирм┐рм╢рнНрмЪрм┐рмдрмнрм╛рммрнЗ рмПрм╣рм┐ рмЖрм╕рмирм░рнБ рнирнжрнирнк рм▓рнЛрмХрм╕рмнрм╛ рмирм┐рм░рнНрммрм╛рмЪрми рм▓рмврм╝рм┐рммрнЗ ред рм░рм╛рм╣рнБрм▓ рмЖрморнЗрмарм┐ рмЖрм╕рмирм░рнЗ рммрм┐рмЬрнЗрмкрм┐ рмкрнНрм░рм╛рм░рнНрмернА рм╕рнНрморнГрмдрм┐ рмЗрм░рм╛рмирнАрмЩрнНрмХрмарм╛рм░рнБ рнирнжрнзрнп рмирм┐рм░рнНрммрм╛рмЪрмирм░рнЗ рм╣рм╛рм░рм┐рмпрм╛рмЗрмерм┐рм▓рнЗ ред

рмдрнЗрммрнЗ рм╕рнЗ рмХрнЗрм░рм│рм░ рн▒рм╛рнЯрмирм╛рмб рмЖрм╕рмирм░рнБ рммрм┐рмкрнБрм│ рммрнНрнЯрммрмзрм╛рмирм░рнЗ рммрм┐рмЬрнЯрнА рм╣рнЛрмЗрмерм┐рм▓рнЗ ред рмжрнНрн▒рм┐рмдрнАрнЯ рмерм░ рмкрм╛рмЗрмБ рм░рм╛рм╣рнБрм▓ рмЧрм╛рмирнНрмзрм┐ рмдрм╛рмЩрнНрмХ рмкрнБрм░рнБрмгрм╛ рмЧрмбрм╝ рмЖрморнЗрмарм┐рмХрнБ рмлрнЗрм░рм┐рммрм╛рм░ рм╕рморнНрмнрм╛рммрмирм╛ рммрм┐рм╖рнЯрм░рнЗ рм░рм╛рнЯ рмХрм╣рм┐рмЫрмирнНрмдрм┐ ред рм░рм╛рмо рмормирнНрмжрм┐рм░ рмЙрмжрнНтАНрмШрм╛рмЯрмирмХрнБ рмПрмХ рм░рм╛рмЬрмирнИрмдрм┐рмХ рмХрм╛рм░рнНрмпрнНрнЯрмХрнНрм░рморм░рнЗ рмкрм░рм┐рмгрмд рмХрм░рм┐рммрм╛ рмкрм╛рмЗрмБ рммрм┐рмЬрнЗрмкрм┐рмХрнБ рмЕрмирнНрнЯ рмХрмВрмЧрнНрм░рнЗрм╕ рмирнЗрмдрм╛рмЩрнНрмХ рм╕рм╣ рм╢рнНрм░рнА рм░рм╛рнЯ рм╕рморм╛рм▓рнЛрмЪрмирм╛ рмХрм░рм┐рмЫрмирнНрмдрм┐ ред рм░рм╛рмо рмормирнНрмжрм┐рм░ рмирм┐рм░рнНрморм╛рмг рмПрмХ рмЖрм╕рнНрмерм╛рм░ рммрм┐рм╖рнЯ рммрнЛрм▓рм┐ рм╕рнЗ рмХрм╣рм┐рмЫрмирнНрмдрм┐ ред рмирм┐рм░рнНрммрм╛рмЪрмирнА рммрм░рнНрм╖рм░рнЗ рм▓рнЛрмХрмЩрнНрмХрнБ рммрнЛрмХрм╛ рммрмирм╛рмЗрммрм╛ рмкрм╛рмЗрмБ рммрм┐рмЬрнЗрмкрм┐ рмПрм╕рммрнБ рмХрм░рнБрмЫрм┐ ред

рмормгрм┐рмкрнБрм░ рмЬрм╛рмдрм┐рмЧрмд рм╣рм┐рмВрм╕рм╛ тАШрм░рм╛рмЬрмирнИрмдрм┐рмХ рм╕рморм╕рнНрнЯрм╛тАЩ: рм▓рнЗрмлрнНрмЯрмирм╛рмгрнНрмЯ рмЬрнЗрмирнЗрм░рм╛рм▓

рм▓рнЛрмХрмЩрнНрмХ рмкрм╛рмЦрм░рнЗ рнк рм╣рмЬрм╛рм░ рм▓рнБрмЯрнНтАН рмЕрм╕рнНрмдрнНрм░рм╢рм╕рнНрмдрнНрм░ рм░рм╣рм┐рмЫрм┐

рмирнВрмЖрмжрм┐рм▓рнНрм▓рнА: рмормгрм┐рмкрнБрм░рм░рнЗ рмЬрм╛рмдрм┐рмЧрмд рм╕рмВрмШрм░рнНрм╖рмХрнБ рмПрмХ рм░рм╛рмЬрмирнИрмдрм┐рмХ рм╕рморм╕рнНрнЯрм╛ рммрнЛрм▓рм┐ рм╕рнЗрмирм╛рм░ рмЗрм╖рнНрмЯрм░рнНрмгрнНрмг рмХрморм╛рмгрнНрмб рмХрморм╛рмгрнНрмбрм░ рм▓рнЗрмлрнНрмЯрмирм╛рмгрнНрмЯ рмЬрнЗрмирнЗрм░рм╛рм▓ рм░рм╛рмгрм╛ рмкрнНрм░рмдрм╛рмк рмХрм▓рм┐рмдрм╛ рмормЩрнНрмЧрм│рммрм╛рм░ рмХрм╣рм┐рмЫрмирнНрмдрм┐ ред рм╕рнБрм░рмХрнНрм╖рм╛ рммрм╛рм╣рм┐рмирнАрмарм╛рм░рнБ рм▓рнБрмЯрнН рм╣рнЛрмЗрмерм┐рммрм╛ рмкрнНрм░рм╛рнЯ рнк рм╣рмЬрм╛рм░ рмЕрм╕рнНрмдрнНрм░рм╢рм╕рнНрмдрнНрм░ рм╕рм╛рмзрм╛рм░рмг рм▓рнЛрмХрмЩрнНрмХрмарм╛рм░рнБ рмЙрмжрнНрмзрм╛рм░ рми рм╣рнЗрммрм╛ рмкрм░рнНрмпрнНрнЯрмирнНрмд рм╣рм┐рмВрм╕рм╛рмХрм╛рмгрнНрмб рмЬрм╛рм░рм┐ рм░рм╣рм┐рмм рммрнЛрм▓рм┐ рм╕рнЗ рмЖрм╢рмЩрнНрмХрм╛ рммрнНрнЯрмХрнНрмд рмХрм░рм┐рмЫрмирнНрмдрм┐ ред

рмЗрм╖рнНрмЯрм░рнНрмгрнНрмг рмХрморм╛рмгрнНрмбрм░ рмЬрнЗрмирнЗрм░рм╛рм▓ рмЕрмлрм┐рм╕рм░ рмХрморм╛рмгрнНрмбрм┐рмВ-рмЗрмирнН-рмЪрм┐рмлрнН рмЖрм╣рнБрм░рм┐ рмормзрнНрнЯ рмХрм╣рм┐рмЫрмирнНрмдрм┐ рмпрнЗ рморм┐рмЬрнЛрм░рм╛рмо рмПрммрмВ рмормгрм┐рмкрнБрм░рм░рнЗ рм╕рм╛рмзрм╛рм░рмг рмЧрнНрм░рм╛рморммрм╛рм╕рнА, рм╕рнЗрмирм╛ рмХрм┐рморнНрммрм╛ рмкрнЛрм▓рм┐рм╕ рм╕рморнЗрмд рморм┐рмЖрмБрморм╛рм░рм░рнБ рмЖрм╢рнНрм░рнЯ рмирнЗрмЙрмерм┐рммрм╛ рммрнНрнЯрмХрнНрмдрм┐рмЩрнНрмХрнБ рмнрм╛рм░рмд рмЖрм╢рнНрм░рнЯ рмжрнЗрмЙрмЫрм┐, рмХрм┐рмирнНрмдрнБ рмирм┐рм╢рм╛ рммрнЗрмкрм╛рм░рнАрмЩрнНрмХ рмЖрмдрмЩрнНрмХрммрм╛рмжрнА рмЧрнЛрм╖рнНрмарнАрм░ рм╕рм╢рм╕рнНрмдрнНрм░ рмХрнНрнЯрм╛рмбрм░рморм╛рмирмЩрнНрмХрнБ рмирнБрм╣рнЗрмБ ред

рм░рм╛рмЬрмирнИрмдрм┐рмХ рм╕рнНрмдрм░рм░рнЗ рм╣рм┐рмВрм╕рм╛рмХрнБ рм░рнЛрмХрм╛рмпрм╛рмЗрмкрм╛рм░рм┐рмм

рм╕рм╛рморнНрммрм╛рмжрм┐рмХрморм╛рмирмЩрнНрмХрнБ рмХрм▓рм┐рмдрм╛ рмХрм╣рм┐рмЫрмирнНрмдрм┐, рм╣рм┐рмВрм╕рм╛рмХрнБ рм░рнЛрмХрм┐рммрм╛ рмПрммрмВ рм╕рмВрмШрм░рнНрм╖рм░ рмЙрмнрнЯ рмкрмХрнНрм╖рмЩрнНрмХрнБ рм░рм╛рмЬрмирнИрмдрм┐рмХ рм╕рморм╕рнНрнЯрм╛рм░ рм╢рм╛рмирнНрмдрм┐рмкрнВрм░рнНрмгрнНрмг рм╕рморм╛рмзрм╛рми рмкрм╛рмЗрмБ рмкрнНрм░рнЗрм░рм┐рмд рмХрм░рм┐рммрм╛ рмЖрморм░ рмкрнНрм░рнЯрм╛рм╕ ред рмХрм╛рм░рмг рм╢рнЗрм╖рм░рнЗ рм╕рморм╕рнНрнЯрм╛рм░ рм░рм╛рмЬрмирнИрмдрм┐рмХ рм╕рморм╛рмзрм╛рми рм╣рнЗрммрм╛ рмжрм░рмХрм╛рм░ ред

рм╕рнЗ рмХрм╣рм┐рмЫрмирнНрмдрм┐ рмпрнЗ рм╕рнНрмерм│рм╕рнНрмерм┐рмдрм┐ рммрм┐рм╖рнЯрм░рнЗ рмХрм╣рм┐рммрм╛рмХрнБ рмЧрм▓рнЗ рмнрм╛рм░рмдрнАрнЯ рм╕рнЗрмирм╛рм░ рмЙрмжрнНрмжрнЗрм╢рнНрнЯ рмкрнНрм░рмерморнЗ рм╕рнЗрморм╛рмирмЩрнНрмХ рмШрм░рнБ рммрм┐рм╕рнНрмерм╛рмкрм┐рмд рм╣рнЛрмЗрмерм┐рммрм╛ рм▓рнЛрмХрмЩрнНрмХ рмкрм╛рмЗрмБ рмЙрмжрнНрмзрм╛рм░ рмПрммрмВ рм░рм┐рм▓рм┐рмл рмХрм╛рм░рнНрмпрнНрнЯ рмХрм░рм┐рммрм╛ рмерм┐рм▓рм╛ ред рмПрм╣рм╛рмкрм░рнЗ рмЖрморнЗ рм╣рм┐рмВрм╕рм╛рмХрнБ рм░рнЛрмХрм┐рммрм╛рмХрнБ рмЪрнЗрм╖рнНрмЯрм╛ рмХрм░рнБрмЫрнБ, рмпрнЗрмЙрмБрмерм┐рм░рнЗ рмЖрморнЗ рмЕрмирнЗрмХрм╛рмВрм╢рм░рнЗ рм╕рмлрм│ рм╣рнЛрмЗрмЫрнБ ред рмХрм┐рмирнНрмдрнБ рмжрнБрмЗ рм╕рморнНрмкрнНрм░рмжрм╛рнЯ- рморнИрмдрнЗрмЗ рмУ рмХрнБрмХрм┐рмЩрнНрмХ рмормзрнНрнЯрм░рнЗ рмзрнНрм░рнБрммрнАрмХрм░рмг рм╣рнЗрмдрнБ рмПрмарм╛рм░рнЗ рмУ рм╕рнЗрмарм╛рм░рнЗ рммрм┐рмХрнНрм╖рм┐рмкрнНрмд рмШрмЯрмгрм╛ рмШрмЯрнБрмЫрм┐ред

рмдрм┐рмирм┐рмЯрм┐ рм╕рморнНрмкрнНрм░рмжрм╛рнЯ рмормзрнНрнЯрм░рнЗ рмРрмдрм┐рм╣рнНрнЯ рмкрнНрм░рм╕рмЩрнНрмЧ

рм╕рмВрмШрм░рнНрм╖ рмЖрм░рморнНрмн рм╣рнЗрммрм╛рм░ рм╕рм╛рмврм╝рнЗ рмЫрмЕ рморм╛рм╕рм░рнБ рмЕрмзрм┐рмХ рм╕рморнЯ рммрм┐рмдрм┐рмпрм╛рмЗрмерм┐рм▓рнЗ рмормзрнНрнЯ рмормгрм┐рмкрнБрм░рм░рнЗ рм╕рнНрмерм┐рмдрм┐ рм╕рнНрн▒рм╛рмнрм╛рммрм┐рмХ рм╣рнЛрмЗрмирм╛рм╣рм┐рмБ рммрнЛрм▓рм┐ рмкрмЪрм░рм╛рмпрм┐рммрм╛рм░рнБ рм╕рнЗ рмХрм╣рм┐рмЫрмирнНрмдрм┐ рмпрнЗ рм░рм╛рмЬрнНрнЯрм░рнЗ рммрм╕рммрм╛рм╕ рмХрм░рнБрмерм┐рммрм╛ рмдрм┐рмирм┐рмЯрм┐ рм╕рморнНрмкрнНрм░рмжрм╛рнЯ- рморнИрмдрнЗрмЗ, рмХрнБрмХрм┐ рмУ рмирм╛рмЧрм╛рморм╛рмирмЩрнНрмХ рмормзрнНрнЯрм░рнЗ рмХрм┐рмЫрм┐ рмРрмдрм┐рм╣рм╛рм╕рм┐рмХ рм╕рморм╕рнНрнЯрм╛ рм░рм╣рм┐рмЫрм┐ ред рм▓рнЗрмлрнНрмЯрмирм╛рмгрнНрмЯ рмЬрнЗрмирнЗрм░рм╛рм▓ рмХрм╣рм┐рмЫрмирнНрмдрм┐ рмпрнЗ рмкрнВрм░рнНрммрм░рнБ рмХрнБрмХрм┐ рмПрммрмВ рмирм╛рмЧрм╛рморм╛рмирмЩрнНрмХ рмормзрнНрнЯрм░рнЗ рм╕рмВрмШрм░рнНрм╖ рнзрнпрнпрнж рмжрм╢рмХрм░рнЗ рм╣рнЛрмЗрмерм┐рм▓рм╛ рмпрнЗрмЙрмБрмерм┐рм░рнЗ рмкрм╛рмЦрм╛рмкрм╛рмЦрм┐ рнзрнжрнжрнж рм▓рнЛрмХ рмкрнНрм░рм╛рмг рм╣рм░рм╛рмЗрмерм┐рм▓рнЗ ред

рмПрммрнЗ рмпрм╛рм╣рм╛ рмШрмЯрм┐рмЫрм┐ рмдрм╛рм╣рм╛ рм╣рнЗрмЙрмЫрм┐ рмПрм╣рм┐ рмжрнБрмЗ рм╕рморнНрмкрнНрм░рмжрм╛рнЯ рм╕рморнНрмкрнВрм░рнНрмгрнНрмг рмзрнНрм░рнБрммрм┐рмХрм░рмг рм╣рнЛрмЗрмпрм╛рмЗрмЫрм┐ ред рмдрнЗрммрнЗ рм╣рм┐рмВрм╕рм╛рм░ рморм╛рмдрнНрм░рм╛ рм╣рнНрм░рм╛рм╕ рмкрм╛рмЗрмЫрм┐ ред рммрм┐рмнрм┐рмирнНрми рмерм╛рмирм╛ рмУ рмЕрмирнНрнЯрм╛рмирнНрнЯ рм╕рнНрмерм╛рмирм░рнБ рнл рм╣рмЬрм╛рм░рм░рнБ рмЕрмзрм┐рмХ рмЕрм╕рнНрмдрнНрм░рм╢рм╕рнНрмдрнНрм░ рм▓рнБрмЯрнН рм╣рнЛрмЗрмЫрм┐ ред рм╕рнЗрмерм┐рмормзрнНрнЯрм░рнБ рморм╛рмдрнНрм░ рнзрнлрнжрнж рмЕрм╕рнНрмдрнНрм░рм╢рм╕рнНрмдрнНрм░ рмЬрммрмд рм╣рнЛрмЗрмЫрм┐ ред рмдрнЗрмгрнБ рмкрнНрм░рм╛рнЯ рнк рм╣рмЬрм╛рм░ рмЕрм╕рнНрмдрнНрм░рм╢рм╕рнНрмдрнНрм░ рмПрммрнЗрммрм┐ рммрм╛рм╣рм╛рм░рнЗ рм░рм╣рм┐рмЫрм┐ ред рмпрнЗрмкрм░рнНрмпрнНрнЯрмирнНрмд рмПрм╣рм┐ рмЕрм╕рнНрмдрнНрм░рм╢рм╕рнНрмдрнНрм░ рм▓рнЛрмХрмЩрнНрмХ рмХрммрмЬрм╛рм░рнЗ рм░рм╣рм┐рмм, рм╕рнЗрмкрм░рнНрмпрнНрнЯрмирнНрмд рмПрмнрм│рм┐ рммрм┐рмХрнНрм╖рм┐рмкрнНрмд рм╣рм┐рмВрм╕рм╛рмдрнНрмормХ рмХрм╛рм░рнНрмпрнНрнЯрмХрм│рм╛рмк рмЬрм╛рм░рм┐ рм░рм╣рм┐рмм ред

рм▓рнЛрмХрмЩрнНрмХ рмкрм╛рмЦрм░рнЗ рнк рм╣рмЬрм╛рм░ рмЕрм╕рнНрмдрнНрм░рм╢рм╕рнНрмдрнНрм░ рм▓рнБрмЯрнН

