ନୂଆଦିଲ୍ଲୀ: ଲୋକସଭା ନିର୍ବାଚନ ୨୦୨୪ ପୂର୍ବରୁ ରବିବାର (ଫେବ୍ରୁଆରି ୧୮) ଜାତୀୟ ରାଜଧାନୀରେ ଭାରତୀୟ ଜନତା ପାର୍ଟି (ବିଜେପି)ର ଜାତୀୟ ଅଧିବେଶନରେ ଦଳର ସମ୍ବିଧାନରେ ସଂଶୋଧନ କରାଯାଇଛି। ବର୍ତ୍ତମାନ ସଂସଦୀୟ ବୋର୍ଡ ପରିସ୍ଥିତି ଅନୁଯାୟୀ ବିଜେପି ରାଷ୍ଟ୍ରୀୟ ଅଧ୍ୟକ୍ଷଙ୍କ କାର୍ଯ୍ୟକାଳ ବୃଦ୍ଧି କିମ୍ବା ହ୍ରାସ କରିବାକୁ ନିଷ୍ପତ୍ତି ନେଇପାରିବ। ବିଜେପି ସାଧାରଣ ସମ୍ପାଦକ ସୁନୀଲ ବଂଶଲ ଏହି ସଂକଳ୍ପ ଆଗତ କରିଥିଲେ।
ବିଜେପି ଏହାର ସମ୍ବିଧାନରେ ସଂଶୋଧନ କରି ଦଳର ରାଷ୍ଟ୍ରୀୟ ଅଧ୍ୟକ୍ଷ ଏବଂ ସଂସଦୀୟ ବୋର୍ଡର କ୍ଷମତା ବୃଦ୍ଧି କରିଛି। ସଂସଦୀୟ ବୋର୍ଡରେ କୌଣସି ନୂଆ ସଦସ୍ୟଙ୍କୁ ଆଣିବା କିମ୍ବା ହଟାଇବା ନେଇ ନିଷ୍ପତ୍ତି ନେବାର ଅଧିକାର ଦଳର ସଭାପତିଙ୍କୁ ଦିଆଯାଇଛି। ତେବେ ପରେ ସଭାପତିଙ୍କ ନିଷ୍ପତ୍ତିକୁ ଅନୁମୋଦନ ପାଇଁ ସଂସଦୀୟ ବୋର୍ଡ ବୈଠକରେ ଉପସ୍ଥାପନ କରାଯିବ।
କେମିତି ନିର୍ବାଚିତ ହେବେ ବିଜେପି ସଭାପତି ?
ମିଳିଥିବା ସୂଚନା ଅନୁଯାୟୀ, ସାଧାରଣତଃ ସାଂଗଠନିକ ନିର୍ବାଚନ ମାଧ୍ୟମରେ ଦଳର ସଭାପତି ନିର୍ବାଚିତ ହୋଇଥାନ୍ତି। ବିଜେପିରେ ଜାତୀୟ ଅଧ୍ୟକ୍ଷ ଇଲେକ୍ଟୋରାଲ କଲେଜଦ୍ୱାରା ନିର୍ବାଚିତ ହୁଏ, ଯେଉଁଥିରେ ଜାତୀୟ ପରିଷଦର ସଦସ୍ୟ ଏବଂ ରାଜ୍ୟ ପରିଷଦର ସଦସ୍ୟମାନେ ଅନ୍ତର୍ଭୁକ୍ତ। ଦଳର ସମ୍ବିଧାନରେ ଏହା ମଧ୍ୟ କୁହାଯାଇଛି ଯେ ଇଲେକ୍ଟୋରାଲ କଲେଜର ଯେ କୌଣସି ୨୦ ଜଣ ସଦସ୍ୟ ମିଳିତଭାବେ ରାଷ୍ଟ୍ରୀୟ ଅଧ୍ୟକ୍ଷ ପଦ ପାଇଁ ପ୍ରତିଦ୍ୱନ୍ଦ୍ୱିତା କରୁଥିବା ବ୍ୟକ୍ତିଙ୍କ ନାମ ପ୍ରସ୍ତାବ ଦେଇପାରିବେ।