рмнрм╛рм░рмд-рморм┐рмЖрмБрморм╛рм░ рм╕рнАрморм╛ рмжрнЗрмЗ рмирм┐рм╢рм╛ рмжрнНрм░рммрнНрнЯ рмУ рмЕрм╕рнНрмдрнНрм░рм╢рм╕рнНрмдрнНрм░ рмЪрнЛрм░рм╛ рмЪрм╛рм▓рм╛рмг рммрмирнНрмж рм╣рнЛрмЗрмпрм╛рмЗрмерм┐рм▓рнЗ рм╣рнЗрмБ рмХрм┐рмЫрм┐ рммрм┐рмХрнНрм╖рм┐рмкрнНрмд рмШрмЯрмгрм╛ рмШрмЯрм┐рмкрм╛рм░рнЗ рммрнЛрм▓рм┐ рмХрм▓рм┐рмдрм╛ рмХрм╣рм┐рмЫрмирнНрмдрм┐ ред рмХрм┐рмирнНрмдрнБ рмпрнЗрм╣рнЗрмдрнБ рнк,рнжрнжрнж рмЕрм╕рнНрмдрнНрм░рм╢рм╕рнНрмдрнНрм░ рмЦрнЛрм▓рм╛рм░рнЗ рммрм╛рм╣рм╛рм░рм┐ рм╕рм╛рм░рм┐рмЫрм┐, рмдрнЗрмгрнБ рммрм╛рм╣рм╛рм░рнБ рмЕрм╕рнНрмдрнНрм░рм╢рм╕рнНрмдрнНрм░ рмЖрмгрм┐рммрм╛рм░ рмХрнМрмгрм╕рм┐ рмЖрммрм╢рнНрнЯрмХрмдрм╛ рмирм╛рм╣рм┐рмБ рммрнЛрм▓рм┐ рм╕рнЗ рмХрм╣рм┐рмЫрмирнНрмдрм┐ ред

рмЕрмирнБрм╕рнВрмЪрм┐рмд рмЬрмирмЬрм╛рмдрм┐ рморм╛рмирнНрнЯрмдрм╛ рмжрм╛рммрм┐рмХрнБ рммрм┐рм░рнЛрмз рмХрм░рм┐ рмЧрмд рморнЗ рнй рмдрм╛рм░рм┐рмЦрм░рнЗ рмкрм╛рм╣рм╛рмбрм╝рм┐рмЖ рмЬрм┐рм▓рнНрм▓рм╛рмЧрнБрмбрм╝рм┐рмХрм░рнЗ тАШрмЖрмжрм┐рммрм╛рм╕рнА рмПрмХрмдрм╛ рм╢рнЛрмнрм╛рмпрм╛рмдрнНрм░рм╛тАЩ рмХрм░рм╛рмпрм┐рммрм╛ рмкрм░рнЗ рмЖрм░рморнНрмн рм╣рнЛрмЗрмерм┐рммрм╛ рмЬрм╛рмдрм┐рмЧрмд рм╕рмВрмШрм░рнНрм╖рм░рнЗ рнзрнорнжрм░рнБ рмЕрмзрм┐рмХ рм▓рнЛрмХ рмкрнНрм░рм╛рмг рм╣рм░рм╛рмЗрмерм┐рммрм╛рммрнЗрм│рнЗ рм╢рмдрм╛рмзрм┐рмХ рмЖрм╣рмд рм╣рнЛрмЗрмЫрмирнНрмдрм┐ ред рм░рм╛рмЬрнНрнЯрм░ рморнЛрмЯ рмЬрмирм╕рмВрмЦрнНрнЯрм╛рм░ рмкрнНрм░рм╛рнЯ рнлрнй рмкрнНрм░рмдрм┐рм╢рмд рм╣рнЗрмЙрмЫрмирнНрмдрм┐ рморнИрмдрнЗрмЗ рм▓рнЛрмХ рмПрммрмВ рм╕рнЗрморм╛рмирнЗ рмЕрмзрм┐рмХрм╛рмВрм╢ рмЗрморнНрмлрм╛рм▓ рмЙрмкрмдрнНрнЯрмХрм╛рм░рнЗ рммрм╛рм╕ рмХрм░рмирнНрмдрм┐ ред рмкрм╛рм╣рм╛рмбрм╝рм┐рмЖ рмЬрм┐рм▓рнНрм▓рм╛рморм╛рмирмЩрнНрмХрм░рнЗ рммрм╕рммрм╛рм╕ рмХрм░рнБрмерм┐рммрм╛ рмирм╛рмЧрм╛ рмУ рмХрнБрмХрм┐ рмЖрмжрм┐рммрм╛рм╕рнА рм╕рморнНрмкрнНрм░рмжрм╛рнЯрм░ рм╕рмВрмЦрнНрнЯрм╛ рнкрнж рмкрнНрм░рмдрм┐рм╢рмдрм░рнБ рмХрм┐рмЫрм┐ рмЕрмзрм┐рмХ ред

рмУрмбрм╝рм┐рм╢рм╛ рм╕рморнЗрмд рнлрмЯрм┐ рм░рм╛рмЬрнНрнЯ рм╢рм┐рмХрнНрм╖рм╛рмЧрмд рм╕рмлрм│рмдрм╛ рм╕рм░рнНрммрнЗрмХрнНрм╖рмгрм░рнБ рмирм┐рмЬрмХрнБ рмжрнВрм░рнЗрмЗ рм░рмЦрм┐рм▓рнЗ

рмирнВрмЖрмжрм┐рм▓рнНрм▓рнА: рмЬрм╛рмдрнАрнЯ рморнВрм▓рнНрнЯрм╛рнЯрми рмирм┐рнЯрм╛рмормХ рмкрм╛рм░рмЦ рмжрнНрн▒рм╛рм░рм╛ рмкрнНрм░рмермо рмерм░ рмкрм╛рмЗрмБ рмХрм░рм╛рмпрм╛рмЗрмерм┐рммрм╛ рм░рм╛рмЬрнНрнЯ рм╢рм┐рмХрнНрм╖рм╛рмЧрмд рм╕рмлрм│рмдрм╛ рм╕рм░рнНрммрнЗрмХрнНрм╖рмгрм░рнЗ рмУрмбрм╝рм┐рм╢рм╛ рм╕рморнЗрмд рмжрм┐рм▓рнНрм▓рнА, рмкрм╢рнНрмЪрм┐рморммрмЩрнНрмЧ, рмЫрмдрм┐рм╢рмЧрмбрм╝ рмУ рм░рм╛рмЬрм╕рнНрмерм╛рми рмнрм│рм┐ рмЕрмг-рммрм┐рмЬрнЗрмкрм┐ рм╢рм╛рм╕рм┐рмд рмкрм╛рмЮрнНрмЪрмЯрм┐ рм░рм╛рмЬрнНрнЯ рмЕрмВрм╢ рмЧрнНрм░рм╣рмг рмХрм░рм┐рмирм╛рм╣рм╛рмирнНрмдрм┐ ред рмлрм│рм░рнЗ рм╕рморнНрмкрнГрмХрнНрмд рм░рм╛рмЬрнНрнЯрмЧрнБрмбрм╝рм┐рмХрм░ рмЫрм╛рмдрнНрм░рмЫрм╛рмдрнНрм░рнАрморм╛рмирнЗ рмирм┐рмЬрм░ рм╢рм┐рмХрнНрм╖рм╛рмЧрмд рмжрмХрнНрм╖рмдрм╛ рмЖрмХрм│рмирм░рнБ рммрмЮрнНрмЪрм┐рмд рм╣рнЛрмЗрмЫрмирнНрмдрм┐ ред

рм╢рм┐рмХрнНрм╖рм╛ рмормирнНрмдрнНрм░рм╛рм│рнЯрм░ рмЕрмзрм┐рмХрм╛рм░рнАрмЩрнНрмХ рмХрм╣рм┐рммрм╛рмирнБрмпрм╛рнЯрнА, рммрм┐рмжрнНрнЯрм╛рм│рнЯ рм╢рм┐рмХрнНрм╖рм╛рмжрм╛рми рмУ рм╢рм┐рмХрнНрм╖рмгрм░рнЗ рмЙрмирнНрмирмдрм┐ рмЖрммрм╢рнНрнЯрмХ рмХрм░рнБрмерм┐рммрм╛ рмХрнНрм╖рнЗрмдрнНрм░рмЧрнБрмбрм╝рм┐рмХрнБ рмЪрм┐рм╣рнНрмирмЯ рмХрм░рм┐рммрм╛ рмкрм╛рмЗрмБ рмПрм╣рм┐ рм╕рм░рнНрмнрнЗ рмХрм░рм╛рмпрм╛рмЗрмЫрм┐ред рмирмнрнЗрморнНрммрм░ рнй рмдрм╛рм░рм┐рмЦрм░рнЗ рм╣рнЛрмЗрмерм┐рммрм╛ рмПрм╣рм┐ рм╕рм░рнНрмнрнЗрм░рнЗ рмнрм╛рм░рмдрм░рнЗ рммрнНрм▓рмХрм╕рнНрмдрм░рм░рнЗ рмдрнГрмдрнАрнЯ, рм╖рм╖рнНрма рмУ рмирммрмо рм╢рнНрм░рнЗрмгрнАрм░ рмЫрм╛рмдрнНрм░рмЫрм╛рмдрнНрм░рнАрмЩрнНрмХ рм╢рм┐рмХрнНрм╖рм╛рмЧрмд рмжрмХрнНрм╖рмдрм╛ рмЖрмХрм│рми рмХрм░рм╛рмпрм╛рмЗрмерм┐рм▓рм╛ред

рмПрм╣рм┐ рм╕рм░рнНрмнрнЗрм░рнЗ рмкрм╛рмЦрм╛рмкрм╛рмЦрм┐ рнорнж рм▓рмХрнНрм╖ рмЫрм╛рмдрнНрм░рмЫрм╛рмдрнНрм░рнА рмЕрмВрм╢рмЧрнНрм░рм╣рмг рмХрм░рм┐рмерм┐рм▓рнЗ

рмПрм╣рм┐ рм╕рм░рнНрммрнЗрмХрнНрм╖рмгрм░рнЗ рмжрнЗрм╢рм░ рнлрнпрнзрннрмЯрм┐ рммрнНрм▓рмХрм░ рнй рм▓рмХрнНрм╖ рм╕рнНрмХрнБрм▓рм░ рмкрнНрм░рм╛рнЯ рнорнж рм▓рмХрнНрм╖ рмЫрм╛рмдрнНрм░рмЫрм╛рмдрнНрм░рнА рмЕрмВрм╢ рмЧрнНрм░рм╣рмг рмХрм░рм┐рмЫрмирнНрмдрм┐ ред рмПрмерм┐рм░рнЗ рнм рм▓рмХрнНрм╖ рм╢рм┐рмХрнНрм╖рмХ рмУ рнй рм▓рмХрнНрм╖рм░рнБ рмЕрмзрм┐рмХ рмЖрмЮрнНрмЪрм│рм┐рмХ рмЕрмирнБрм╕рмирнНрмзрм╛рмирмХрм╛рм░рнА рм░рм╣рм┐рмЫрмирнНрмдрм┐ ред рм╢рм┐рмХрнНрм╖рм╛ рмормирнНрмдрнНрм░рм╛рм│рнЯрм░ рмЬрмгрнЗ рммрм░рм┐рм╖рнНрма рмЕрмзрм┐рмХрм╛рм░рнА рмХрм╣рм┐рмЫрмирнНрмдрм┐, рмПрм╣рм┐ рм╕рм░рнНрмнрнЗрм░ рмкрнНрм░рм╛рмерморм┐рмХ рмЙрмжрнНрмжрнЗрм╢рнНрнЯ рм╣рнЗрмЙрмЫрм┐ рмнрм╛рм╖рм╛ рмУ рмЧрмгрм┐рмд рмЙрмкрм░рнЗ рмкрнНрм░рм╛рмерморм┐рмХ рмзрнНрнЯрм╛рми рмжрнЗрмЗ рмкрнНрм░рмдрнНрнЯрнЗрмХ рм╢рм┐рмХрнНрм╖рм╛рмЧрмд рмкрм░рнНрмпрнНрнЯрм╛рнЯ рмЕрм░рнНрмерм╛рмдрнН рморнМрм│рм┐рмХ, рмкрнНрм░рм╛рмерморм┐рмХ рмУ рмормзрнНрнЯрмо рм╕рнНрмдрм░рм░рнЗ рмЫрм╛рмдрнНрм░рмЫрм╛рмдрнНрм░рнАрмЩрнНрмХ рм╢рм┐рмХрнНрм╖рмг рмХрнНрм╖рмормдрм╛рм░ рмЖрмХрм│рми рмХрм░рм╛рмпрм┐рмм ред

рмПрм╣рм┐ рм░рм╛рмЬрнНрнЯрмЧрнБрмбрм╝рм┐рмХ рм╕рм░рнНрмнрнЗрм░рнЗ рмЕрмВрм╢рмЧрнНрм░рм╣рмг рмХрм░рм┐рмирмерм┐рм▓рнЗ

рмЫрмдрм┐рм╢рмЧрмбрм╝, рмжрм┐рм▓рнНрм▓рнА, рмУрмбрм╝рм┐рм╢рм╛, рмкрмЮрнНрмЬрм╛рмм, рм░рм╛рмЬрм╕рнНрмерм╛рми рмУ рмкрм╢рнНрмЪрм┐рморммрмЩрнНрмЧрмХрнБ рммрм╛рмжрнН рмжрнЗрм▓рнЗ рмЕрмирнНрнЯ рм╕рморм╕рнНрмд рм░рм╛рмЬрнНрнЯ рмУ рмХрнЗрмирнНрмжрнНрм░рм╢рм╛рм╕рм┐рмд рмЕрмЮрнНрмЪрм│ рмПрм╣рм┐ рм╕рм░рнНрмнрнЗрм░рнЗ рмЕрмВрм╢рмЧрнНрм░рм╣рмг рмХрм░рм┐рмерм┐рм▓рнЗ ред рммрм┐рмжрнНрнЯрм╛рм│рнЯ рм╢рм┐рмХрнНрм╖рм╛ рм╕рмЪрм┐рмм рм╕рмЮрнНрмЬрнЯ рмХрнБрморм╛рм░ рмХрм╣рм┐рмЫрмирнНрмдрм┐ рмпрнЗ рммрм╣рнБ рм╕рмВрмЦрнНрнЯрмХ рмЫрм╛рмдрнНрм░рмЫрм╛рмдрнНрм░рнАрмЩрнНрмХ рмЖрммрм╢рнНрнЯрмХрмдрм╛рмХрнБ рмкрнВрм░рмг рмХрм░рм┐рммрм╛ рмПрммрмВ рмкрнНрм░рмжрм░рнНрм╢рмирмХрнБ рмЧрмнрнАрм░ рм╕рнНрмдрм░рм░рнЗ рмкрнНрм░рмнрм╛рммрм╢рм╛рм│рнА рмнрм╛рммрм░рнЗ рммрнБрмЭрм┐рммрм╛ рмЙрмжрнНрмжрнЗрм╢рнНрнЯрм░рнЗ рмПрм╣рм┐ рм╕рм░рнНрмнрнЗ рмХрм░рм╛рмпрм╛рмЗрмерм┐рм▓рм╛ ред рмПрм╣рм╛рммрнНрнЯрмдрнАрмд рммрнНрм▓рмХрм╕рнНрмдрм░рм░рнЗ рм╢рм┐рмХрнНрм╖рмХрморм╛рмирмЩрнНрмХ рммрнГрмдрнНрмдрм┐рмЧрмд рммрм┐рмХрм╛рм╢ рмХрм╛рм░рнНрмпрнНрнЯрмХрнНрм░рмо рмормзрнНрнЯ рмПрм╣рм┐ рмкрмжрнНрмзрмдрм┐рм░рнЗ рмЕрмирнНрмдрм░рнНрмнрнБрмХрнНрмд ред

рмкрм░рмЦ рмкрмХрнНрм╖рм░рнБ рмХрм░рм╛рмпрм╛рмЗрмерм┐рммрм╛ рмПрмнрм│рм┐ рм╕рм░рнНрммрнЗрмХрнНрм╖рмг рмПрм╣рм╛ рм╣рнЗрмЙрмЫрм┐ рмкрнНрм░рмермо

рммрм┐рмжрнНрнЯрм╛рм│рнЯ рм╢рм┐рмХрнНрм╖рм╛ рммрм┐рмнрм╛рмЧрм░ рмЕрмдрм┐рм░рм┐рмХрнНрмд рм╢рм╛рм╕рми рм╕рмЪрм┐рмм рммрм┐рмкрм┐рми рмХрнБрморм╛рм░ рмХрм╣рм┐рмЫрмирнНрмдрм┐ рмпрнЗ рмПрм╣рм┐ рморнВрм▓рнНрнЯрм╛рнЯрми, рм╢рм┐рмХрнНрм╖рм╛рмЧрмд рммрнНрм▓рмХрмХрнБ рммрм┐рм╢рнНрм│рнЗрм╖рмгрм░ рм╢рнНрм░рнЗрм╖рнНрма рмПрмХрмХ рмнрм╛рммрм░рнЗ рмЧрнНрм░рм╣рмг рмХрм░рм┐ рм╢рм┐рмХрнНрм╖рм╛ рмирнАрмдрм┐, рм╢рм┐рмХрнНрм╖рмХ рмкрнНрм░рм╢рм┐рмХрнНрм╖рмг рмХрм╛рм░рнНрмпрнНрнЯрмХрнНрм░рмо рмПрммрмВ рм╢рм┐рмХрнНрм╖рм╛рмжрм╛рми рмПрммрмВ рм╢рм┐рмХрнНрм╖рмг рм╕рм╣рм╛рнЯрмдрм╛ рм╕рморнНрммрм│ рм╕рнГрм╖рнНрмЯрм┐ рмЙрмкрм░рнЗ рмЧрмнрнАрм░ рмкрнНрм░рмнрм╛рмм рмкрмХрм╛рмЗрмм ред рмПрмирм╕рм┐рмЗрмЖрм░рмЯрм┐ рмЕрмзрнАрмирм░рнЗ рмерм┐рммрм╛ рмПрмХ рм╕рмВрм╕рнНрмерм╛ рмкрм░рмлрм░рнНрморм╛рмирнНрм╕ рмЖрм╕рнЗрм╕рморнЗрмгрнНрмЯ, рм░рм┐рмнрнНрнЯрнБ рмЖрмгрнНрмб рмЖрмирм╛рм▓рм┐рм╕рм┐рм╕рнН рмЕрмлрнН рмирм▓рнЗрмЬрнН рмлрм░рнН рм╣рнЛрм▓рм┐рм╖рнНрмЯрм┐рмХрнН рмбрнЗрмнрм▓рмкрморнЗрмгрнНрмЯ (рмкрм░рмЦ) рмкрмХрнНрм╖рм░рнБ рмПрм╣рм╛ рм╣рнЗрмЙрмЫрм┐ рмкрнНрм░рмермо рм╕рм░рнНрммрнЗрмХрнНрм╖рмг ред

рм╕рнНрмХрнБрм▓ рмкрм╛рмарнНрнЯрмкрнБрм╕рнНрмдрмХрм░рнЗ рморм╣рм╛рмнрм╛рм░рмд, рм░рм╛рморм╛рнЯрмгрмХрнБ рмЕрмирнНрмдрм░рнНрмнрнБрмХрнНрмд рмХрм░рм┐рммрм╛рмХрнБ рмПрмирм╕рм┐рмЗрмЖрм░рмЯрм┐ рмХрморм┐рмЯрм┐ рм╕рнБрмкрм╛рм░рм┐рм╕

0

рмирнВрмЖрмжрм┐рм▓рнНрм▓рнА : рм╕рм╛рморм╛рмЬрм┐рмХ рммрм┐рмЬрнНрмЮрм╛рмирм░ рммрм┐рмжрнНрнЯрм╛рм│рнЯ рмкрм╛рмарнНрнЯрмХрнНрм░рморм╕рмВрм╢рнЛрмзрми рмкрм╛рмЗрмБ рмЬрм╛рмдрнАрнЯ рм╢рм┐рмХрнНрм╖рм╛ рмЧрммрнЗрм╖рмгрм╛ рмУ рмкрнНрм░рм╢рм┐рмХрнНрм╖рмг рмкрм░рм┐рм╖рмж (рмПрмирм╕рм┐рмЗрмЖрм░рмЯрм┐) рмПрмХ рмЙрмЪрнНрмЪрм╕рнНрмдрм░рнАрнЯ рмХрморм┐рмЯрм┐ рмЧрмарми рмХрм░рм┐рмерм┐рм▓рм╛ ред рм░рм╛рморм╛рнЯрмг рмУ рморм╣рм╛рмнрм╛рм░рмд рмнрм│рм┐ рморм╣рм╛рмХрм╛рммрнНрнЯрмХрнБ рмкрм╛рмарнНрнЯрмкрнБрм╕рнНрмдрмХрм░рнЗ рмЕрмирнНрмдрм░рнНрмнрнБрмХрнНрмд рмХрм░рм┐рммрм╛ рмПрммрмВ рммрм┐рмжрнНрнЯрм╛рм│рнЯрм░ рм╢рнНрм░рнЗрмгрнАрмЧрнГрм╣рм░ рмХрм╛рмирнНрмерм░рнЗ рм╕рморнНрммрм┐рмзрм╛рмирм░ рмкрнНрм░рм╕рнНрмдрм╛рммрмирм╛ рм▓рнЗрмЦрм┐рммрм╛рмХрнБ рмХрморм┐рмЯрм┐ рм╕рнБрмкрм╛рм░рм┐рм╕ рмХрм░рм┐рмЫрм┐ ред рмХрморм┐рмЯрм┐рм░ рмЕрмзрнНрнЯрмХрнНрм╖ рм╕рм┐рмЖрмЗ рмЗрм╕рм╛рмХрнН рмормЩрнНрмЧрм│рммрм╛рм░ (рмирмнрнЗрморнНрммрм░ рнирнз) рмПрм╣рм┐ рм╕рнВрмЪрмирм╛ рмжрнЗрмЗрмЫрмирнНрмдрм┐ ред

рм╕рмкрнНрмдрморм░рнБ рмжрнНрн▒рм╛рмжрм╢ рм╢рнНрм░рнЗрмгрнА рмЫрм╛рмдрнНрм░рмЫрм╛рмдрнНрм░рнАрмЩрнНрмХрнБ рм░рм╛рморм╛рнЯрмг рмУ рморм╣рм╛рмнрм╛рм░рмд рм╢рм┐рмХрнНрм╖рм╛ рмжрнЗрммрм╛ рмЬрм░рнБрм░рнА рммрнЛрм▓рм┐ рмЗрм╕рм╛рмХрнН рмХрм╣рм┐рмЫрмирнНрмдрм┐ ред рм╕рм╛рморм╛рмЬрм┐рмХ рммрм┐рмЬрнНрмЮрм╛рми рмкрм╛рмарнНрнЯрмХрнНрм░рморм░рнЗ рмЫрм╛рмдрнНрм░рмЫрм╛рмдрнНрм░рнАрмЩрнНрмХрнБ рм░рм╛рморм╛рнЯрмг рмУ рморм╣рм╛рмнрм╛рм░рмд рмнрм│рм┐ рморм╣рм╛рмХрм╛рммрнНрнЯ рмкрмврм╝рм╛рмЗрммрм╛ рмЙрмкрм░рнЗ рмХрморм┐рмЯрм┐ рмЧрнБрм░рнБрмдрнНрн▒рм╛рм░рнЛрмк рмХрм░рм┐рмЫрм┐ ред рмЖрморнЗ рммрм┐рм╢рнНрн▒рм╛рм╕ рмХрм░рнБ рмпрнЗ рмХрм┐рм╢рнЛрм░ рмЕрммрм╕рнНрмерм╛рм░рнЗ рмЬрмгрнЗ рмЫрм╛рмдрнНрм░ рмирм┐рмЬ рмжрнЗрм╢ рмкрм╛рмЗрмБ рмЖрмдрнНрморм╕рморнНрморм╛рми, рмжрнЗрм╢рмкрнНрм░рнЗрмо рмПрммрмВ рмЧрм░рнНрмм рмЕрмирнБрмнрмм рмХрм░рм┐рмерм╛рмП ред

‘рмЫрм╛рмдрнНрм░рмЫрм╛рмдрнНрм░рнАрмЩрнНрмХ рмормзрнНрнЯрм░рнЗ рмжрнЗрм╢рмкрнНрм░рнЗрморм░ рмЕрмнрм╛рмм’

рмжрнЗрм╢рмкрнНрм░рнЗрмо рмЕрмнрм╛рммрм░рнБ рмкрнНрм░рмдрм┐рммрм░рнНрм╖ рм╣рмЬрм╛рм░ рм╣рмЬрм╛рм░ рмЫрм╛рмдрнНрм░рмЫрм╛рмдрнНрм░рнА рмжрнЗрм╢ рмЫрм╛рмбрм╝рм┐ рмЕрмирнНрнЯ рмжрнЗрм╢рм░рнЗ рмирм╛рмЧрм░рм┐рмХрмдрм╛ рмЧрнНрм░рм╣рмг рмХрм░рм┐рмерм╛рмирнНрмдрм┐ ред рмдрнЗрмгрнБ рм╕рнЗрморм╛рмирмЩрнНрмХ рморнВрм│рмХрнБ рммрнБрмЭрм┐рммрм╛, рмирм┐рмЬ рмжрнЗрм╢ рмУ рм╕рмВрм╕рнНрмХрнГрмдрм┐ рмкрнНрм░рмдрм┐ рмнрм▓рмкрм╛рмЗрммрм╛ рм╕рнГрм╖рнНрмЯрм┐ рмХрм░рм┐рммрм╛ рм╕рнЗрморм╛рмирмЩрнНрмХ рмкрм╛рмЗрмБ рмЬрм░рнБрм░рнА ред

рм╕рнЗ рмХрм╣рм┐рмЫрмирнНрмдрм┐ рмпрнЗ рмХрм┐рмЫрм┐ рм╢рм┐рмХрнНрм╖рм╛ рммрнЛрм░рнНрмб рммрм░рнНрмдрнНрмдрморм╛рми рмЫрм╛рмдрнНрм░рмЫрм╛рмдрнНрм░рнАрмЩрнНрмХрнБ рм░рм╛рморм╛рнЯрмг рмкрмврм╝рм╛рмЙрмЫрмирнНрмдрм┐, рмХрм┐рмирнНрмдрнБ рм╕рнЗрморм╛рмирнЗ рмПрм╣рм╛рмХрнБ рмПрмХ рморм┐рмернНрнЯрм╛ рмнрм╛рммрм░рнЗ рмкрмврм╝рм╛рмЙрмЫрмирнНрмдрм┐ ред рмпрмжрм┐ рмПрм╣рм┐ рморм╣рм╛рмХрм╛рммрнНрнЯрмЧрнБрмбрм╝рм┐рмХ рмЫрм╛рмдрнНрм░рмЫрм╛рмдрнНрм░рнАрмЩрнНрмХрнБ рм╢рм┐рмХрнНрм╖рм╛ рмжрм┐рмЖрмирмпрм╛рмП, рмдрнЗрммрнЗ рм╢рм┐рмХрнНрм╖рм╛ рммрнНрнЯрммрм╕рнНрмерм╛рм░ рмХрнМрмгрм╕рм┐ рмЙрмжрнНрмжрнЗрм╢рнНрнЯ рмирм╛рм╣рм┐рмБ рмПрммрмВ рмПрм╣рм╛ рмжрнЗрм╢рм░ рм╕рнЗрммрм╛ рмХрм░рм┐рмм рмирм╛рм╣рм┐рмБ ред

рмПрм╣рм╛ рмкрнВрм░рнНрммрм░рнБ рмЗрм╕рм╛рмХрнН рмХрм╣рм┐рмерм┐рм▓рнЗ рмпрнЗ рмдрнГрмдрнАрнЯрм░рнБ рмжрнНрн▒рм╛рмжрм╢ рм╢рнНрм░рнЗрмгрнАрм░ рмкрнБрм╕рнНрмдрмХрм░рнЗ рмкрнНрм░рм╛рмЪрнАрми рмЗрмдрм┐рм╣рм╛рм╕ рмкрм░рм┐рммрм░рнНрмдрнНрмдрнЗ тАШрм╢рм╛рм╕рнНрмдрнНрм░рнАрнЯ рмЗрмдрм┐рм╣рм╛рм╕тАЩрмХрнБ рмЕрмирнНрмдрм░рнНрмнрнБрмХрнНрмд рмХрм░рм┐рммрм╛ рмПрммрмВ тАШрмЗрмгрнНрмбрм┐рмЖтАЩ рмирм╛рморммрмжрм│рм░рнЗ тАШрмнрм╛рм░рмдтАЩ рмирм╛рмо рм░рмЦрм┐рммрм╛рмХрнБ рмХрморм┐рмЯрм┐ рм╕рнБрмкрм╛рм░рм┐рм╕ рмХрм░рм┐рмерм┐рм▓рм╛ ред

рммрм╣рм┐ рмЪрнВрмбрм╝рм╛рмирнНрмд рмХрм░рм┐рммрм╛ рмЙрмкрм░рнЗ рммрм┐рмЪрм╛рм░ рмХрм░рм┐рмм рмПрмирнНрмПрм╕рмЯрм┐рм╕рм┐

рмЧрмдрммрм░рнНрм╖ рмЧрмарм┐рмд рнн рмЬрмгрм┐рмЖ рмХрморм┐рмЯрм┐ рм╕рм╛рморм╛рмЬрм┐рмХ рммрм┐рмЬрнНрмЮрм╛рми рмкрм╛рмарнНрнЯрмХрнНрм░рмо рмкрм╛рмЗрмБ рмЕрмирнЗрмХ рм╕рнБрмкрм╛рм░рм┐рм╕ рмХрм░рм┐рмЫрмирнНрмдрм┐ ред рмПрм╣рм┐ рм╕рнБрмкрм╛рм░рм┐рм╕рмЧрнБрмбрм┐рмХ рмирнВрмдрми рмПрмирм╕рм┐рмЗрмЖрм░рмЯрм┐ рмкрнБрм╕рнНрмдрмХ рмкрм╛рмЗрмБ рмЧрнБрм░рнБрмдрнНрн▒рмкрнВрм░рнНрмгрнНрмг рм╢рм┐рмХрнНрм╖рм╛рмЧрмд рмжрм╕рнНрмдрм╛рммрм┐рмЬ рмЕрмЯрнЗ ┬аред

рмХрморм┐рмЯрм┐рм░ рм╕рнБрмкрм╛рм░рм┐рм╕ рмХрнНрм░рморнЗ рмХрнНрм▓рм╛рм╕ рмкрм╛рмЗрмБ рмкрм╛рмарнНрнЯрмХрнНрм░рмо, рмкрнБрм╕рнНрмдрмХ рмПрммрмВ рм╢рм┐рмХрнНрм╖рмг рм╕рм╛рмормЧрнНрм░рнА рмЪрнВрмбрм╝рм╛рмирнНрмд рмХрм░рм┐рммрм╛ рмкрм╛рмЗрмБ рнзрнп рмЬрмгрм┐рмЖ рмЬрм╛рмдрнАрнЯ рм╕рм┐рм▓рнЗрммрм▓рнНрм╕ рмЖрмгрнНрмб рмЯрм┐рмЪрм┐рмВ рм▓рм░рнНрмгрнНрмгрм┐рмВ рморнНрнЯрм╛рмЯрнЗрм░рм┐рмЖрм▓рнН (рмПрмирнН рмПрм╕рнН рмЯрм┐рм╕рм┐) рмЬрнБрм▓рм╛рмЗрм░рнЗ рммрм┐рмЪрм╛рм░ рмХрм░рм┐рммрм╛рм░ рм╕рморнНрмнрм╛рммрмирм╛ рм░рм╣рм┐рмЫрм┐ ред

рмЖрм╕рмирнНрмдрм╛ рмЕрмзрм┐рммрнЗрм╢рмирм░рнЗ рмирнВрмЖ рмкрнБрм╕рнНрмдрмХ рмкрнНрм░рмХрм╛рм╢ рмкрм╛рмЗрмкрм╛рм░рнЗ

рмирм┐рмХрмЯрм░рнЗ рмПрмирмПрм╕рмЯрм┐рм╕рм┐ рм╕рм╛рморм╛рмЬрм┐рмХ рммрм┐рмЬрнНрмЮрм╛рми рмкрм╛рмЗрмБ рмкрм╛рмарнНрнЯрмХрнНрм░рмо рмПрммрмВ рм╢рм┐рмХрнНрм╖рмХ рм╢рм┐рмХрнНрм╖рмг рм╕рм╛рмормЧрнНрм░рнА рммрм┐рмХрм╢рм┐рмд рмХрм░рм┐рммрм╛ рмкрм╛рмЗрмБ рмПрмХ рмкрм╛рмарнНрнЯрмХрнНрм░рмо рмХрнНрм╖рнЗрмдрнНрм░ рмЧрнЛрм╖рнНрмарнА (рм╕рм┐рмПрмЬрм┐) рмЧрмарми рмХрм░рм┐рмерм┐рм▓рм╛ ред рмПрмирм╕рм┐рмЗрмЖрм░рмЯрм┐ рмЬрм╛рмдрнАрнЯ рм╢рм┐рмХрнНрм╖рм╛ рмирнАрмдрм┐ (рмПрмирмЗрмкрм┐) рнирнжрнирнж рмЕрмирнБрмпрм╛рнЯрнА рммрм┐рмжрнНрнЯрм╛рм│рнЯ рмкрм╛рмарнНрнЯрмХрнНрм░рмормХрнБ рм╕рмВрм╢рнЛрмзрми рмХрм░рнБрмЫрм┐ ред рмЖрм╕рмирнНрмдрм╛ рм╢рм┐рмХрнНрм╖рм╛рммрм░рнНрм╖ рм╕рнБрмжрнНрмзрм╛ рмирнВрмЖ рмПрмирм╕рм┐рмЗрмЖрм░рмЯрм┐ рммрм╣рм┐ рмкрнНрм░рм╕рнНрмдрнБрмд рм╣рнЗрммрм╛рм░ рм╕рморнНрмнрм╛рммрмирм╛ рм░рм╣рм┐рмЫрм┐ ред

рмирнНрнЯрм╛рм╕рмирм╛рм▓ рм╣рнЗрм░рм╛рм▓рнНрмб рморм╛рморм▓рм╛: рмПрмЬрнЗрмПрм▓рм░ рннрнлрнж рмХрнЛрмЯрм┐ рмЯрмЩрнНрмХрм╛рм░ рм╕рморнНрмкрмдрнНрмдрм┐ рмЬрммрмд рмХрм▓рм╛ рмЗрмбрм┐

рмирнВрмЖрмжрм┐рм▓рнНрм▓рнА : рмирнНрнЯрм╛рм╕рмирм╛рм▓ рм╣рнЗрм░рм╛рм▓рнНрмб рморм╛рморм▓рм╛рм░рнЗ рмЗрмбрм┐ рмХрмВрмЧрнНрм░рнЗрм╕ рм╕рм╣рм┐рмд рм╕рморнНрмкрнГрмХрнНрмд рмПрмЬрнЗрмПрм▓ рмПрммрмВ рнЯрмЩрнНрмЧ рмЗрмгрнНрмбрм┐рмЖрмирм░ рннрнлрнз.рнп рмХрнЛрмЯрм┐ рмЯрмЩрнНрмХрм╛рм░ рм╕рморнНрмкрмдрнНрмдрм┐ рмЬрммрмд рмХрм░рм┐рмЫрм┐ ред рмХрнЗрмирнНрмжрнНрм░рнАрнЯ рмдрмжрмирнНрмдрмХрм╛рм░рнА рм╕рмВрм╕рнНрмерм╛ рмХрм╣рм┐рмЫрм┐ рмпрнЗ рмЬрммрмд рм╕рморнНрмкрмдрнНрмдрм┐ рмормзрнНрнЯрм░рнЗ рмжрм┐рм▓рнНрм▓рнА, рморнБрморнНрммрм╛рмЗ рмПрммрмВ рм▓рмХрнНрм╖рнНрмирнМ рм╕рморнЗрмд рмЕрмирнЗрмХ рм╕рнНрмерм╛рмирм░рнЗ рмПрмЬрнЗрмПрм▓рм░ рм╕рморнНрмкрмдрнНрмдрм┐ рм░рм╣рм┐рмЫрм┐ ред рмПрм╣рм╛рм░ рморнЛрмЯ рморнВрм▓рнНрнЯ рнмрнмрнз.рнмрнп рмХрнЛрмЯрм┐ рмЯрмЩрнНрмХрм╛ рм░рм╣рм┐рмЫрм┐ ред┬а

рмЗрмбрм┐ рм╕рнЛрм╕рм┐рмЖрм▓ рморм┐рмбрм╝рм┐рмЖ рмПрмХрнНрм╕рм░рнЗ рмПрмХ рммрм┐рммрнГрмдрм┐ рмЬрм╛рм░рм┐ рмХрм░рм┐ рмХрм╣рм┐рмЫрм┐ рмпрнЗ рнЯрмЩрнНрмЧ рмЗрмгрнНрмбрм┐рмЖ рм╕рморнНрмкрмдрнНрмдрм┐рм░ рморнВрм▓рнНрнЯ рнпрнж.рнирнз рмХрнЛрмЯрм┐ рмЯрмЩрнНрмХрм╛ ред рмХрмВрмЧрнНрм░рнЗрм╕ рм╕рм░рмХрм╛рм░рмЩрнНрмХрнБ рмЯрм╛рм░рнНрмЧрнЗрмЯ рмХрм░рм┐ рмХрм╣рм┐рмЫрм┐ рмпрнЗ рмирм┐рм░рнНрммрм╛рмЪрмирмХрнБ рмжрнГрм╖рнНрмЯрм┐рм░рнЗ рм░рмЦрм┐ рмПрмкрм░рм┐ рмХрм░рм╛рмпрм╛рмЙрмЫрм┐ ред┬а рммрм╛рм╕рнНрмдрммрм░рнЗ рмПрм╣рм┐ рмХрморнНрмкрм╛рмирнАрм░рнЗ рмХрмВрмЧрнНрм░рнЗрм╕рм░ рмкрнВрм░рнНрммрмдрми рмЕрмзрнНрнЯрмХрнНрм╖рм╛ рм╕рнЛрмирм┐рмЖ рмЧрм╛рмирнНрмзрм┐ рмПрммрмВ рм░рм╛рм╣рнБрм▓ рмЧрм╛рмирнНрмзрм┐рмЩрнНрмХ рмЕрмВрм╢рмзрми рм░рм╣рм┐рмЫрм┐ ред

рмХтАЩрмг рмХрм╣рм┐рм▓рм╛ рмХрмВрмЧрнНрм░рнЗрм╕ ?