ଏହି ମିଳିତ ପ୍ରସ୍ତାବ ଅତି କମରେ ପାଞ୍ଚଟି ରାଜ୍ୟରୁ ଆସିବା ଆବଶ୍ୟକ, ଯେଉଁଠାରେ ଜାତୀୟ ପରିଷଦ ନିର୍ବାଚନ ଅନୁଷ୍ଠିତ ହୋଇଛି। ସୂତ୍ରରୁ ପ୍ରକାଶ ଯେ ଯେତେବେଳେ ଦଳ ବିଧାନସଭା କିମ୍ବା ଲୋକସଭା ନିର୍ବାଚନ ପାଇଁ ପ୍ରସ୍ତୁତିରେ ବ୍ୟସ୍ତ ଥାଏ, ସେତେବେଳେ ଆଭ୍ୟନ୍ତରୀଣ ନିର୍ବାଚନ ପାଇଁ ନିର୍ଦ୍ଧାରିତ ପ୍ରକ୍ରିୟା ଅନୁସରଣ କରିବା କଷ୍ଟକର ହୋଇଯାଏ।
ଲୋକସଭା ନିର୍ବାଚନକୁ ଦୃଷ୍ଟିରେ ରଖି ବର୍ତ୍ତମାନର ଅଧ୍ୟକ୍ଷ ଜେପି ନଡ୍ଡାଙ୍କ କାର୍ଯ୍ୟକାଳ ଜୁନ୍ ୩୦ ପର୍ଯ୍ୟନ୍ତ ବୃଦ୍ଧି କରାଯାଇଛି। ଏହି ସଂଶୋଧନ ପଛରେ ଥିବା ବିସ୍ତୃତ ବିବରଣୀ ଓ ଯୁକ୍ତି ସମ୍ପର୍କରେ ଦଳ ବିସ୍ତୃତଭାବେ କହିନଥିବାବେଳେ ଭବିଷ୍ୟତରେ ସଭାପତିମାନଙ୍କୁ ଅଧିକରୁ ଅଧିକ ଉପଯୋଗ କରିବା ପାଇଁ ଏହା କରାଯାଇପାରେ ବୋଲି ସୂତ୍ରରୁ ଜଣାପଡ଼ିଛି।
ବଢ଼ିଲା ବିଜେପି ସଭାପତି କ୍ଷମତା
ସମ୍ବିଧାନରେ ସଂଶୋଧନ କରି ଦଳ ନିଜ ସଭାପତିଙ୍କ କ୍ଷମତା ବୃଦ୍ଧି କରିଛି। ଏଥିସହିତ ଦଳର ପୁରୁଣା ନିୟମକୁ ମଧ୍ୟ କ୍ଷୁର୍ଣ୍ଣ କରାଯାଇଛି। ପୁରୁଣା ବିଜେପି ଶାସନ ଅନୁଯାୟୀ ଜଣେ ବ୍ୟକ୍ତି ମାତ୍ର ଦୁଇଥର ପାଇଁ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ହୋଇପାରିବେ ଏବଂ ଉଭୟ ନିର୍ବାଚନ ଶେଷ କରିବାକୁ ପଡ଼ିବ। ତେବେ ସଂଶୋଧନ ପରେ ଜଣେ ନେତାଙ୍କୁ ମାତ୍ର ଦୁଇଥର ଦଳର ସଭାପତି କରାଯାଇପାରିବ ନା ତା’ଠାରୁ ଅଧିକ ସୁଯୋଗ ଦେବାର ବ୍ୟବସ୍ଥା କରାଯାଇଛି ତାହା ସ୍ପଷ୍ଟ ହୋଇନାହିଁ।