рмЗрмбрм┐рм░ рмХрм╛рм░рнНрмпрнНрнЯрм╛рмирнБрм╖рнНрмарм╛рми рмЙрмкрм░рнЗ рмкрнНрм░рмдрм┐рмХрнНрм░рм┐рнЯрм╛ рмкрнНрм░рмХрм╛рм╢ рмХрм░рм┐ рмХрмВрмЧрнНрм░рнЗрм╕ рмирнЗрмдрм╛ рмЕрмнрм┐рм╖рнЗрмХ рмормирнБ рм╕рм┐рмВрмШрмнрм┐ рмХрм╣рм┐рмЫрмирнНрмдрм┐, рмЗрмбрм┐ рмПрмЬрнЗрмПрм▓ рм╕рморнНрмкрмдрнНрмдрм┐ рмЬрммрмд рмХрм░рм┐рмерм┐рммрм╛ рмЦрммрм░ рмжрм░рнНрм╢рм╛рмЙрмЫрм┐ рмпрнЗ рм░рм╛рмЬрнНрнЯрм░рнЗ рмЪрм╛рм▓рм┐рмерм┐рммрм╛ рмирм┐рм░рнНрммрм╛рмЪрмирм░рнЗ рмирм┐рм╢рнНрмЪрм┐рмд рмкрм░рм╛рмЬрнЯрм░рнБ рмзрнНрнЯрм╛рми рм╣рмЯрм╛рмЗрммрм╛ рмкрм╛рмЗрмБ рм╕рнЗрморм╛рмирнЗ рмирм┐рм░рм╛рм╢ рм╣рнЛрмЗрмЫрмирнНрмдрм┐ ред рм╕рнЗ рмЖрм╣рнБрм░рм┐ рмормзрнНрнЯ рмХрм╣рм┐рмЫрмирнНрмдрм┐ рмпрнЗ рммрм┐рмЬрнЗрмкрм┐рм░ рморнЗрмгрнНрмЯ рм╕рм╣рмпрнЛрмЧрнА рм╕рм┐рммрм┐рмЖрмЗ, рмЗрмбрм┐ рмХрм┐рморнНрммрм╛ рмЖрмЗрмЯрм┐ рмирм┐рм░рнНрммрм╛рмЪрмирм░рнЗ рм╕рнЗрморм╛рмирмЩрнНрмХ (рммрм┐рмЬрнЗрмкрм┐)рм░ рмкрм░рм╛рмЬрнЯрмХрнБ рм░рнЛрмХрм┐рмкрм╛рм░рм┐рммрнЗ рмирм╛рм╣рм┐рмБ ред┬а

рмкрнНрм░рмдрм┐рмжрм┐рми рмХрмВрмЧрнНрм░рнЗрм╕ рм╕рморнЗрмд рмЕрмирнНрнЯ рммрм┐рм░рнЛрмзрнА рмжрм│рморм╛рмирнЗ рморнЛрмжрм┐ рм╕рм░рмХрм╛рм░ рмХрнЗрмирнНрмжрнНрм░рнАрнЯ рмдрмжрмирнНрмдрмХрм╛рм░рнА рмПрмЬрнЗрмирнНрм╕рм┐рмЧрнБрмбрм╝рм┐рмХрм░ рмЕрмкрммрнНрнЯрммрм╣рм╛рм░ рмХрм░рнБрмЫрмирнНрмдрм┐ рммрнЛрм▓рм┐ рмЕрмнрм┐рмпрнЛрмЧ рмХрм░рнБрмЫрмирнНрмдрм┐ ред рмПрм╣рм╛рмХрнБ рмкрнНрм░рмдрнНрнЯрм╛рмЦрнНрнЯрм╛рми рмХрм░рм┐ рммрм┐рмЬрнЗрмкрм┐ рмХрм╣рм┐рмЫрм┐ рмпрнЗ рмПрмЬрнЗрмирнНрм╕рм┐рмЧрнБрмбрм╝рм┐рмХ рмкрнНрм░рморм╛рмг рмЖрмзрм╛рм░рм░рнЗ рмдрмжрмирнНрмд рмХрм░рнБрмЫрмирнНрмдрм┐ ред

рмормзрнНрнЯрмкрнНрм░рмжрнЗрм╢, рмЫрмдрм┐рм╢рмЧрмбрм╝ рмУ рморм┐рмЬрнЛрм░рм╛рморм░рнЗ рммрм┐рмзрм╛рмирм╕рмнрм╛ рмирм┐рм░рнНрммрм╛рмЪрми рмЕрмирнБрм╖рнНрмарм┐рмд рм╣рнЛрмЗрмЫрм┐ ред рм░рм╛рмЬрм╕рнНрмерм╛рми рмУ рмдрнЗрм▓рнЗрмЩрнНрмЧрм╛рмирм╛рм░рнЗ рмирм┐рм░рнНрммрм╛рмЪрми рм╣рнЗрммрм╛рмХрнБ рмпрм╛рмЙрмЫрм┐ ред рмбрм┐рм╕рнЗрморнНрммрм░ рнйрмдрм╛рм░рм┐рмЦрм░рнЗ рнлрмЯрм┐ рм░рм╛рмЬрнНрнЯрм░рнЗ рм╣рнЛрмЗрмерм┐рммрм╛ рмирм┐рм░рнНрммрм╛рмЪрмирм░ рмлрм│рм╛рмлрм│ рмЖрм╕рм┐рмм ред

рм╕рммрнБ рмЪрм╛рмХрм┐рм░рм┐ рмШрм░рнЛрмЗ рмХрнНрм╖рнЗрмдрнНрм░рм░рнЗ, рмЬрм╛рмдрм┐ рмЧрмгрмирм╛рм░ рм▓рм╛рмн рмХ’рмг ?

рмирнВрмЖрмжрм┐рм▓рнНрм▓рнА : рммрм┐рм╣рм╛рм░ рмЬрм╛рмдрм┐ рм╕рм░рнНрммрнЗрмХрнНрм╖рмг рм╕рм╛рморм╛рмЬрм┐рмХ рмирнНрнЯрм╛рнЯ рм░рм╛рмЬрмирнАрмдрм┐рм░рнЗ рмирнВрмЖ рмЬрнАрммрми рмжрнЗрмЗрмерм┐рммрм╛ рмЬрмгрм╛рмкрмбрм╝рм┐рмЫрм┐ ред рммрм┐рмЬрнЗрмкрм┐ рм╕рморнЗрмд рм╕рморм╕рнНрмд рм░рм╛рмЬрмирнИрмдрм┐рмХ рмжрм│ рмЕрмдрм┐ рмкрмЫрнБрмЖ рмУ рмЕрммрм╣рнЗрм│рм┐рмд рм╕рм╛рморм╛рмЬрм┐рмХ рм╕рморнНрмкрнНрм░рмжрм╛рнЯ рмкрнНрм░рмдрм┐ рмЖрмЧрнНрм░рм╣ рмжрнЗрмЦрм╛рмЙрмЫрмирнНрмдрм┐ ред рммрм┐рм╢рнЗрм╖ рмХрм░рм┐ рмормзрнНрнЯрмкрнНрм░рмжрнЗрм╢, рмЫрмдрм┐рм╢рмЧрмбрм╝ рмУ рм░рм╛рмЬрм╕рнНрмерм╛рми рммрм┐рмзрм╛рмирм╕рмнрм╛ рмирм┐рм░рнНрммрм╛рмЪрми рм╕рморнЯрм░рнЗ рм╕рм╛рморнНрмкрнНрм░рмдрм┐рмХ рмирм┐рм░рнНрммрм╛рмЪрми рмкрнНрм░рмЪрм╛рм░рм░рнБ рм╕рнНрмкрм╖рнНрмЯ рм╣рнЛрмЗрмЫрм┐ рмпрнЗ рм╕рм╛рморм╛рмЬрм┐рмХ рмирнНрнЯрм╛рнЯ рмЙрмкрм░рнЗ рммрм╣рнБрморнБрмЦрнА рмЪрм┐рмирнНрмдрм╛рмзрм╛рм░рм╛ рмнрммрм┐рм╖рнНрнЯрмдрм░ рм░рм╛рмЬрмирнИрмдрм┐рмХ рмжрм┐рмЧ рмирм┐рм░рнНрмжрнНрмзрм╛рм░рмг рмХрм░рм┐рмм ред

рмдрнЗрммрнЗ рмПрм╣рм┐ рмкрнБрмирм░рнНрмЬрнАрммрм┐рмд рм╕рм╛рморм╛рмЬрм┐рмХ рмирнНрнЯрм╛рнЯ рм░рм╛рмЬрмирнАрмдрм┐рм░ рмкрм░рм┐рм╕рм░ рмПрммрнЗрммрм┐ рмЕрмдрнНрнЯрмирнНрмд рм╕рнАрморм┐рмд рм░рм╣рм┐рмЫрм┐ ред рм░рм╛рмЬрмирнИрмдрм┐рмХ рммрм░рнНрмЧ рмХрнЗрммрм│ рм╕рм╛рморм╛рмЬрм┐рмХ-рмЕрм░рнНрмермирнИрмдрм┐рмХ рмЕрм╕рморм╛рмирмдрм╛ рмПрммрмВ рмЬрм╛рмдрм┐рмЧрмд рмнрнЗрмжрмнрм╛рмм рм╕рморм╕рнНрнЯрм╛рмХрнБ рмирм┐рм░рнНрммрм╛рмЪрмирнА рмХрнМрм╢рм│рм░рнЗ рмЙрмарм╛рмЙрмЫрмирнНрмдрм┐ ред рмлрм│рм░рнЗ рм╕рм░рмХрм╛рм░рнА рмХрнНрм╖рнЗрмдрнНрм░рм░рнЗ рмЪрм╛рмХрм┐рм░рм┐ рмУ рм╢рм┐рмХрнНрм╖рм╛рмХрнНрм╖рнЗрмдрнНрм░рм░рнЗ рм╕рмВрм░рмХрнНрм╖рмг рммрнГрмжрнНрмзрм┐ рм╕рм╛рморм╛рмЬрм┐рмХ рмЕрм╕рморм╛рмирмдрм╛ рмжрнВрм░ рмХрм░рм┐рммрм╛ рмжрм┐рмЧрм░рнЗ рмПрмХ рмЧрнБрм░рнБрмдрнНрн▒рмкрнВрм░рнНрмгрнНрмг рмПрммрмВ рмкрнНрм░рмнрм╛рммрм╢рм╛рм│рнА рмкрмжрмХрнНрм╖рнЗрмкрмнрм╛рммрнЗ рммрм┐рммрнЗрмЪрмирм╛ рмХрм░рм╛рмпрм╛рмЙрмЫрм┐ ред рмПрмерм┐рм╕рм╣ рм╕рморм╛рмЬрм░ рм╕рморм╕рнНрмд рммрм░рнНрмЧрмЩрнНрмХрнБ рмЖрмХрнГрм╖рнНрмЯ рмХрм░рм┐рммрм╛ рмкрм╛рмЗрмБ рммрм┐рмнрм┐рмирнНрми рмЬрмирмХрм▓рнНрнЯрм╛рмгрмХрм╛рм░рнА рмпрнЛрмЬрмирм╛ рмормзрнНрнЯ рмжрм┐рмЖрмпрм╛рмЙрмЫрм┐ ред рм╕рм╛рморм╛рмЬрм┐рмХ рмирнНрнЯрм╛рнЯ рмирм╛рмБрм░рнЗ рмПрм╣рм┐ рм░рм╛рмЬрмирнИрмдрм┐рмХ рмЙрмжрнНрмжрнЗрм╢рнНрнЯрморнВрм│рмХ рмкрмжрмХрнНрм╖рнЗрмкрмХрнБ рммрнИрмзрмдрм╛ рмжрм┐рмЖрмпрм╛рмЙрмЫрм┐ ред

рмжрнЗрм╢рм░рнЗ рммрмврм╝рнБрмерм┐рммрм╛ рм╕рм╛рморм╛рмЬрм┐рмХ рмУ рмЕрм░рнНрмермирнИрмдрм┐рмХ рмЕрм╕рморм╛рмирмдрм╛ рмЙрмкрм░рнЗ рмЕрм░рнНрмермкрнВрм░рнНрмгрнНрмг рмЖрм▓рнЛрмЪрмирм╛ рмкрм╛рмЗрмБ рм╕рм╛рморм╛рмЬрм┐рмХ рмирнНрнЯрм╛рнЯрм░ рмПрм╣рм┐ рм╕рнАрморм┐рмд рмПрммрмВ рмирм┐рм░рнНрммрм╛рмЪрми-рмХрнЗрмирнНрмжрнНрм░рнАрмд рмЕрм░рнНрме рмЙрмкрм░рнЗ рмкрнНрм░рм╢рнНрми рмЙрмарм┐рммрм╛ рмЖрммрм╢рнНрнЯрмХ ред рммрм┐рм╢рнЗрм╖ рмХрм░рм┐ рм╕рм╛рморм╛рмЬрм┐рмХ рмирнНрнЯрм╛рнЯрм░ рмжрнБрмЗрмЯрм┐ рмЧрнБрм░рнБрмдрнНрн▒рмкрнВрм░рнНрмгрнНрмг рмжрм┐рмЧрмХрнБ рмпрм╛рмЮрнНрмЪ рмХрм░рм╛рмпрм┐рммрм╛рм░ рмЖрммрм╢рнНрнЯрмХрмдрм╛ рм░рм╣рм┐рмЫрм┐, рмпрм╛рм╣рм╛ рммрм┐рм╣рм╛рм░рм░ рмЬрм╛рмдрм┐ рм╕рм░рнНрммрнЗрмХрнНрм╖рмг рмдрмернНрнЯрм░рнБ рмЬрмгрм╛рмкрмбрм╝рм┐рмЫрм┐: рмЬрм╛рмдрм┐рмнрм┐рмдрнНрмдрм┐рмХ рм╕рм╛рморм╛рмЬрм┐рмХ-рмЕрм░рнНрмермирнИрмдрм┐рмХ рмкрмЫрнБрмЖрмкрмгрм░ рм╕рнНрмдрм░ рмПрммрмВ рм╕рмормХрм╛рм│рнАрми рмнрм╛рм░рмдрм░рнЗ рмЕрм░рнНрмермирнИрмдрм┐рмХ рм╢рмХрнНрмдрм┐ рмврм╛рмЮрнНрмЪрм╛рм░ рмкрнНрм░рмХрнГрмдрм┐ ред

рмПрм╣рм╛ рм╕рнНрмкрм╖рнНрмЯ рмХрм░рм┐рммрм╛ рмЬрм░рнБрм░рнА рмпрнЗ рммрм┐рм╣рм╛рм░ рмЬрм╛рмдрм┐ рм╕рм░рнНрммрнЗрмХрнНрм╖рмг рмдрмернНрнЯрмХрнБ рмХрнМрмгрм╕рм┐ рммрнНрнЯрм╛рмкрмХ рм╕рм╛рмзрм╛рм░рмгрнАрмХрм░рмг рмкрм╛рмЗрмБ рмЕрмдрнНрнЯрмзрм┐рмХ рммрм░рнНрмгрнНрмгрмирм╛ рмХрм░рм╛рмпрм┐рммрм╛ рмЙрмЪрм┐рмд рмирнБрм╣рнЗрмБ ред рмПрм╣рм┐ рмдрмернНрнЯ рм░рм╛рмЬрнНрнЯ-рмХрнЗрмирнНрмжрнНрм░рнАрмд рмПрммрмВ рмПрм╣рм╛рмХрнБ рмПрмХ рмкрнНрм░рмХрм╛рм░ рмкрнНрм░рмдрм┐рмирм┐рмзрм┐ рмирморнБрмирм╛ рмнрм╛рммрм░рнЗ рммрм┐рммрнЗрмЪрмирм╛ рмХрм░рм╛рмпрм┐рммрм╛ рмЙрмЪрм┐рмд рмирнБрм╣рнЗрмБ ред рмдрнЗрммрнЗ рмПрмХ рммрнНрнЯрм╛рмкрмХ рмврм╛рмЮрнНрмЪрм╛рмХрнБ рммрнБрмЭрм┐рммрм╛ рмкрм╛рмЗрмБ рммрм┐рм╣рм╛рм░ рм╕рм░рмХрм╛рм░рмЩрнНрмХ рмПрм╣рм┐ рм╕рм░рмХрм╛рм░рнА рм╣рм╕рнНрмдрмХрнНрм╖рнЗрмк рмЕрмдрнНрнЯрмирнНрмд рмЧрнБрм░рнБрмдрнНрн▒рмкрнВрм░рнНрмгрнНрмг ред

рмЬрм╛рмдрм┐ рмУ рммрм░рнНрмЧрм░ рмкрм░рм╕рнНрмкрм░ рм╕рм╣ рмЬрмбрм╝рм┐рмд

рмпрнЗрмЙрмБ рмдрмернНрнЯ рм░рм╣рм┐рмЫрм┐ рмдрм╛рм╣рм╛ рмжрм░рнНрм╢рм╛рмЙрмЫрм┐ рмпрнЗ рмЬрм╛рмдрм┐ рмУ рм╢рнНрм░рнЗрмгрнА рмормзрнНрнЯрм░рнЗ рмПрмХ рмЖрмХрм░рнНрм╖рмгрнАрнЯ рмЕрмирнНрмдрм░рмЩрнНрмЧрмдрм╛ рм░рм╣рм┐рмЫрм┐ ред рмпрмжрм┐рмУ рмЧрм░рм┐рмм рмкрм░рм┐рммрм╛рм░ (рмпрнЗрмЙрмБрморм╛рмирмЩрнНрмХрм░ рморм╛рм╕рм┐рмХ рмЖрнЯ рнм,рнжрнжрнж рмЯрмЩрнНрмХрм╛рм░рнБ рмХрморнН) рм╕рморм╕рнНрмд рм╕рм╛рморм╛рмЬрм┐рмХ рмЧрнЛрм╖рнНрмарнАрм░рнЗ рмжрнЗрмЦрм┐рммрм╛рмХрнБ рморм┐рм│рнЗ, рм╕рморм╛рмЬрм░ рмЕрммрм╣рнЗрм│рм┐рмд рммрм░рнНрмЧ (рмЕрмирнБрм╕рнВрмЪрм┐рмд рмЬрм╛рмдрм┐, рмЕрмирнБрм╕рнВрмЪрм┐рмд рмЬрмирмЬрм╛рмдрм┐, рмкрмЫрнБрмЖ рммрм░рнНрмЧ рмПрммрмВ рмЕрмдрм┐ рмкрмЫрнБрмЖ рммрм░рнНрмЧ) рмормзрнНрнЯрм░рнЗ рмжрм╛рм░рм┐рмжрнНрм░рнНрнЯ рмЕрмзрм┐рмХ ред рмЙрмжрм╛рм╣рм░рмгрм╕рнНрн▒рм░рнВрмк, рм╕рм╛рмзрм╛рм░рмг рммрм░рнНрмЧрм░ рмкрнНрм░рм╛рнЯ рнирнл% рмкрм░рм┐рммрм╛рм░ (рмкрмврм╝рмирнНрмдрнБ рмЙрмЪрнНрмЪ рмЬрм╛рмдрм┐) рмЧрм░рм┐рмм рмЕрмЯрмирнНрмдрм┐ ред рм╕рммрнБ рморм╛рмирмжрмгрнНрмб рмЕрмирнБрмпрм╛рнЯрнА рмПрм╣рм┐ рм╕рмВрмЦрнНрнЯрм╛ рмЪрм┐рмирнНрмдрм╛рмЬрмирмХ ред рмдрнЗрммрнЗ рмПрм╕рм╕рм┐ рм╕рморнНрмкрнНрм░рмжрм╛рнЯрм░рнЗ рмжрм╛рм░рм┐рмжрнНрм░рнНрнЯ рм╕рнНрмдрм░ рмЕрмзрм┐рмХ рмЪрм┐рмирнНрмдрм╛рмЬрмирмХ ред рмдрмернНрнЯ рмжрм░рнНрм╢рм╛рмЙрмЫрм┐ рмпрнЗ рнкрни% рм░рнБ рмЕрмзрм┐рмХ рмПрм╕рм╕рм┐ рмкрм░рм┐рммрм╛рм░ рмЕрмЫрмирнНрмдрм┐, рмпрнЗрмЙрмБрморм╛рмирнЗ рморм╛рм╕рмХрнБ рнм,рнж рмЯрмЩрнНрмХрм╛рм░рнБ рмХрморнН рм░рнЛрмЬрмЧрм╛рм░ рмХрм░рмирнНрмдрм┐ ред

рмПрм╣рм┐ рмдрнБрм│рмирм╛рмдрнНрмормХ рмЪрм┐рмдрнНрм░ рм╕рнНрмкрм╖рнНрмЯ рмнрм╛рммрм░рнЗ рмПрмХ рморнМрм│рм┐рмХ рм╕рмдрнНрнЯрмХрнБ рм╕рнВрмЪрм╛рмЙрмЫрм┐ рмпрнЗ рмЬрм╛рмдрм┐ рмХрнЗрммрм│ рмПрмХ рм╕рм╛рморм╛рмЬрм┐рмХ рммрм░рнНрмЧ рмирнБрм╣рнЗрмБ; рмПрм╣рм╛ рмормзрнНрнЯ рмнрм╛рм░рмдрнАрнЯ рмкрм░рм┐рмкрнНрм░рнЗрмХрнНрм╖рнАрм░рнЗ рмЬрмгрнЗ рммрнНрнЯрмХрнНрмдрм┐/рмкрм░рм┐рммрм╛рм░рм░ рм╕рм╛рмормЧрнНрм░рм┐рмХ рм╕рм╛рморм╛рмЬрм┐рмХ-рмЕрм░рнНрмермирнИрмдрм┐рмХ рмкрмЫрнБрмЖрмкрмг рмирм┐рм░рнНрмжрнНрмзрм╛рм░рмг рмХрм░рм┐рмерм╛рмП ред

рмПрм╣рм┐ рмкрм░рм┐рмкрнНрм░рнЗрмХрнНрм╖рнАрм░рнЗ рм░рм╛рм╖рнНрмЯрнНрм░рм╛рнЯрмдрнНрмд рмХрнНрм╖рнЗрмдрнНрм░рм░рнЗ рмирм┐рмпрнБрмХрнНрмдрм┐ рмПрммрмВ рм░рм╛рмЬрнНрнЯ рмкрм░рм┐рмЪрм╛рм│рм┐рмд рм╢рм┐рмХрнНрм╖рм╛рмирнБрм╖рнНрмарм╛рмирм░рнЗ рмЬрм╛рмдрм┐рмнрм┐рмдрнНрмдрм┐рмХ рм╕рмВрм░рмХрнНрм╖рмгрм░ рм╕рморнНрмкрнНрм░рм╕рм╛рм░рмг рмпрмернЗрм╖рнНрмЯ ред рмдрнЗрммрнЗ рмПрм╣рм┐ рм╕рм░рм│ рм░рнВрмкрм░рнЗрмЦ рм╕рморм╕рм╛рморнЯрм┐рмХ рмЕрм░рнНрмермирнИрмдрм┐рмХ рмЬрнАрммрмирм░ рмкрнНрм░рмХрнГрмд рмЪрм┐рмдрнНрм░ рмЙрмкрм╕рнНрмерм╛рмкрми рмХрм░рнЗ рмирм╛рм╣рм┐рмБ ред рм╕рнЗрмерм┐рмкрм╛рмЗрмБ рмкрнНрм░рмдрм┐рм╖рнНрмарм┐рмд рмЕрм╕рморм╛рмирмдрм╛рм░ рморнБрмХрм╛рммрм┐рм▓рм╛ рмкрм╛рмЗрмБ рм╕рморнНрмнрм╛рммрнНрнЯ рмЙрмкрм╛рнЯ рмнрм╛рммрм░рнЗ рммрм┐рм╕рнНрмдрм╛рм░рм┐рмд рм╕рмВрм░рмХрнНрм╖рмгрмХрнБ рм╕рморм╛рм▓рнЛрмЪрмирм╛рморнВрм│рмХ рмнрм╛рммрм░рнЗ рморнВрм▓рнНрнЯрм╛рмЩрнНрмХрми рмХрм░рм┐рммрм╛рм░ рмЖрммрм╢рнНрнЯрмХрмдрм╛ рм░рм╣рм┐рмЫрм┐ ред

рнзрнпрнпрнж рмжрм╢рмХрм░ рмЕрм░рнНрмермирнИрмдрм┐рмХ рмЙрмжрм╛рм░рнАрмХрм░рмг рмПрмХ рмирм┐рм░рнНрмгрнНрмгрм╛рнЯрмХ рморнБрм╣рнВрм░рнНрмдрнНрмд рмерм┐рм▓рм╛, рмпрм╛рм╣рм╛рм░ рмирнАрмдрм┐рмЧрмд рмкрнНрм░рмнрм╛рмм рмЙрмкрм░рнЗ рм╕рнБрмжрнВрм░рмкрнНрм░рм╕рм╛рм░рнА рмкрнНрм░рмнрм╛рмм рмкрмбрм╝рм┐рмерм┐рм▓рм╛ ред рмЦрнЛрм▓рм╛ рммрмЬрм╛рм░рмХрнБ рмжрнЗрм╢рм░ рм╕рммрнБрмарм╛рм░рнБ рмкрм╕рмирнНрмжрмпрнЛрмЧрнНрнЯ рмЕрм░рнНрмермирнИрмдрм┐рмХ рммрнНрнЯрммрм╕рнНрмерм╛ рмнрм╛рммрм░рнЗ рм╕рнБрмЧрмо рмХрм░рм┐рммрм╛ рмкрм╛рмЗрмБ рм░рм╛рмЬрнНрнЯ рмПрмХ рм░рм╛рмЬрмирнИрмдрм┐рмХ рмормзрнНрнЯрм╕рнНрмерм┐ рмнрм╛рммрм░рнЗ рмирм┐рмЬрм░ рмнрнВрморм┐рмХрм╛рмХрнБ рмкрнБрмирмГрмирм┐рм░рнНрмжрнНрмзрм╛рм░рмг рмХрм░рм┐рмерм┐рм▓рм╛ ред

рмЬрмирмЬрнАрммрмирм░ рмПрм╣рм┐ рммрмЬрм╛рм░рмнрм┐рмдрнНрмдрм┐рмХ рмХрм│рнНрмкрмирм╛рмХрнБ рмзрнАрм░рнЗ рмзрнАрм░рнЗ рммрм╛рмормкрмирнНрмернА рмжрм│ рм╕рморнЗрмд рм╕рмормЧрнНрм░ рм░рм╛рмЬрмирнИрмдрм┐рмХ рммрм░рнНрмЧ рмЧрнНрм░рм╣рмг рмХрм░рм┐рмерм┐рм▓рнЗ ред рмлрм│рм░рнЗ рм╕рм░рмХрм╛рм░рнА рмХрнНрм╖рнЗрмдрнНрм░рм░ рмирм┐рмпрнБрмХрнНрмдрм┐ рм╣рнНрм░рм╛рм╕ рмкрм╛рмЗрммрм╛рм░рнЗ рм▓рм╛рмЧрм┐рмерм┐рммрм╛рммрнЗрм│рнЗ рмШрм░рнЛрмЗ рмХрнНрм╖рнЗрмдрнНрм░ рмПрмХ рм╢рмХрнНрмдрм┐рм╢рм╛рм│рнА рмЕрм░рнНрмермирнИрмдрм┐рмХ рм╕рмВрм╕рнНрмерм╛рмнрм╛рммрнЗ рмЙрмнрм╛ рм╣рнЛрмЗрмерм┐рм▓рм╛ ред┬а

рмЕрм░рнНрмермирнИрмдрм┐рмХ рмЬрнАрммрмирм░ рмПрм╣рм┐ рмЖрморнВрм│рмХ рмкрнБрмирм░рнНрмЧрмарми рмПрмХ рмЧрморнНрмнрнАрм░ рмЖрм╣рнНрн▒рм╛рми рм╕рнГрм╖рнНрмЯрм┐ рмХрм░рм┐рмЫрм┐ ред рморнБрмХрнНрмд рммрмЬрм╛рм░ рмЕрм░рнНрмермирнАрмдрм┐ рмПрммрмВ рмнрм╛рм░рмдрнАрнЯ рм╕рморм╛рмЬрм░ рмЧрм░рм┐рмм рмУ рмЕрммрм╣рнЗрм│рм┐рмд рммрм░рнНрмЧрмЩрнНрмХ рмЖрмХрм╛рмВрмХрнНрм╖рм╛ рмормзрнНрнЯрм░рнЗ рм░рм╛рмЬрнНрнЯрмХрнБ рм╕рмирнНрмдрнБрм│рми рм░рмЦрм┐рммрм╛рмХрнБ рмкрмбрм╝рм┐рмерм┐рм▓рм╛ ред

рмЙрмжрм╛рм░рмдрм╛ рмнрм╛рммрм░рнЗ рм╕рмХрм╛рм░рм╛рмдрнНрмормХ рмХрм╛рм░рнНрмпрнНрнЯ

рм╕рморм╛рмЬрм░ рмЕрммрм╣рнЗрм│рм┐рмд рммрм░рнНрмЧрмЩрнНрмХрнБ рмирнЗрмЗ рм╕рмХрм╛рм░рм╛рмдрнНрмормХ рмХрм╛рм░рнНрмпрнНрнЯ рмирнАрмдрм┐рмХрнБ рм░рм╛рмЬрмирнИрмдрм┐рмХ рмкрм░рнЛрмкрмХрм╛рм░рм░ рмПрмХ рмкрнНрм░рмХрм╛рм░ рмнрм╛рммрм░рнЗ рмЙрмкрм╕рнНрмерм╛рмкрм┐рмд рмХрм░рм╛рмпрм╛рмЗрмерм┐рм▓рм╛ ред рмПрм╣рм╛ рм╕рм╣рм┐рмд рмзрнАрм░рнЗ рмзрнАрм░рнЗ рмУ рммрнНрнЯрм╛рмкрмХ рмШрм░рнЛрмЗрмХрм░рмг рмкрм╛рмЗрмБ рм░рм╛рмЬрнНрнЯ рмЖрмХрнНрм░рмормгрм╛рмдрнНрмормХ рмирнАрмдрм┐ рмЬрм╛рм░рм┐ рм░рмЦрм┐рмЫрм┐ ред рмПрм╣рм┐ рмХрм╛рм░рмгрм░рнБ рмнрм╛рм░рмдрм░ рм╕рморм╕рм╛рморнЯрм┐рмХ рм░рм╛рмЬрнНрнЯрмХрнБ рмПрмХ рмжрм╛рмдрммрнНрнЯ рм░рм╛рмЬрнНрнЯ рммрнЛрм▓рм┐ рмХрнБрм╣рм╛рмпрм╛рмЗрмкрм╛рм░рнЗ ред рмПрмХ рмкрнНрм░рмдрм┐рм╢рнНрм░рнБрмдрм┐рммрмжрнНрмз рммрмЬрм╛рм░ рм╕рморм░рнНрмермХ рм░рм╛рм╖рнНрмЯрнНрм░ рмпрм┐рмП рм╣рнНрм░рм╛рм╕ рмкрм╛рмЙрмерм┐рммрм╛ рм╕рм░рмХрм╛рм░рнА рмХрнНрм╖рнЗрмдрнНрм░рм░рнЗ рмПрмХ рм╕рнНрн▒рм│рнНрмкрмХрм╛рм│рнАрми рмПрммрмВ рммрнНрнЯрммрм╣рм╛рм░ рмкрм╛рмЗрмБ рмкрнНрм░рм╕рнНрмдрнБрмд рмирм┐рм░рнНрммрм╛рмЪрмирнА рммрнНрнЯрммрм╕рнНрмерм╛ рмнрм╛рммрм░рнЗ рм╕рмХрм╛рм░рм╛рмдрнНрмормХ рмХрм╛рм░рнНрмпрнНрнЯрмХрнБ рм╕рнНрн▒рнАрмХрнГрмдрм┐ рмжрнЗрмЗрмерм╛рмП ред

рморм╛рмзрмм рморнЗрмирми рмХрморм┐рмЯрм┐ рм░рм┐рмкрнЛрм░рнНрмЯ

рм╕рморм╛рми рм╕рнБрмпрнЛрмЧ рмЖрнЯрнЛрмЧ: рмХтАЩрмг, рмХрм╛рм╣рм┐рмБрмХрм┐ рмПрммрмВ рмХрм┐рмкрм░рм┐ ? (рнирнжрнжрно) рмПрмарм╛рм░рнЗ рмЕрмдрнНрнЯрмирнНрмд рмкрнНрм░рм╛рм╕рмЩрнНрмЧрм┐рмХ ред рм╕рм╛рморм╛рмЬрм┐рмХ рмирнНрнЯрм╛рнЯ рм╣рм╛рм╕рм▓ рмкрм╛рмЗрмБ рм╕рморм╛рми рм╕рнБрмпрнЛрмЧ рмврм╛рмЮрнНрмЪрм╛рм░ рмкрм░рм┐рм╕рм░рмХрнБ рммрм┐рм╕рнНрмдрм╛рм░ рмХрм░рм┐рммрм╛ рм░ рмЖрммрм╢рнНрнЯрмХрмдрм╛ рмЙрмкрм░рнЗ рмЧрнБрм░рнБрмдрнНрн▒рм╛рм░рнЛрмк рмХрм░рм┐ рм░рм┐рмкрнЛрм░рнНрмЯрм░рнЗ рмжрм░рнНрм╢рм╛рмпрм╛рмЗрмЫрм┐ рмпрнЗ рмЧрмд рмжрнБрмЗ рмжрм╢рмирнНрмзрм┐ рмормзрнНрнЯрм░рнЗ рмжрнЗрм╢рм░ рмЕрм░рнНрмермирнАрмдрм┐рм░рнЗ рмпрнЗрмЙрмБ рмкрм░рм┐рммрм░рнНрмдрми рмШрмЯрм┐рмЫрм┐ рмдрм╛рм╣рм╛рм░ рмЕрм░рнНрме рм╣рнЗрмЙрмЫрм┐ рмЕрмзрм┐рмХрм╛рмВрм╢ рмЙрмжрнАрнЯрморм╛рми рмПрммрмВ рм▓рм╛рмнрмжрм╛рнЯрмХ рм╕рнБрмпрнЛрмЧ рмШрм░рнЛрмЗ рмХрнНрм╖рнЗрмдрнНрм░рм░рнЗ рмЕрмЫрм┐ рмпрм╛рм╣рм╛ рмПрмкрм░рнНрмпрнНрнЯрмирнНрмд рм╕рмХрм╛рм░рм╛рмдрнНрмормХ рмкрмжрмХрнНрм╖рнЗрмк рмкрм░рм┐рм╕рм░ рммрм╛рм╣рм╛рм░рнЗ рм░рм╣рм┐рмЫрм┐ ред рмдрнЗрмгрнБ рмХрморм┐рмЯрм┐ рмкрм░рм╛рморм░рнНрм╢ рмжрнЗрмЗрмЫрм┐ рмпрнЗ тАШрмЗрмУрм╕рм┐ рмХрнНрм╖рнЗрмдрнНрм░рм░рнЗ рм╕рм╛рм░рнНрммрмЬрмирнАрми рмЙрмжрнНрнЯрнЛрмЧ ┬армПрммрмВ рмШрм░рнЛрмЗ рмЙрмжрнНрнЯрнЛрмЧрмЧрнБрмбрм╝рм┐рмХрнБ рмПрмерм┐рм░рнЗ рм╕рм╛рморм┐рм▓ рмХрм░рм╛рмпрм┐рммрм╛ рмЙрмЪрм┐рмд редтАЩ

рмПрм╣рм┐ рмЖрмХрм│рми рмПрммрнЗрммрм┐ рмЕрмдрнНрнЯрмирнНрмд рмкрнНрм░рм╛рм╕рмЩрнНрмЧрм┐рмХ, рмпрмжрм┐рмУ рмХрнЗрм╣рм┐ рм╕рморм╛рми рм╕рнБрмпрнЛрмЧ рмЖрнЯрнЛрмЧ рмХрм┐рморнНрммрм╛ рм╕рмХрм╛рм░рм╛рмдрнНрмормХ рмХрм╛рм░рнНрмпрнНрнЯ рмирнАрмдрм┐ рмкрм╛рмЗрмБ рмПрм╣рм╛рм░ рмкрнНрм░рм╛рм╕рмЩрнНрмЧрм┐рмХрмдрм╛ рммрм┐рм╖рнЯрм░рнЗ рмХрм╣рнБрмирм╛рм╣рм╛рмБрмирнНрмдрм┐ ред

рм╕рм╛рморм╛рмЬрм┐рмХ рмУ рмЕрм░рнНрмермирнИрмдрм┐рмХ рмЕрм╕рморм╛рмирмдрм╛ рм╕рнГрм╖рнНрмЯрм┐ рмХрм░рнБрмерм┐рммрм╛ рмврм╛рмЮрнНрмЪрм╛рмЧрмд рмХрм╛рм░рмгрмЧрнБрмбрм╝рм┐рмХ рм╕рм╣рм┐рмд рмЬрмбрм╝рм┐рмд рм╣рнЗрммрм╛рмХрнБ рм╕рморм╕рм╛рморнЯрм┐рмХ рм░рм╛рмЬрмирнИрмдрм┐рмХ рмЖрм▓рнЛрмЪрмирм╛ рмЯрм┐рмХрнЗ рмЕрмирм┐рмЪрнНрмЫрм╛ рмкрнНрм░рмХрм╛рм╢ рмХрм░рнБрмерм┐рммрм╛ рмЬрмгрм╛рмкрмбрм╝рм┐рмЫрм┐ ред рмПрмерм┐рм╕рм╣рм┐рмд рм╕рмХрм╛рм░рм╛рмдрнНрмормХ рмХрм╛рм░рнНрмпрнНрнЯ рмврм╛рмЮрнНрмЪрм╛рм░ рм╕рм╛рморнНрмкрнНрм░рмдрм┐рмХ рм░рнВрмк рмХрнЗрмдрнЗ рмлрм│рмкрнНрм░рмж рм╕рнЗ рмирнЗрмЗ рмХрнМрмгрм╕рм┐ рммрм╛рм╕рнНрмдрммрм┐рмХ рмЖрм▓рнЛрмЪрмирм╛ рм╣рнЛрмЗрмирм╛рм╣рм┐рмБ ред рммрм┐рм╣рм╛рм░ рмЬрм╛рмдрм┐ рм╕рм░рнНрммрнЗрмХрнНрм╖рмг рмЖрмормХрнБ рмХрнЗрммрм│ рмЬрм╛рмдрнАрнЯ рм╕рнНрмдрм░рм░рнЗ рмЬрм╛рмдрм┐рмЧрмд рмЬрмирмЧрмгрмирм╛ рмжрм╛рммрм┐ рмХрм░рм┐рммрм╛рмХрнБ рм╕рнБрмпрнЛрмЧ рмжрнЗрмЗрмирм╛рм╣рм┐рмБ, рммрм░рмВ рм╕рм╛рморм╛рмЬрм┐рмХ рмирнНрнЯрм╛рнЯрмХрнБ рмПрмХ рм╕рм╛рморнНрммрм┐рмзрм╛рмирм┐рмХ рморнВрм▓рнНрнЯ рмПрммрмВ рм░рм╛рмЬрмирнИрмдрм┐рмХ рмкрнНрм░рмдрм┐рммрмжрнНрмзрмдрм╛ рмнрм╛рммрм░рнЗ рмкрнБрмирмГрмХрм│рнНрмкрмирм╛ рмХрм░рм┐рммрм╛рм░ рм╕рнБрмпрнЛрмЧ рмжрнЗрмЗрмЫрм┐ ред

рм╕рмВрм░рмХрнНрм╖рмг рнлрнжрм░рнБ рнмрнл% рмХрнБ рммрнГрмжрнНрмзрм┐ рмкрм╛рмЗрмБ рмЧрнЗрмЬрнЗрмЯрнН рммрм┐рмЬрнНрмЮрмкрнНрмдрм┐ рмЬрм╛рм░рм┐ рмХрм▓рнЗ рммрм┐рм╣рм╛рм░ рм╕рм░рмХрм╛рм░

рмирнВрмЖрмжрм┐рм▓рнНрм▓рнА : рм░рм╛рмЬрнНрнЯрмкрм╛рм│ рм░рм╛рмЬрнЗрмирнНрмжрнНрм░ рммрм┐рм╢рнНрн▒рмирм╛рме рмЖрм░рнНрм▓рнЗрмХрм░рмЩрнНрмХ рмЕрмирнБрморнЛрмжрми рмкрм╛рмЗрммрм╛ рмкрм░рнЗ рмирнАрмдрнАрм╢ рмХрнБрморм╛рм░ рм╕рм░рмХрм╛рм░ рмормЩрнНрмЧрм│рммрм╛рм░ рм░рм╛рмЬрнНрнЯрм░ рм╕рм░рмХрм╛рм░рнА рмЪрм╛рмХрм┐рм░рм┐ рмУ рм╢рм┐рмХрнНрм╖рм╛рмирнБрм╖рнНрмарм╛рмирм░рнЗ рммрмЮрнНрмЪрм┐рмд рмЬрм╛рмдрм┐рмЩрнНрмХ рмкрм╛рмЗрмБ рм╕рмВрм░рмХрнНрм╖рмг рнлрнжрм░рнБ рнмрнл рмкрнНрм░рмдрм┐рм╢рмдрмХрнБ рммрнГрмжрнНрмзрм┐ рмХрм░рм┐рммрм╛ рмкрм╛рмЗрмБ рмЧрнЗрмЬрнЗрмЯрнН рммрм┐рмЬрнНрмЮрмкрнНрмдрм┐ рмЬрм╛рм░рм┐ рмХрм░рм┐рмЫрмирнНрмдрм┐ ред

рморм┐рм│рм┐рмерм┐рммрм╛ рм╕рнВрмЪрмирм╛ рмЕрмирнБрмпрм╛рнЯрнА, рм░рм╛рмЬрнНрнЯрмкрм╛рм│ рмЙрмнрнЯ рммрм┐рм▓рнН рмкрмжрммрнА рмУ рм╕рнЗрммрм╛ рм╕рмВрм╢рнЛрмзрми рммрм┐рм▓рнН рмПрммрмВ рммрм┐рм╣рм╛рм░ рм╕рмВрм░рмХрнНрм╖рмг (рм╢рм┐рмХрнНрм╖рм╛рмирнБрм╖рнНрмарм╛рмирм░рнЗ рмирм╛рморм▓рнЗрмЦрм╛) рм╕рмВрм╢рнЛрмзрми рммрм┐рм▓рнН, рнирнжрнирнйрмХрнБ рмЖрмирнБрм╖рнНрмарм╛рмирм┐рмХ рмЕрмирнБрморнЛрмжрми рмжрнЗрммрм╛ рмкрм░рнЗ рм░рм╛рмЬрнНрнЯ рм╕рм░рмХрм╛рм░рмЩрнНрмХрнБ рмкрмарм╛рмЗрмерм┐рм▓рнЗ, рмпрм╛рм╣рм╛ рмлрм│рм░рнЗ рм░рм╛рмЬрнНрнЯ рм╕рм░рмХрм╛рм░рнА рмЪрм╛рмХрм┐рм░рм┐ рмУ рм╢рм┐рмХрнНрм╖рм╛рмирнБрм╖рнНрмарм╛рмирм░рнЗ рмирнВрмдрми рмХрнЛрмЯрм╛ рмкрнНрм░рмдрм┐рм╢рмд рмХрм╛рм░рнНрмпрнНрнЯрмХрм╛рм░рнА рм╣рнЗрммрм╛рм░ рммрм╛рмЯ рмЦрнЛрм▓рм┐рмерм┐рм▓рм╛ ред

рм░рм╛рмЬрнНрнЯ рм╕рм░рмХрм╛рм░ рммрм┐рмзрм╛рмирм╕рмнрм╛рм░рнЗ рм░рм╛рмЬрнНрнЯрм░ рмРрмдрм┐рм╣рм╛рм╕рм┐рмХ рмЬрм╛рмдрм┐ рм╕рм░рнНрммрнЗрмХрнНрм╖рмг рм░рм┐рмкрнЛрм░рнНрмЯрм░ рммрм┐рм╕рнНрмдрнГрмд рммрм┐рм╢рнНрм│рнЗрм╖рмг рмЙрмкрм╕рнНрмерм╛рмкрми рмХрм░рм┐рммрм╛рм░ рмХрм┐рмЫрм┐рмжрм┐рми рмкрм░рнЗ рмирм┐рмХрмЯрм░рнЗ рм░рм╛рмЬрнНрнЯ рммрм┐рмзрм╛рмирм╕рмнрм╛рм░рнЗ рмкрмж рмУ рм╕рнЗрммрм╛рм░рнЗ рмЦрм╛рм▓рм┐ рмкрмжрммрнА рм╕рмВрм░рмХрнНрм╖рмг рм╕рмВрм╢рнЛрмзрми рммрм┐рм▓ рмПрммрмВ рммрм┐рм╣рм╛рм░ рм╕рмВрм░рмХрнНрм╖рмг (рм╢рм┐рмХрнНрм╖рм╛рмирнБрм╖рнНрмарм╛рмирм░рнЗ рмирм╛рморм▓рнЗрмЦрм╛) рм╕рмВрм╢рнЛрмзрми рммрм┐рм▓, рнирнжрнирнйрмХрнБ рм░рм╛рмЬрнНрнЯ рммрм┐рмзрм╛рмирм╕рмнрм╛рм░рнЗ рмЕрмирнБрморнЛрмжрми рморм┐рм│рм┐рмерм┐рм▓рм╛ ред рмЙрмнрнЯ рммрм┐рм▓рм░рнЗ рмЕрмирнБрм╕рнВрмЪрм┐рмд рмЬрм╛рмдрм┐ (рмПрм╕рм╕рм┐)рмЩрнНрмХ рм╕рмВрм░рмХрнНрм╖рмг рнзрнмрм░рнБ рнирнж рмкрнНрм░рмдрм┐рм╢рмд, рмЕрмирнБрм╕рнВрмЪрм┐рмд рмЬрмирмЬрм╛рмдрм┐ (рмПрм╕рмЯрм┐)рмЩрнНрмХ рнзрм░рнБ рни рмкрнНрм░рмдрм┐рм╢рмд, рмЕрмдрнНрнЯрмирнНрмд рмкрмЫрнБрмЖ рмЬрм╛рмдрм┐ (рмЗрммрм┐рм╕рм┐)рмЩрнНрмХ рмкрм╛рмЗрмБ рнзрнорм░рнБ рнирнл рмкрнНрм░рмдрм┐рм╢рмд рмПрммрмВ рмЕрмирнНрнЯрм╛рмирнНрнЯ рмкрмЫрнБрмЖ рммрм░рнНрмЧ (рмУрммрм┐рм╕рм┐)рмЩрнНрмХ рмкрм╛рмЗрмБ рнзрнлрм░рнБ рнзрно рмкрнНрм░рмдрм┐рм╢рмд рмкрм░рнНрмпрнНрнЯрмирнНрмд рм╕рмВрм░рмХрнНрм╖рмг рммрнГрмжрнНрмзрм┐ рмХрм░рм╛рмпрм╛рмЗ рморнЛрмЯ рмЬрм╛рмдрм┐рмнрм┐рмдрнНрмдрм┐рмХ рм╕рмВрм░рмХрнНрм╖рмг рмкрм░рм┐рморм╛рмг рнлрнжрм░рнБ рнмрнл рмкрнНрм░рмдрм┐рм╢рмдрмХрнБ рммрнГрмжрнНрмзрм┐ рмХрм░рм┐рммрм╛рмХрнБ рмжрм╛рммрм┐ рмХрм░рм╛рмпрм╛рмЗрмЫрм┐ ред

рм░рм╛рмЬрнНрнЯрмкрм╛рм│рмЩрнНрмХ рмЖрмирнБрм╖рнНрмарм╛рмирм┐рмХ рмЕрмирнБрморнЛрмжрми рмкрм░рнЗ рм░рм╛рмЬрмнрммрми рмЙрмнрнЯ рммрм┐рм▓ рмлрнЗрм░рм╛рмЗрмжрнЗрмм рммрнЛрм▓рм┐ рммрм┐рм╣рм╛рм░ рморнБрмЦрнНрнЯрмормирнНрмдрнНрм░рнА рмирнАрмдрнАрм╢ рмХрнБрморм╛рм░ рмЖрм╢рм╛ рммрнНрнЯрмХрнНрмд рмХрм░рм┐рммрм╛рм░ рмХрм┐рмЫрм┐рмжрм┐рми рмкрм░рнЗ рмЖрм░рнНрм▓рнЗрмХрм░рмЩрнНрмХ рмЕрмирнБрморнЛрмжрми рморм┐рм│рм┐рмЫрм┐ ред

рмПрмХрмХ рмирм┐рм░рнНрммрм╛рмЪрмирм░рнЗ рмХрнЗрмирнНрмжрнНрм░ рм╢рм╛рм╕рмирм░рнЗ рмерм┐рммрм╛ рмжрм│рмХрнБ рмлрм╛рмЗрмжрм╛ рморм┐рм│рм┐рмм: рмкрнНрнЯрм╛рмирнЗрм▓ рморнБрмЦрнНрнЯ

рмирнВрмЖрмжрм┐рм▓рнНрм▓рнА: рмкрнВрм░рнНрммрмдрми рм░рм╛рм╖рнНрмЯрнНрм░рмкрмдрм┐ рм░рм╛рмормирм╛рме рмХрнЛрммрм┐рмирнНрмж рмПрмХрмХрм╛рм│рнАрми рмирм┐рм░рнНрммрм╛рмЪрми рммрм╛ тАШрмПрмХ рмжрнЗрм╢, рмЧрнЛрмЯрм┐рмП рмирм┐рм░рнНрммрм╛рмЪрмитАЩ рмХрм░рм┐рммрм╛ рмкрнНрм░рм╕рнНрмдрм╛рммрмХрнБ рм╕рморм░рнНрмерми рмХрм░рм┐рмЫрмирнНрмдрм┐ ред рм╕рнЗ рмХрм╣рм┐рмЫрмирнНрмдрм┐ рмпрнЗ рмПрм╣рм╛рмжрнНрн▒рм╛рм░рм╛ рмХрнЗрмирнНрмжрнНрм░рм░рнЗ рмХрнНрм╖рмормдрм╛рм░рнЗ рмерм┐рммрм╛ рмпрнЗ рмХрнМрмгрм╕рм┐ рмжрм│рмХрнБ рмлрм╛рмЗрмжрм╛ рм╣рнЗрмм, рм╕рнЗ рммрм┐рмЬрнЗрмкрм┐ рм╣рнЗрмЙ рмХрм┐ рмХрмВрмЧрнНрм░рнЗрм╕ ред рмХрнЛрммрм┐рмирнНрмж тАШрмПрмХ рмжрнЗрм╢, рмЧрнЛрмЯрм┐рмП рмирм┐рм░рнНрммрм╛рмЪрмитАЩ рмЙрмкрм░рнЗ рм╕рм░рмХрм╛рм░рмЩрнНрмХ рмжрнНрн▒рм╛рм░рм╛ рмирм┐рмпрнБрмХрнНрмд рмЙрмЪрнНрмЪрм╕рнНрмдрм░рнАрнЯ рмХрморм┐рмЯрм┐рм░ рморнБрмЦрнНрнЯ рмЕрмЫрмирнНрмдрм┐ ред

рм╕рммрнБ рм░рм╛рмЬрмирнИрмдрм┐рмХ рмжрм│ рмХрнЗрммрнЗ рмирм╛ рмХрнЗрммрнЗ рмПрм╣рм╛рмХрнБ рм╕рморм░рнНрмерми рмХрм░рм┐рмЫрмирнНрмдрм┐ ред рмПрм╣рм╛ рмжрнЗрм╢ рмкрм╛рмЗрмБ рм▓рм╛рмнрмжрм╛рнЯрмХ рм╣рнЛрмЗрмерм┐рммрм╛рм░рнБ рмЧрмармирморнВрм│рмХ рм╕рморм░рнНрмерми рмкрм╛рмЗрмБ рмЖрморнЗ рм╕рморм╕рнНрмд рмкрмХрнНрм╖рмЩрнНрмХрнБ рмЕрмирнБрм░рнЛрмз рмХрм░рнБрмЫрнБред рмПрм╣рм╛ рмЬрм╛рмдрнАрнЯ рм╕рнНрн▒рм╛рм░рнНрмерм░ рммрм┐рм╖рнЯ рммрнЛрм▓рм┐ рм╕рнЗ рмХрм╣рм┐рмЫрмирнНрмдрм┐ ред

рмЙрмдрнНрмдрм░рмкрнНрм░рмжрнЗрм╢рм░ рм░рм╛рмПрммрм░рнЗрм▓рм┐рм░рнЗ рм╕рм╛рморнНрммрм╛рмжрм┐рмХрморм╛рмирмЩрнНрмХ рм╕рм╣ рмХрмерм╛рммрм╛рм░рнНрмдрнНрмдрм╛ рмХрм░рм┐ рмХрнЛрммрм┐рмирнНрмж рмХрм╣рм┐рмЫрмирнНрмдрм┐ рмпрнЗ рм╕рнЗ рм╕рморм╕рнНрмд рмЬрм╛рмдрнАрнЯ рмжрм│ рм╕рм╣ рмХрмерм╛ рм╣рнЛрмЗрмЫрмирнНрмдрм┐ рмПрммрмВ рмПрмХрмХрм╛рм│рнАрми рмирм┐рм░рнНрммрм╛рмЪрми рмкрм╛рмЗрмБ рм╕рнЗрморм╛рмирмЩрнНрмХ рмкрм░рм╛рморм░рнНрм╢ рм▓рнЛрмбрм╝рм┐рмЫрмирнНрмдрм┐ ред рмкрнНрм░рмдрнНрнЯрнЗрмХ рм░рм╛рмЬрмирнИрмдрм┐рмХ рмжрм│ рмХрнМрмгрм╕рм┐ рмирм╛ рмХрнМрмгрм╕рм┐ рм╕рморнЯрм░рнЗ рмПрм╣рм╛рмХрнБ рм╕рморм░рнНрмерми рмХрм░рм┐рмерм┐рм▓рнЗ рммрнЛрм▓рм┐ рм╕рнЗ рмжрнГрмврм╝рнЛрмХрнНрмдрм┐ рмкрнНрм░рмХрм╛рм╢ рмХрм░рм┐рмЫрмирнНрмдрм┐ ред

рмнрм╛рм░рмд рм╕рм░рмХрм╛рм░ рмПрмХ рмЙрмЪрнНрмЪрм╕рнНрмдрм░рнАрнЯ рмХрморм┐рмЯрм┐ рмЧрмарми рмХрм░рм┐ рморнЛрмдрнЗ рмПрм╣рм╛рм░ рмЕрмзрнНрнЯрмХрнНрм╖рмнрм╛рммрнЗ рмирм┐рмпрнБрмХрнНрмд рмХрм░рм┐рмЫрмирнНрмдрм┐ ред рмПрм╣рм┐ рмкрм░рморнНрмкрм░рм╛ (рмЧрнЛрмЯрм┐рмП рмжрнЗрм╢, рмЧрнЛрмЯрм┐рмП рмирм┐рм░рнНрммрм╛рмЪрми)рм░ рмкрнБрмирмГ рмХрм╛рм░рнНрмпрнНрнЯрмХрм╛рм░рм┐рмдрм╛ рм╕рморнНрмкрм░рнНрмХрм░рнЗ рмХрморм┐рмЯрм┐рм░ рм╕рмжрм╕рнНрнЯрморм╛рмирнЗ рмЬрмирм╕рм╛рмзрм╛рм░рмгрмЩрнНрмХ рм╕рм╣ рморм┐рм╢рм┐ рм╕рм░рмХрм╛рм░рмЩрнНрмХрнБ рмкрм░рм╛рморм░рнНрм╢ рмжрнЗрммрнЗ ред рморнБрмБ рм╕рморм╕рнНрмд рмЬрм╛рмдрнАрнЯ рм╕рнНрмдрм░рм░рнЗ рмкрмЮрнНрмЬрнАрмХрнГрмд рм░рм╛рмЬрмирнИрмдрм┐рмХ рмжрм│рморм╛рмирмЩрнНрмХ рм╕рм╣ рмпрнЛрмЧрм╛рмпрнЛрмЧ рмХрм░рм┐ рм╕рнЗрморм╛рмирмЩрнНрмХ рмкрм░рм╛рморм░рнНрм╢ рм▓рнЛрмбрм╝рм┐рмЫрм┐ ред

рм▓рнЛрмХрм╕рмнрм╛, рммрм┐рмзрм╛рмирм╕рмнрм╛, рмкрнМрм░рмкрм╛рм│рм┐рмХрм╛ рмУ рмкрмЮрнНрмЪрм╛рнЯрмдрм░ рмПрмХрмХрм╛рм│рнАрми рмирм┐рм░рнНрммрм╛рмЪрми рмХрм░рм┐рммрм╛ рмкрнНрм░рм╕рмЩрнНрмЧрм░рнЗ рмпрмерм╛рм╢рнАрмШрнНрм░ рмЕрмирнБрмзрнНрнЯрм╛рми рмХрм░рм┐ рм╕рнБрмкрм╛рм░рм┐рм╕ рмХрм░рм┐рммрм╛ рмкрм╛рмЗрмБ рм╕рм░рмХрм╛рм░ рмПрмХ рно рмЬрмгрм┐рмЖ рмЙрмЪрнНрмЪрм╕рнНрмдрм░рнАрнЯ рмХрморм┐рмЯрм┐ рмЧрмарми рмХрм░рм┐рмЫрмирнНрмдрм┐ ред

рмЕрмирнНрнЯрмкрмХрнНрм╖рм░рнЗ рмЖрмЗрми рмЖрнЯрнЛрмЧ рм╕рнВрмдрнНрм░рм░рнБ рмХрнБрм╣рм╛рмпрм╛рмЗрмЫрм┐ рмпрнЗ рнирнжрнирнкрм░рнЗ рмПрмХрмХрм╛рм│рнАрми рмирм┐рм░рнНрммрм╛рмЪрми рм╣рнЗрмм рмирм╛рм╣рм┐рмБ рмХрм╛рм░рмг рмПрм╣рм╛ рм╕рморнНрмнрмм рмирнБрм╣рнЗрмБ ред рмХрм┐рмирнНрмдрнБ рмирнНрнЯрнБрмЬрнН рмПрмЬрнЗрмирнНрм╕рм┐ рмкрм┐рмЯрм┐рмЖрмЗрм░ рмПрмХ рм░рм┐рмкрнЛрм░рнНрмЯрм░рнЗ рмХрнБрм╣рм╛рмпрм╛рмЗрмЫрм┐ рмпрнЗ рнирнжрнирнп рм▓рнЛрмХрм╕рмнрм╛ рмирм┐рм░рнНрммрм╛рмЪрми рм╕рм╣рм┐рмд рм╕рморм╕рнНрмд рм░рм╛рмЬрнНрнЯ рммрм┐рмзрм╛рмирм╕рмнрм╛ рмирм┐рм░рнНрммрм╛рмЪрми рмХрм░рм┐рммрм╛ рмкрм╛рмЗрмБ рмХрморм┐рм╢рми рмПрмХ рмлрм░рнНрморнБрм▓рм╛ рмЙрмкрм░рнЗ рмХрм╛рмо рмХрм░рнБрмЫрмирнНрмдрм┐ ред

рнзрнпрнлрнз-рнлрни, рнзрнпрнлрнн, рнзрнпрнмрни рмУ рнзрнпрнмрннрм░рнЗ рмПрмХрмХрм╛рм│рнАрми рмирм┐рм░рнНрммрм╛рмЪрми рм╣рнЛрмЗрмерм┐рм▓рм╛ ред рмдрнЗрммрнЗ рнзрнпрнмрно рмУ рнзрнпрнмрнпрм░рнЗ рмХрнЗрмдрнЗрмХ рммрм┐рмзрм╛рмирм╕рмнрм╛ рмУ рнзрнпрннрнж рмбрм┐рм╕рнЗрморнНрммрм░рм░рнЗ рм▓рнЛрмХрм╕рмнрм╛ рмнрмЩрнНрмЧ рм╣рнЗрммрм╛ рмкрм░рнЗ рмЕрм▓рмЧрм╛ рмЕрм▓рмЧрм╛ рмирм┐рм░рнНрммрм╛рмЪрми рмЕрмирнБрм╖рнНрмарм┐рмд рм╣рнЛрмЗрмерм┐рм▓рм╛ ред

рм╕рнЗрмкрнНрмЯрнЗрморнНрммрм░ рнирнйрмдрм╛рм░рм┐рмЦрм░рнЗ рмХрнЛрммрм┐рмирнНрмж рмкрнНрм░рмермо рмЙрмЪрнНрмЪрм╕рнНрмдрм░рнАрнЯ рмХрморм┐рмЯрм┐ рммрнИрмармХрм░ рмирнЗрмдрнГрмдрнНрн▒ рмирнЗрмЗрмерм┐рм▓рнЗ ред рмкрнНрм░рмермо рммрнИрмармХрм░рнЗ рмХрнЗрмирнНрмжрнНрм░ рмЧрнГрм╣рмормирнНрмдрнНрм░рнА рмЕрморм┐рмд рм╢рм╛рм╣рм╛, рмЖрмЗрми рмормирнНрмдрнНрм░рнА рмЕрм░рнНрмЬрнБрми рм░рм╛рмо рморнЗрмШрн▒рм╛рм▓, рм░рм╛рмЬрнНрнЯрм╕рмнрм╛рм░ рмкрнВрм░рнНрммрмдрми рммрм┐рм░рнЛрмзрнА рмжрм│ рмирнЗрмдрм╛ рмЧрнБрм▓рм╛рмо рмирммрнА рмЖрмЬрм╛рмж, рмЕрм░рнНрме рмЖрнЯрнЛрмЧрм░ рмкрнВрм░рнНрммрмдрми рмЕрмзрнНрнЯрмХрнНрм╖ рмПрмирмХрнЗ рм╕рм┐рмВрм╣, рм▓рнЛрмХрм╕рмнрм╛рм░ рмкрнВрм░рнНрммрмдрми рморм╣рм╛рм╕рмЪрм┐рмм рм╕рнБрмнрм╛рм╖ рм╕рм┐ рмХрм╢рнНрнЯрмк, рмкрнВрм░рнНрммрмдрми рморнБрмЦрнНрнЯ рмнрм┐рмЬрм┐рм▓рм╛рмирнНрм╕ рмХрморм┐рм╢рмирм░ рм╕рмЮрнНрмЬрнЯ рмХрнЛрмарм╛рм░рнА рмкрнНрм░рморнБрмЦ рмЙрмкрм╕рнНрмерм┐рмд рмерм┐рм▓рнЗ ред рммрм┐рм╢рм┐рм╖рнНрмЯ рмЖрмЗрмирмЬрнАрммрнА рм╣рм░рм┐рм╢ рм╕рм╛рм▓рмнрнЗ рмнрм░рнНрмЪрнБрмЖрм▓ рморм╛рмзрнНрнЯрморм░рнЗ рммрнИрмармХрм░рнЗ рмпрнЛрмЧ рмжрнЗрмЗрмерм┐рм▓рнЗ ред

рмирм┐рм░рнНрммрм╛рмЪрми рмкрнНрм░рмдрм┐рм╢рнНрм░рнБрмдрм┐рм░ рмЧрмгрм┐рмд рмЖрмбрм╝рмХрнБ рмЧрмдрм┐ рмХрм░рнБрмЫрм┐ рмХрм┐ ?

рммрм┐рмзрм╛рмирм╕рмнрм╛ рмирм┐рм░рнНрммрм╛рмЪрмирм░рнЗ рмжрнЗрмЦрм┐рммрм╛рмХрнБ рморм┐рм│рм┐рмЫрм┐ рмЯрнНрм░рнЗрмгрнНрмб

рмирнВрмЖрмжрм┐рм▓рнНрм▓рнА: рмирм┐рм░рнНрммрм╛рмЪрми рмПрммрнЗ рмнрм╛рммрмкрнНрм░рммрмг рмкрнНрм░рм╕рмЩрнНрмЧрм░рнБ рмкрнНрм░рмдрм┐рм╢рнНрм░рнБрмдрм┐рм░ рмЧрмгрм┐рмдрмХрнБ рммрмжрм│рм┐рмпрм╛рмЗрмЫрм┐ рмХрм┐ ? рнлрмЯрм┐ рм░рм╛рмЬрнНрнЯрм░ рммрм┐рмзрм╛рмирм╕рмнрм╛ рмирм┐рм░рнНрммрм╛рмЪрми рм╕рморнЯрм░рнЗ рмПрм╣рм╛ рм╣рнЗрмЙрмЫрм┐ рм╕рммрнБрмарм╛рм░рнБ рммрмбрм╝ рм░рм╛рмЬрмирнИрмдрм┐рмХ рмкрнНрм░рм╢рнНрми ред рммрм╛рм╕рнНрмдрммрм░рнЗ рм╕рм╛рморнНрмкрнНрм░рмдрм┐рмХ рм╕рморнЯрм░рнЗ рм░рм╛рмЬрмирнИрмдрм┐рмХ рмжрм│рмЧрнБрмбрм╝рм┐рмХрм░ рмкрнНрм░рмдрм┐рм╢рнНрм░рнБрмдрм┐ рмХрм┐рморнНрммрм╛ рмирм┐рм░рнНрммрм╛рмЪрми рмкрнВрм░рнНрммрм░рнБ рм╕рм░рмХрм╛рм░ рмХрм░рм┐рмерм┐рммрм╛ рмХрм▓рнНрнЯрм╛рмгрмХрм╛рм░рнА рмпрнЛрмЬрмирм╛рмХрнБ рмирнЗрмЗ рмирм┐рм░рнНрммрм╛рмЪрмирнА рмПрмЬрнЗрмгрнНрмбрм╛ рм╕рнНрмерм┐рм░ рмХрм░рм╛рмпрм╛рмЙрмЫрм┐, рмпрнЗрмЙрмБрмерм┐рм░рнЗ рмЕрмирнНрнЯ рм╕рморм╕рнНрмд рмкрнНрм░рм╕рмЩрнНрмЧ рмкрмЫрмХрнБ рмЪрм╛рм▓рм┐рмпрм╛рмЗрмЫрм┐ ред рмдрнЗрммрнЗ рмПрм╣рм┐ рмзрм╛рм░рм╛рмХрнБ рморм╛рмЧрмгрм╛ рмХрм▓рнНрнЯрм╛рмгрмХрм╛рм░рнА рмпрнЛрмЬрмирм╛ рм╕рм╣ рмормзрнНрнЯ рмпрнЛрмбрм╝рм╛рмпрм╛рмЗрмЫрм┐ ред рмПрм╣рм╛рм░ рмкрнНрм░рмнрм╛рммрмХрнБ рмирнЗрмЗ рм╕рморм╛рмирнНрмдрм░рм╛рм│ рммрм┐рмдрм░рнНрмХ рмормзрнНрнЯ рм╣рнЗрммрм╛рм░рнЗ рм▓рм╛рмЧрм┐рмЫрм┐ ред рмХрм┐рмирнНрмдрнБ рмПрмерм┐рм░рнЗ рм╕рммрнБ рм░рм╛рмЬрмирнИрмдрм┐рмХ рмжрм│ рм╕рморм╛рми рмнрм╛рммрм░рнЗ рмЬрмбрм╝рм┐рмд рм╣рнЛрмЗрмерм┐рммрм╛рм░рнБ рммрм┐рмдрм░рнНрмХ рмкрмЫрмХрнБ рмарнЗрм▓рм┐ рм╣рнЛрмЗрмпрм╛рмЗрмЫрм┐ рмПрммрмВ рмкрнНрм░рмдрм┐рм╢рнНрм░рнБрмдрм┐рм░ рмЧрмгрм┐рмд рмЙрмкрм░рнЗ рм╕рм░рнНрммрм╛рмзрм┐рмХ рмзрнНрнЯрм╛рми рмжрм┐рмЖрмпрм╛рмЗрмЫрм┐ ред

рмХтАЩрмг рм╕рмЩрнНрмХрнЗрмд рмжрнЗрмЗрмЫрмирнНрмдрм┐ рммрм┐рм░рнЛрмзрнА ?

рммрм╛рм╕рнНрмдрммрм░рнЗ рнирнжрнзрнкрм░рнБ рмирм░рнЗрмирнНрмжрнНрм░ рморнЛрмжрм┐рмЩрнНрмХ рмирнЗрмдрнГрмдрнНрн▒рм░рнЗ рммрм┐рмЬрнЗрмкрм┐рм░ рммрм┐рмЬрнЯ рммрм┐рм░рнЛрмзрнАрмЩрнНрмХ рмЖрмЧрм░рнЗ рмЕрм╕рнНрмдрм┐рмдрнНрн▒рмХрнБ рмирнЗрмЗ рмкрнНрм░рм╢рнНрми рмЙрмарнБрмЫрм┐ ред рммрм┐рмЬрнЗрмкрм┐рм░ рммрмбрм╝ рммрм┐рмЬрнЯрм░рнЗ рм╣рм┐рмирнНрмжрнБрмдрнНрн▒ рмУ рмЬрм╛рмдрнАрнЯрмдрм╛рммрм╛рмж рм╕рм╣ рмЬрмбрм╝рм┐рмд рмнрм╛рммрмкрнНрм░рммрмг рмкрнНрм░рм╕рмЩрнНрмЧ рмормзрнНрнЯ рм░рм╣рм┐рмЫрм┐ ред рммрм┐рмЬрнЗрмкрм┐рм░ рмЖрмХрнНрм░рмормгрм╛рмдрнНрмормХ рмирнАрмдрм┐рмХрнБ рммрм┐рм░рнЛрмзрнАрморм╛рмирнЗ рмЦрм╛рмдрм┐рм░ рмХрм░рнБрмирмерм┐рм▓рнЗ ред рм╕рнЗрморм╛рмирнЗ рмЕрм░рнНрмермирнИрмдрм┐рмХ рмкрнНрм░рм╕рмЩрнНрмЧ рмЙрмарм╛рмЙрмерм┐рм▓рнЗ, рмХрм┐рмирнНрмдрнБ рм╕рнЗрмерм┐рм░рнБ рммрм┐рм╢рнЗрм╖ рмлрм╛рмЗрмжрм╛ рмкрм╛рмЗрмирмерм┐рм▓рнЗ ред рмХрм┐рмирнНрмдрнБ рмХрм┐рмЫрм┐рмжрм┐рми рм╣рнЗрмм рммрм┐рм░рнЛрмзрнАрморм╛рмирнЗ рм╕рм░рмХрм╛рм░рнА рмХрм░рнНрмормЪрм╛рм░рнА, рмпрнБрммрмХ рмУ рморм╣рм┐рм│рм╛рмЩрнНрмХрнБ рмирм┐рмЬ рм╕рмкрмХрнНрм╖рм░рнЗ рмЖрмгрм┐рммрм╛рмХрнБ рмЪрнЗрм╖рнНрмЯрм╛ рмЪрм│рм╛рмЗрмЫрмирнНрмдрм┐ ред рмкрнБрм░рнБрмгрм╛ рмкрнЗрмирм╕рми рмкрнНрм░рмЪрм│рми, рморм╣рм┐рм│рм╛ рмУ рмпрнБрммрмХрморм╛рмирмЩрнНрмХрнБ рмкрнНрм░рмдрм┐ рморм╛рм╕рм░рнЗ рмирм┐рм░рнНрмжрнНрмзрм╛рм░рм┐рмд рмЕрм░рнНрме рм╕рм╣рм╛рнЯрмдрм╛ рмнрм│рм┐ рмкрнНрм░рмдрм┐рм╢рнНрм░рнБрмдрм┐ рмжрм┐рмЖрмпрм╛рмЙрмЫрм┐ ред рнирнжрнирнк рм╕рм╛рмзрм╛рм░рмг рмирм┐рм░рнНрммрм╛рмЪрмирм░рнЗ рммрм┐рм░рнЛрмзрнА рмжрм│рморм╛рмирнЗ рмПрмнрм│рм┐ рмкрнНрм░рм╕рмЩрнНрмЧ рмЙрмарм╛рмЗрммрнЗ рммрнЛрм▓рм┐ рм╕рмЩрнНрмХрнЗрмд рмжрнЗрмЗрмЫрмирнНрмдрм┐ ред

рмХтАЩрмг рм░рм╣рм┐рмЫрм┐ рмХрм╛рмЙрмгрнНрмЯрм░ рмХрм╛рмЙрмгрнНрмЯрм░ рм░рмгрмирнАрмдрм┐ ?

рммрм┐рм╢рнЗрм╖рмЬрнНрмЮрмЩрнНрмХ рмормдрм░рнЗ рмПрм╕рммрнБ рмкрнНрм░рм╕рмЩрнНрмЧрмХрнБ рмЖрмЧрмХрнБ рм░рмЦрм┐ рмХрм┐рморнНрммрм╛ рммрм┐рмЬрнЗрмкрм┐рмХрнБ рмЯрмХрнНрмХрм░ рмжрнЗрмЗ рмирм┐рм░рнНрммрм╛рмЪрми рм▓рмврм╝рм┐рммрм╛ рммрм┐рм░рнЛрмзрнАрмЩрнНрмХ рм╕рморнНрморнБрмЦрм░рнЗ рммрм┐рмХрм│рнНрмк рмирнБрм╣рнЗрмБ, рммрм░рмВ рмПрмХ рм░рм╛рмЬрмирнИрмдрм┐рмХ рммрм╛рмзрнНрнЯрмдрм╛рморнВрм│рмХрмдрм╛ ред рмХрм░рнНрмгрнНрмгрм╛рмЯрмХ рмУ рм╣рм┐рморм╛рмЪрм│ рмкрнНрм░рмжрнЗрм╢рм░рнЗ рмХрмВрмЧрнНрм░рнЗрм╕ рмкрнБрм░рнБрмгрм╛ рмкрнЗрмирм╕рми рмХрм┐рморнНрммрм╛ рм╢рм╕рнНрмдрм╛рм░рнЗ рммрм┐рмЬрнБрм│рм┐ рмпрнЛрмЧрм╛рмЗрмжрнЗрммрм╛ рмнрм│рм┐ рмкрнНрм░рмдрм┐рм╢рнНрм░рнБрмдрм┐ рмжрнЗрмЗ рмирм┐рм░рнНрммрм╛рмЪрми рмЬрм┐рмдрм┐ рмирм┐рмЬрм░ рммрмврм╝рнБрмерм┐рммрм╛ рмкрм░рм╛рмЬрнЯ рмзрм╛рм░рм╛рм░рнЗ рм▓рмЧрм╛рмо рм▓рмЧрм╛рмЗ рмирм┐рмЬрм░ рм╕рмВрмЧрмармирмХрнБ рмкрнБрмирм░рнНрмЬрнАрммрм┐рмд рмХрм░рм┐рмЫрм┐ ред рмЖрморнН рмЖрмжрморнА рмкрм╛рм░рнНрмЯрм┐ рмПрмнрм│рм┐ рмкрнНрм░рмдрм┐рм╢рнНрм░рнБрмдрм┐рмХрнБ рмЖрм░рморнНрмн рмХрм░рм┐ рмжрм┐рм▓рнНрм▓рнА рмУ рмкрмЮрнНрмЬрм╛рммрм░рнЗ рмХрнНрм╖рмормдрм╛рмХрнБ рмЖрм╕рм┐рмЫрм┐ ред рммрм┐рм░рнЛрмзрнАрмЩрнНрмХ рммрмврм╝рнБрмерм┐рммрм╛ рмкрмжрмХрнНрм╖рнЗрмкрмХрнБ рмжрнГрм╖рнНрмЯрм┐рм░рнЗ рм░рмЦрм┐ рмПрм╣рм╛рм░ рморнБрмХрм╛рммрм┐рм▓рм╛ рмкрм╛рмЗрмБ рммрм┐рмЬрнЗрмкрм┐рмХрнБ рмХрнЗрмдрнЗрмХ рм░рм╛рмЬрнНрнЯрм░рнЗ рм▓рнЛрмнрмирнАрнЯ рмкрнНрм░рмдрм┐рм╢рнНрм░рнБрмдрм┐ рмжрнЗрммрм╛рмХрнБ рмкрмбрм╝рм┐рмЫрм┐ ред рмормзрнНрнЯрмкрнНрм░рмжрнЗрм╢рм░рнЗ рмПрмерм░ рммрм┐рмЬрнЗрмкрм┐ рм╕рморнНрмкрнВрм░рнНрмгрнНрмгрмнрм╛рммрнЗ рм▓рм╛рмбрм▓рм┐ рмпрнЛрмЬрмирм╛ рм╕рм╛рм╣рм╛рмпрнНрнЯрм░рнЗ рм▓рмврм╝рнЗрмЗ рмХрм░рм┐рмЫрм┐, рмпрнЗрмЙрмБрмерм┐рм░рнЗ рморм╣рм┐рм│рм╛рморм╛рмирмЩрнНрмХрнБ рморм╛рм╕рм┐рмХ рнзрнирнжрнж рмЯрмЩрнНрмХрм╛ рмнрмдрнНрмдрм╛ рмжрм┐рмЖрмпрм╛рмЙрмЫрм┐ ред рмЕрм░рнНрмерм╛рмдрнН рмормдрмжрм╛рмдрм╛рморм╛рмирмЩрнНрмХрнБ рмкрнНрм░рм▓рнЛрмнрм┐рмд рмХрм░рм┐рммрм╛ рмкрм╛рмЗрмБ рмкрнНрм░рмдрм┐рм╢рнНрм░рнБрмдрм┐ рм░рм╛рмЬрмирнАрмдрм┐рм░ рмпрнБрмЧ рмЬрм╛рм░рм┐ рм░рм╣рм┐рмм рммрнЛрм▓рм┐ рм╕рмЩрнНрмХрнЗрмд рморм┐рм│рм┐рмЫрм┐ ред

рм▓рнЛрмХрморм╛рмирнЗ рмормзрнНрнЯ рмХрнНрм╖рмормдрм╛ рмЖрмХрм│рми рмХрм░рмирнНрмдрм┐

рмирм┐рм░рнНрммрм╛рмЪрми рммрм┐рм╢рнНрм│рнЗрм╖рмХрморм╛рмирнЗ рмХрм╣рм┐рмЫрмирнНрмдрм┐ рмпрнЗ рмЖрмЬрм┐рмХрм╛рм▓рм┐ рмнрнЛрмЯрм░рморм╛рмирнЗ рм╕рм░рм│ рм╢рммрнНрмжрм░рнЗ рмЬрм╛рмгрм┐рммрм╛рмХрнБ рмЪрм╛рм╣рм╛рмБрмирнНрмдрм┐ рмпрнЗ рмХрнМрмгрм╕рм┐ рмжрм│ рм╕рнЗрморм╛рмирмЩрнНрмХрнБ рмХтАЩрмг рмжрнЗрмм ред рмПрм╣рм┐ рмжрм│рмЧрнБрмбрм╝рм┐рмХрм░ рмкрнНрм░рмдрм┐рм╢рнНрм░рнБрмдрм┐рмХрнБ рмпрм╛рмЮрнНрмЪ рмХрм░рм┐рммрм╛ рмкрм░рнЗ рм╕рнЗ рмнрнЛрмЯрнН рмжрнЗрмЙрмЫрмирнНрмдрм┐ ред рмХрм┐рмирнНрмдрнБ рмЖрмЙ рмПрмХ рмЧрнБрм░рнБрмдрнНрн▒рмкрнВрм░рнНрмгрнНрмг рмХрм╛рм░рмг рмЕрмЫрм┐ рмпрм╛рм╣рм╛рмХрнБ рммрнБрмЭрм┐рммрм╛ рмЖрммрм╢рнНрнЯрмХ ред рмпрнЗрмЙрмБрмерм┐рмкрм╛рмЗрмБ рмкрнНрм░рмдрм┐рмнрм╛рммрм╛рми рм░рм╛рмЬрмирнИрмдрм┐рмХ рмжрм│рморм╛рмирнЗ рмнрнЛрмЯрм░рмЩрнНрмХрнБ рм╕рнЗрморм╛рмирмЩрнНрмХ рмкрнНрм░рмдрм┐рм╢рнНрм░рнБрмдрм┐ рмкрнВрм░рмг рмХрм░рм┐рммрм╛рм░рнЗ рмХрнЗрмдрнЗ рм╕рмХрнНрм╖рмо рмдрм╛рм╣рм╛ рммрнБрмЭрм╛рмЗрммрм╛рм░рнЗ рм╕рмХрнНрм╖рмо рм╣рнЗрмЙрмЫрмирнНрмдрм┐ ред рмнрнЛрмЯрм░ рмХрнЗрммрм│ рмкрнНрм░рмдрм┐рм╢рнНрм░рнБрмдрм┐рм░ рмЖрмХрм│рми рмХрм░рмирнНрмдрм┐ рмирм╛рм╣рм┐рмБ, рммрм░рмВ рмПрм╣рм╛рмХрнБ рмкрнВрм░рмг рмХрм░рм┐рммрм╛ рмкрм╛рмЗрмБ рмжрм│рм░ рм╕рм╛рморм░рнНрмернНрнЯрмХрнБ рмормзрнНрнЯ рмЖрмХрм│рми рмХрм░рмирнНрмдрм┐ ред рмХрм╛рм░рмг рм╕рммрнБ рмжрм│ рмкрнНрм░рмдрм┐рм╢рнНрм░рнБрмдрм┐ рмжрнЗрмЙрмЫрмирнНрмдрм┐ ред рм╕рм╛рморм╛рмЬрм┐рмХ рммрм┐рм╢рнЗрм╖рмЬрнНрмЮрмЩрнНрмХ рмормдрм░рнЗ рм╕рм╛рморнНрмкрнНрм░рмдрм┐рмХ рмПрм╣рм┐ рмзрм╛рм░рм╛ рмирм┐рм░рнНрммрм╛рмЪрми рмлрм│рм╛рмлрм│рмХрнБ рмкрнНрм░рмнрм╛рммрм┐рмд рмХрм░рнБрмЫрм┐ ред рмПрммрнЗ рм░рм╛рмЬрмирнИрмдрм┐рмХ рмжрм│ рмкрнНрм░рмдрнНрнЯрнЗрмХ рм░рм╛рмЬрнНрнЯрммрм╛рм╕рнАрмЩрнНрмХ рмЖрммрм╢рнНрнЯрмХрмдрм╛рмХрнБ рмжрнГрм╖рнНрмЯрм┐рм░рнЗ рм░рмЦрм┐ рмкрнНрм░рмдрм┐рм╢рнНрм░рнБрмдрм┐ рмдрм╛рм▓рм┐рмХрм╛ рмкрнНрм░рм╕рнНрмдрнБрмд рмХрм░рнБрмЫрм┐ ред рмПрм╣рм┐ рмХрнНрм░рморм░рнЗ рмнрм╛рммрмирм╛рмдрнНрмормХ рм╕рморм╕рнНрнЯрм╛ рмкрмЫрмХрнБ рмарнЗрм▓рм┐ рм╣рнЛрмЗрмпрм╛рмЙрмЫрм┐ ред

рм╕рнБрмкрнНрм░рм┐рмормХрнЛрм░рнНрмЯрмЩрнНрмХ рммрмбрм╝ рмирм┐рм╖рнНрмкрмдрнНрмдрм┐ : рммрм┐рмнрм┐рмирнНрми рм░рм╛рмЬрнНрнЯрм░рнЗ рмПрмдрм▓рм╛ рм╕рмдрнНрмдрнНрн▒рнЗ рм╣рм╛рмЗрмХрнЛрм░рнНрмЯ рмУ рм╕рнЗрм╕рмирнНрм╕ рмХрнЛрм░рнНрмЯ рмЬрм╛рморм┐рми рмжрнЗрмЗрмкрм╛рм░рм┐рммрнЗ

рмирнВрмЖрмжрм┐рм▓рнНрм▓рнА: рм╣рм╛рмЗрмХрнЛрм░рнНрмЯ рмУ рм╕рнЗрм╕рмирнНрм╕ рмХрнЛрм░рнНрмЯ рмЕрмнрм┐рмпрнБрмХрнНрмдрмЩрнНрмХрнБ рмЯрнНрм░рм╛рмирмЬрм┐рмЯрнН рмЖрмЧрнБрмЖ рмЬрм╛рморм┐рми рмжрнЗрмЗрмкрм╛рм░рм┐рммрнЗ рммрнЛрм▓рм┐ рм╕рнБрмкрнНрм░рм┐рмормХрнЛрм░рнНрмЯ рм░рм╛рнЯ рмжрнЗрмЗрмЫрмирнНрмдрм┐ ред рмпрмжрм┐рмУ рмПрмлрмЖрмЗрмЖрм░ рмЕрмирнНрнЯрмХрнМрмгрм╕рм┐ рм░рм╛рмЬрнНрнЯрм░рнЗ рмкрмЮрнНрмЬрнАрмХрнГрмд рм╣рнЛрмЗрмерм┐рм▓рнЗ рмормзрнНрнЯ рмХрнМрмгрм╕рм┐ рмЕрм╕рнБрммрм┐рмзрм╛ рмирм╛рм╣рм┐рмБ ред рмЬрм╖рнНрмЯрм┐рм╕ рммрм┐рмнрм┐ рмирм╛рмЧрм░рмдрнНрмирм╛ рмПрммрмВ рмЬрм╖рнНрмЯрм┐рм╕ рмЙрмЬрнНрмЬрнНрн▒рм│ рмнрнВрнЯрм╛рмБрмЩрнНрмХрнБ рмирнЗрмЗ рмЧрмарм┐рмд рмЦрмгрнНрмбрмкрнАрма рм░рм╛рмЬрм╕рнНрмерм╛рмирм░ рмЬрмгрнЗ рморм╣рм┐рм│рм╛рмЩрнНрмХ рмпрнМрмдрнБрмХ рмжрм╛рммрм┐ рмЕрмнрм┐рмпрнЛрмЧрм░ рм╢рнБрмгрм╛рмгрм┐ рмХрм░рм┐рмерм┐рм▓рнЗ ред рмПрмерм┐рм░рнЗ рм╕рнНрн▒рм╛рморнАрмЩрнНрмХрнБ рммрнЗрмЩрнНрмЧрм╛рм▓рнБрм░рнБ рмЬрм┐рм▓рнНрм▓рм╛ рмХрнЛрм░рнНрмЯрм░рнБ рмЖрмЧрнБрмЖ рмЬрм╛рморм┐рми рморм┐рм│рм┐рмерм┐рм▓рм╛ ред

рм╕рм░рнНрммрнЛрмЪрнНрмЪ рмирнНрнЯрм╛рнЯрм╛рм│рнЯ рм░рм╛рнЯ рмжрнЗрмЗрмЫрмирнНрмдрм┐ рмпрнЗ рмХрнМрмгрм╕рм┐ рмЕрмнрм┐рмпрнБрмХрнНрмдрмЩрнНрмХрм░ рмдрм╛рмЩрнНрмХ рмЕрмзрнАрмирм░рнЗ рмЕрмкрм░рм╛рмз рмШрмЯрм┐рмирмерм┐рм▓рнЗ рмормзрнНрнЯ рм╣рм╛рмЗрмХрнЛрм░рнНрмЯ рмХрм┐рморнНрммрм╛ рм╕рнЗрм╕рмирнН рмХрнЛрм░рнНрмЯ рмдрм╛рмЩрнНрмХрнБ рмЯрнНрм░рм╛рмирмЬрм┐рмЯрнН рмЖрмЧрнБрмЖ рмЬрм╛рморм┐рми рмкрнНрм░рмжрм╛рми рмХрм░рм┐рмкрм╛рм░рм┐рммрнЗ рмПрммрмВ рмЕрмнрм┐рмпрнБрмХрнНрмд рмЕрмжрм╛рм▓рмдрм░рнЗ рмкрм╣рмЮрнНрмЪрм┐рммрм╛ рмкрм░рнНрмпрнНрнЯрмирнНрмд рмЕрмирнНрмдрм░рнАрмг рм╕рнБрм░рмХрнНрм╖рм╛ рмЬрм╛рм░рм┐ рм░рм╣рм┐рмм ред рм╕рм░рнНрммрнЛрмЪрнНрмЪ рмирнНрнЯрм╛рнЯрм╛рм│рнЯ рмЖрм╣рнБрм░рм┐ рмормзрнНрнЯ рмХрм╣рм┐рмЫрмирнНрмдрм┐ рмпрнЗ рмирм╛рмЧрм░рм┐рмХрмЩрнНрмХ рм╕рнНрн▒рм╛рмзрнАрмирмдрм╛рмХрнБ рмжрнГрм╖рнНрмЯрм┐рм░рнЗ рм░рмЦрм┐ рмЕрмжрм╛рм▓рмд рм╕рнАрморм┐рмд рмЕрмирнНрмдрм░рнАрмг рм╕рнБрм░рмХрнНрм╖рм╛ рмкрнНрм░рмжрм╛рми рмХрм░рм┐рммрм╛ рмЙрмЪрм┐рмд ред

рмдрнЗрммрнЗ рм╕рм░рнНрммрнЛрмЪрнНрмЪ рмирнНрнЯрм╛рнЯрм╛рм│рнЯ рмЯрнНрм░рм╛рмирмЬрм┐рмЯрнН рмЖрмЧрнБрмЖ рмЬрм╛рморм┐рми рмжрнЗрммрм╛ рмкрм╛рмЗрмБ рмХрнЗрмдрнЗрмХ рм╕рм░рнНрмдрнНрмд рм░рмЦрм┐рмЫрмирнНрмдрм┐ред рмПрмнрм│рм┐ рм╕рнБрм░рмХрнНрм╖рм╛рм░ рмкрнНрм░рмермо рмдрм╛рм░рм┐рмЦрм░рнЗ рмдрмжрмирнНрмдрмХрм╛рм░рнА рмЕрмзрм┐рмХрм╛рм░рнА рмУ рмПрмЬрнЗрмирнНрм╕рм┐рмХрнБ рмирнЛрмЯрм┐рм╕рнН рмжрм┐рмЖрмпрм┐рммрм╛ рмЙрмЪрм┐рмд рмПрммрмВ рмЖрммрнЗрмжрмирмХрм╛рм░рнАрмЩрнНрмХрнБ рмЕрмжрм╛рм▓рмдрмЩрнНрмХрнБ рм╕рмирнНрмдрнБрм╖рнНрмЯ рмХрм░рм┐рммрм╛рмХрнБ рмкрмбрм╝рм┐рмм рмпрнЗ рм╕рнЗрморм╛рмирнЗ рмЕрмзрм┐рмХрм╛рм░ рмЕрмжрм╛рм▓рмдрм░ рмжрнНрн▒рм╛рм░рм╕рнНрме рм╣рнЛрмЗрмкрм╛рм░рм┐рммрнЗ рмирм╛рм╣рм┐рмБред

рмЕрмжрм╛рм▓рмд рм░рм╛рнЯ рм╢рнБрмгрм╛рмЗрммрм╛рммрнЗрм│рнЗ рмПрмнрм│рм┐ рмЖрмЧрнБрмЖ рмЬрм╛рморм┐рми рмкрнНрм░рмжрм╛рми рмХрм░рм┐рммрм╛ рм╕рморнЯрм░рнЗ рмЖрмЮрнНрмЪрм│рм┐рмХ рмШрмирм┐рм╖рнНрмармдрм╛ рмЬрм╛рмгрм┐рммрм╛ рмЙрмкрм░рнЗ рмЧрнБрм░рнБрмдрнНрн▒рм╛рм░рнЛрмк рмХрм░рм┐рмЫрмирнНрмдрм┐ ред рмЦрмгрнНрмбрмкрнАрма рмПрм╣рм╛ рмормзрнНрнЯ рм╕рнНрмкрм╖рнНрмЯ рмХрм░рм┐рмЫрмирнНрмдрм┐ рмпрнЗ рмЕрмнрм┐рмпрнБрмХрнНрмдрморм╛рмирнЗ рмХрнЗрммрм│ рмЬрм╛рморм┐рми рмЖрммрнЗрмжрми рмХрм░рм┐рммрм╛ рмкрм╛рмЗрмБ рмЕрмирнНрнЯ рм░рм╛рмЬрнНрнЯрмХрнБ рмпрм╛рмЗрмкрм╛рм░рм┐рммрнЗ рмирм╛рм╣рм┐рмБ рмПрммрмВ рм╕рнЗрморм╛рмирмЩрнНрмХ рмкрм╛рмЦрм░рнЗ рмПрм╣рм╛ рмХрм░рм┐рммрм╛рм░ рмПрмХ рм╕рнНрмкрм╖рнНрмЯ рмХрм╛рм░рмг рм░рм╣рм┐рммрм╛ рмЙрмЪрм┐рмд ред рмЯрнНрм░рм╛рмирмЬрм┐рмЯрнН рмЖрмЧрнБрмЖ рмЬрм╛рморм┐рми рморм╛рморм▓рм╛рм░рнЗ рмкрнВрм░рнНрммрм░рнБ рммрм┐рмнрм┐рмирнНрми рм╣рм╛рмЗрмХрнЛрм░рнНрмЯ рмнрм┐рмирнНрми рмнрм┐рмирнНрми рмормд рм░рмЦрм┐рмерм┐рммрм╛рм░рнБ рмПрм╣рм┐ рморм╛рморм▓рм╛ рм╕рм░рнНрммрнЛрмЪрнНрмЪ рмирнНрнЯрм╛рнЯрм╛рм│рнЯрм░рнЗ рмЙрмарм┐рмерм┐рм▓рм╛ ред